上海老底子每天呈送精彩文章一组
打开尘封的记忆，寻觅往昔的岁月
叙上海老底子事 忆上海老底子人
诉上海老底子情
淮海路个红搭蓝
（上）
来源：上海AB面
作者：袁念琪
改写：边秦翌
讲述：王宇洲
审核、推荐：丁迪蒙
编辑：王乙其
2022年元旦个清晨。大冷天个朝阳里，从兴业路并排走过来3位身着蓝制服个礼兵，当中一位肩扛国旗；伊拉停勒中共一大纪念馆前头个广场。
7点55分。一位礼兵右手一扬，血血红个旗子随风展开，勒国歌声中慢慢叫个升起。从搿日天开始，“一大广场国旗护卫队”个九名队员将担负每日天个升旗、降旗。
细心个市民发现，完成升旗个礼兵往北朝淮海中路走，走进了193号个嵩山消防救援站。迭栋具有112年历史个房子从墙到门侪是红彤彤个，人称“红房子”。
淮海路浪有得两座“红房子”，另外一座是854号个红房子西菜馆，伊个“红”是因为店个名字，建筑还呒没勒陕西南路37号个辰光介红。
淮海路有得红也有得蓝，迭个蓝就是193号个“火焰蓝”。平常辰光讲“红得像煞一把火”，实际浪向，火焰勒最高温度个辰光，颜色并勿是红个，而是蓝荧荧个；所以，“火焰蓝”就成为搭烈焰搏斗个消防员个象征色。迭个色调从制服、T恤到被头是蓝仔一片。讲起来，倒是搭民国消防员制服颜色相似，《卢湾区志》里写：“冬服藏青色厚呢，夏服藏青色薄哗叽。”也曾经叫伊拉“橄榄绿”，因为曾经归属武警，制服是橄榄绿色。
消防救援站就是消防队，上海人老早叫伊“救火会”。救火会诞生于1852年、就是清咸丰二年个公共租界，有两家洋行建立义勇消防队。1865年、就是清同治四年，工部局搭保险商洽商组织消防队；第二年成立火政处。法租界到1869年、就是清同治八年再成立救火会，并加入公共租界火政处；1908年、清光绪三十四年独立。
《密勒氏评论报》个主持人鲍惠尔1917年到上海勿久，伊住个理查饭店附近发生了火灾。伊看到大多数救火员是白衬衫加晚礼服或者黑颜色燕尾服，还缚勒只蝴蝶结，其中老外勿少，伊拉勿是公司个大班就是二级职员。搿些业余志愿者从宴会、晚会赶过来。用勿着担心拿衣裳弄龌龊个洗烫整补开销，租界当局会得买单个。勒救火会门顶个石头当中，鲍惠尔读到搿能介一句闲话：“阿拉跟情人战斗”，搭搿能介个情人战斗、刺激却是充满了危险。
华界原来是绿营搭仔衙门兼职救火，后首来，由民间厚仁堂等社会慈善机构兼办。随牢仔城市经济个发展，出现“水社”、“救火社”等民间救火团体。1907年、就是清光绪三十三年，成立救火联合会。开始辰光，救火员是义务制个，后来是义务搭雇用双轨制；雇佣属于职业，有得月薪，但业余人数比职业个多得多。另外，还有各个商会个消防队；德国铁路中国财团代表恩司诺搭赶到火场个商会消防队是搿能介描述个：“一部分注意围观人群，勿要让人来偷物事；另一部分到火里向去抢出值钞票个物事，摆到安全个地方。”
自从上海有了救火会，“沪上火政之善甲于全国”。勒1908年，也就是清光绪三十四年，消防装备已经机械化；1919年换了当时世界先进、且远东第一、上海人称为“火龙”个马达泵浦消防车。到抗战胜利之后个4年里，据《上海公安志》记载：“国民党拿财力用于内战，上海消防设施搭仔装备基本处于停滞状态。”上海市军管会接管个辰光，全市只有消防员警900人。新中国成立之后，上海消防面目一新。消防员1965年起实行义务兵役制，1983年列入武警部队至2018年退出，编入综合性消防救援队伍。
问世于1911年、就是清宣统三年个淮海路“红房子”救火会，主楼3层，车库4门；有安报警钟、高8层个瞭望台。当时叫“宝昌路救火会”，淮海路1906年起叫宝昌路，宝昌是法租界公董局个总董。1915年，随路名更改为霞飞路救火会。三十年之后，又随勒临近个嵩山路，改称嵩山路消防区队。1949年5月，区队改中队，属于卢湾区；2011年并进黄浦区。73年来，先后有得近两千名“火焰蓝”勒此地生活战斗。
作者：袁念琪
讲述：王宇洲
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
转自：“海上梦叠”公众号
我知道你在看哟~
联系客服
