上世纪60年代,弄堂里有好几家人家养鸟,阿拉嗰点小朋友也侪想养只小麻雀当宠物。后来看到清朝宫廷画家冷枚个《百子图》里有一个养小麻雀嗰,才晓得嗰也是传统童戏。
初生个小麻雀全身通红,头大颈细,邪气难看,一有动静就张开黄颜色个嘴巴要物事吃。吃饱了就困,要不了多久,羽毛就一眼眼长出来了,好像一只绒球,变得可爱起来。等到翅膀浪个毛长得差勿多了,就要让伊学飞了,轻轻往空中一抛,伊就会张开翅膀扑腾几下。
养了小麻雀,出门寻其他小朋友白相,总要带伊一道去。放喇上衣口袋里,小麻雀也晓得要注意卫生,勿过一旦掏出来,看到亮光,小麻雀往往会拉屎,所以掏嗰辰光要注意。再过些辰光,只要拿伊抛向空中,小麻雀就会飞到手臂浪。嗰辰光是最得意,也是别人最羡慕嗰。
再养下去伊就想要寻找自由了,养喇笼子里不停跳来跳去,侬就忍不住要放伊出来。窗台浪经常放点食物,伊就会带仔一群麻雀来凑热闹,小朋友们则以观察伊拉个神态为乐。
原载《新民晚报》2019年10月6日
联系客服