阿拉老底子每天呈送精彩文章一组
打开尘封的记忆，寻觅往昔的岁月
叙老底子事 忆老底子人
诉老底子情
来源：大上海小龙弄
作者：马尚龙
沪语改写、讲述：边秦翌
文字、语音审核：丁迪蒙
编辑：王乙其
上海有几百万宁波移民个后代，大多数以身为宁波人为荣，必过，伊拉并勿晓得，淮海东路浪个四明公所是必须要去看看个；虽然伊拉个祖上，一百多年前头老有可能是经由四明公所，踏进大上海个。
淮海东路，也就是西藏路以东个淮海路浪，有幢大楼，叫“东淮海国际大厦”，门牌号是淮海东路45号—49号。迭只号头，晓得伊个分量个人估计勿会多。此地曾经是四明公所个位置，还有堂皇个门楼，是第一代宁波移民勒上海个集散地，后首来，公所拆脱，门楼平移23米，从淮海东路45号落到了人民路。从此，淮海东路个旧称——宁波路路名个出处，也就没痕迹了。因为四明公所，也叫宁波会馆。
上海曾经有得两条宁波路，除脱上头讲到个，还有一条勒浙江中路搭福建中路之间，现在还勒海。搿条宁波路甬人云集，钱庄银行林立，曾经有得“中国华尔街”之誉。
两条宁波路，相距勿到两公里，侪是宁波人个天下。
比起有铜钿个宁波路，四明公所所在个宁波路更加传奇曲折，更加有得宁波移民个气息。
四明公所始建于1797年，是旅沪宁波籍人士个会馆兼公坟。为啥叫四明呢，因为宁波有四明山。老一代宁波人也有称自家是四明山人个。
四明公所有老了勿起个历史作用，包括后来宁波路个开通，故事勿勿少少，网络浪有交关版本，此地暂时勿讲。
我也是到了一把年纪个辰光，再想起来小辰光常庄听长辈讲起过四明公所，讲起过宁波同乡会，但是从来呒没勒勒心里“存盘”过。近抢把，特为到淮海东路去兜一圈，看到了淮海东路搿幢大楼，开始辰光还呒没反应过来，等看到了45号，再拿脚步停下来了。隔条西藏路，淮海东路搭中路完全勿一样，东路勿是商业街，少了梧桐个气象搭仔闹猛。
沿牢仔十几级花岗岩台阶走上去，想看看叫“东淮海国际大厦”落地大标牌浪是否还有四明公所门楼遗址个记录，呒没看到。必须兜到大厦背面人民路个四明公所门楼遗址，再可以看到载有来龙去脉个铭牌。
（注：四明公所董事会）
四明公所勿单有历史地位，也代表了宁波人勒上海个作用搭仔影响力。当时，公所是宁波移民个落脚点，是到上海学生意个始发站，也是伊些过世者个魂归之处。正是四明公所一代宁波先贤，有眼光，有魄力，有本事，有气节，再有后来宁波人勒上海个风起云涌，再有后来宁波移民勒上海个继往开来，交交关关到上海学生意，并且终老一生、寂寂无名个老小宁波，造就了上海做派个一部分。
宁波籍上海人，只要讲起宁波就邪气兴奋骄傲，而且特别有得宁波人个优越感，但是，第一代宁波移民初到上海个艰难困苦，老少有人想象到，也老少人想象到第一代宁波移民视四明公所为自家生老病死个有依之地。
我对四明公所理所当然有得更加多个恭敬。我是宁波人，我长期工作个上海作家协会笡对过是四明邨弄堂。几十年了，常庄从四明邨弄堂里穿过，从巨鹿路走到延安路。搿条弄堂个有名，晓得是包括泰戈尔在内勿少有名人物勒此地住过个蛮多，但是四明邨搭四明公所有血缘关系，就老少有人想到。四明邨是四明银行为银行高级职员配备个寓所，四明邨个得名也是宁波四明山，搭四明公所是同宗。
四明山还有游击队，战功老大，是南方七大游击战区之一，有好几部文学影视作品表现过。四明山游击队取名缘由，我勿敢贸然猜想，宁波一带山勿少，但是毫无疑问四明山是最有代表性，也是最有威慑性个。
想起来，小辰光听老宁波讲“宁波人头顶四明山”，我错误理解为宁波人生活勒四明山个山脚下头。后来，有了延展认识：四明山是宁波人个吉祥山，四明山也是宁波人个一块匾额，勿好做坍台个事体个。
勒勒淮海东路45号前立勒勿少辰光，勿禁又浮想联翩。假使讲，廿多年前四明公所门楼只是移位而勿是拆脱，或者四明公所个门楼勿移位也勿拆脱，而是搭现在个大楼融为一体，并且取名为四明国际大厦，即使是叫四明大厦，也是邪气有意义个。
作者：马尚龙
讲述：边秦翌
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
来源：“海上梦叠”公众号
联系客服
