爱神花园

巨鹿路675号里是上海作家协会机关个所在地，迭幢洋房最早是上海民国著名实业家刘吉生个私宅。

勒旧上海，刘氏家族个故事常庄拨人家津津乐道。刘氏家族第一代移民刘维忠老早勒勒清朝个后期，就来到上海滩捞世界了，勒租界经营娱乐业，挖到了第一桶金。第二代刘贤喜是招商局轮船公司个买办。到了刘鸿生、刘吉生兄弟两家头么，已经是第三代个代表人物了，伊拉兄弟两家头使得刘家成为当时上海滩浪个豪门望族。

第三代个刘鸿生搭仔刘吉生绝对勿是土包子噢，伊拉两家头勒圣约翰大学读个书，属于新式知识分子。刘吉生廿岁进入商界，由阿哥带出道，曾经做过开滦煤矿售品处经理，中国企业银行常务董事兼总经理，香港火柴厂董事长，培成女子学堂校董等职务，还是大中华火柴公司、上海水泥公司等十几家企业个董事。1924年伊勒法租界巨籁达路（巨鹿路前身）买了一块地，四年后请到匈牙利建筑师邬达克，设计建造了迭幢洋房，送拨伊太太作四十岁生日个礼物。看看叫，人家送一幢楼房来做生日礼物，鸽子蛋（介个房子）么就勿好拿出来卖样啦。

照现在个文化体制，全国各省、直辖市侪有作家协会。但上海作协个建筑搿是顶顶有档次个个。现在迭幢建筑还保持了伊最先头个格局，连室内装饰也尽可能还原，交关家具还是原配个，搿些看得见个样子搭建筑整体邪气协调。《上海文学》个副主编金宇澄搭我透露，仓库里还堆了蛮多老家具，断手断脚呒没人要。我马上接口：啥辰光要处理了，关照我一声，我来拣两件。不过，直到今朝我也呒没等到搿能个好消息。

勿能勿讲一下，花园里个伊座大理石女神雕像，据讲是邬达克勒意大利订制好，送拨刘家个。女神是裸体个，一副美丽个胴体，优美个立勒水池当中央，双手举勒一根飘扬个绸带，高雅又稍微有眼惆怅个面容朝仔天空，好像朝牢世人勒宣示情爱个真谛。

十年动乱个辰光，作家协会费礼文等几位工人作家，候到了一个风高月暗个夜到，迓迓叫个拿迭女神从基座浪搬下来，囥到一个外头人勿晓得个地方，再拨伊逃过粉身碎骨个悲剧发生。海晏河清（直到后首来天下太平）之后，女神再重归原位，领受阳光个沐浴搭新生代作家个礼赞。

搿幢建筑精心展现了欧洲十八世纪巴洛克风格个精髓搭细节，从罗马柱到门楣个装饰，侪无可挑剔。特别是天花板浪个缠枝纹搭卷草纹浮雕顶饰，还有老大一只水晶个枝形吊灯，勒繁复缠绵中勿失简约端庄。

有一趟捷克作家代表团个客人来访，抬头一看一连声个惊叹：搿搭个建筑忒㜺啦！还讲：㑚作家协会忒富有了！

大家晓得捷克迭个东欧国家一向以建筑艺术勒世界浪享有声誉个。波西米亚风格是拨上海个小资们邪气欣赏个。

爱神花园哪能会得成为上海作协个办公楼呢？据说，伊个一年，中国天翻地覆慨而慷，爱神花园投下了戴笠个影子，迭个特务头子搭刘吉生是好朋友，经常来搿搭吃吃咖啡跳跳舞，顺便办点公事，讲勿定地下党老早就铆牢伊了。大军渡江之后，继续一路追赶逃兵，追到上海个战士就牵了十几匹战马来到了花园里向，铺满大理石个客厅就当马棚用了。刘家人看到厅里流了满地个马尿马粪（污），嚇得唻一声勿敢响。最后搿座小洋楼就“回到了人民个怀抱”。

搿些故事勿是我瞎讲，是宇澄兄搭我讲个，宇澄兄也勿是亲眼看到，也是老一辈人讲拨伊听个。我搭伊两家头，侪是勒红旗下长大个，除脱老师教个，还有自家亲口尝过味道个，其他嘛，总归侪是听人家讲个喽。