耕田的人世世窮　

呢個世界可以靠工業發達，可以經營地產發達，更加可以利用金融或投資發達。至於利用農業，恕我老曹孤陋寡聞，似乎未聽過。

我老曹外祖父係地主（此乃1951年母親帶我到香港的部分理由）。聽我老曹母親講，外祖父有八十畝田（如以今時今日美國一英畝田值一千美元計，即只有八萬美元身家，約六十二萬四千港元）。母親從十六歲前從未穿個一件唔破爛的衣服；兄弟姊妹十三個，其中一個養唔大，一個浸死。母親十一歲已開始煮飯畀耕田工人食，所以每天五時已起床（上述習慣，母親過世前仍未改），工人六點便食早飯、七時下田；十一時又要整午餐，由弟妹負責，十二時前送到田裏給工人食；下午四時又再煮飯，以便五時工人回來吃；六時之後洗碗，八時上床睡覺。

外祖父夏天怕雨水少，親自督工叫人踏水車；秋天又怕一場風將農作物毀掉，收成之後又怕落雨冇太陽曬。秋收之後十五天，天天將穀物搬出搬入才曬乾，然後用船運到寧波或上海出售。春、夏、秋忙完，冬天又點？答案係外祖父從城裏買D布回家，一家大細忙於做衣服做鞋（連工人穿的鞋都係自己做），以便新年之時派畀工人，每人一套新衣服及新鞋，幾十套衣服同鞋，便係六姊妹連同外祖母在兩個月內做好。

我母親小時便發誓「唔嫁耕田佬」。來到香港母親認為耕田人世世窮，從小便要我地勤力讀書，佢認為只有將書讀好才能脫貧。新中國成立五十八年，改革開放政策落實二十八年，中國六億五千萬農民又點？上述唔係中國的問題，歐美國家政府向農民提供大量補貼，令其他國家農民富有的並唔多。先進國家政府補貼農民政策，令先進國的農產品向全球低價傾銷，令落後國家的農民生活更差。世上最值得同情係落後國家的農民，佢地付出很多但收穫甚少，我地享受廉價農產品之時，有冇諗過辛勤工作的農夫？至今為止各國對農產品補貼問題仍毫無進展，農產品股有投資價值咩？

〔摘編自2007年4月19日信報財經新聞「眼睛被泡沫淹沒」 一文，作者曹仁超〕