相声VS滑稽戏

北方相声滚滚而来，海派上海从来海纳百川，老大方个喊：来好唻！搿趟个相声来到上海，会勿会像以前搿能介水土勿服，上海人勿欢喜看？我讲，勿会了！

原因有三：第一，辣上海，尽管欢喜“吃咖啡”个人有交交关，但是“吃大蒜”个人已经越来越多。其中新上海人当中勿少人是相声个拥趸，还有勿少普通话讲得比上海话溜个本地青少年，也会去听。第二，搿趟来个相声，多数是年轻人表演自家新创作个相声，演出青年人个生活，用青年人个词汇演绎青年人个情调趣味。第三，其表演手法倒是吸取了上海滑稽独脚戏个演说手法，或者讲由于都市化个加深，已经改变了相声个一点表演手法，自然个更接近了上海滑稽戏。

其实上海滑稽戏个创始人王无能、江笑笑、刘春山最出风头个辰光也是青年人。流行歌曲也好，戏曲也好，最火爆个地方侪辣年轻人个场子里。戏剧个老化，就是一班老人侪辣唱老戏。《噱占上海滩》噱是噱，不过侪噱辣一个甲子前个上海滩。

上海话电视剧《孽债》辣辣90年代初，竟然热得万人空巷。因为《孽债》演个是当年大家关心个事体。假使再辣现在拿出来放，就未必有介许多青年人会来看上海话版而勿去看普通话版。因为辣辣搿个20年里，青少年对上海话陌生了，对陌生个物事就会失去感情，上海青年自家辣演出个，也不是滑稽戏而是相声。伊拉讲讲上海话必得带上几个普通话发音个词语，交关上海话里个生动个、特别使人感动个特色词语，辣辣伊拉个结结绷绷个上海话里侪消失了，叫伊拉哪能会排出最需要语言圆熟、当场即兴出彩个独脚戏呢？葛咾伊拉有点人也去搞相声了。

搿个就叫皮之不存，毛将焉附！所以阿拉只好看周立波、小百搭个精彩表演。

越是失去年轻演员，越是勿会表演年轻人个生活，就会越是失去观众，跟辣海就是呒没人来写好剧本，赚勿着钞票啥人来写剧本？恶性循环。

所以，滑稽戏要真正后继有人，兴旺起来，一定要辣幼儿园、中小学里向，使上海话传承好，搿能再会有滑稽戏、沪剧个未来。滑稽戏是搿能，其他海派文化也是如此。