笑看天下：钱银何必多计较

呢个世界，赖皮塞责讲大话，其实都需要有啲本事，讲得白啲，呃饭食都要有两三道板斧。想做政治家，自然要有政治家嘅风范辩才，要做江湖术士，也要有两招看家本领！

煲呔曾自诩「政治家」，却不学无术，狗噏「民主等同文革论」，已露底有几多料子；如今明明涉「身份危机」、「曾商勾结」。「租住豪宅」单是装修都成千七万港元，丑闻爆不停，坐富豪游艇「自费」区区六百多元，认真系湿湿碎使乜计！

以前啲江湖术士，行走江湖，都要有一技傍身。譬如有客人问：你睇我有冇媳妇呢？相面先生用笔在纸上写六个字：「鳏居不能有妻。」

写完，反向客人问道：「你到底有冇媳妇呢？」客答：有。睇相佬依起棚牙，指住佢写嘅六只字念念有辞：「鳏居不能，你系唔可以鳏居架！」接着往下念：「有妻，你系有媳妇嘅！」客人于是信服佢识睇相，准！高明！

之不过，如果客人话：高人，我冇媳妇噃！睇相佬又用手指住嗰六只字：鳏居呀，你独居！接着又用手指住往下念「不能有妻！我一早睇穿你这人是鳏居啊，不能有媳妇。」

看官，这「鳏居不能有妻」六个字果然妙不可言，说有媳妇也成，说没媳妇也成。今煲呔曾豪游濠江，你话佢「自费游」可以！话佢有富贵朋友请，都得！煲呔曾向来洒脱，既视民望如浮云，自然亦视钱银如垃圾！乜几千万系豪宅咩？

施友朋