作者:吴翼民
沪语改写、讲述:牛美华
文字、语音审核:丁迪蒙
编辑:王乙其
老欢喜听上海说唱《金铃塔》个沪语绕口令,特别是讲“天浪七粒星”,最嗲。伊个绕口令是搿能唱个:
“天浪七粒星,树浪七只鹰,墙浪七根钉,台浪七盏灯,地浪七块冰……”而后头唱个,是“天浪乌云遮没天浪七粒个星,噢嘘,赶脱树浪七只鹰,叮当,拔脱墙浪七根钉,扑脱,吹脱台浪七盏灯,叽叽骨骨,踏碎河里七块冰”。再后头就是颠来倒去个念“星鹰钉灯冰”,像滚珠落玉一样个流畅,搿段沪语绕口令可以讲是最经典个。
笔者欢喜模仿,尝试去念唱过,只是常庄会得出洋相、闹眼笑话出来,比方,会得张冠李戴成“树浪七根钉,墙浪七只鹰”,弄成功钉上了树,鹰上了墙,真是邪气有趣个。
其实,我看到过“树浪七根钉”个样子个。
屋里勒体育场隔壁,我每日天侪会得到体育场去锻炼身体,看到过有人勒老多棵邪气粗个悬铃木浪敲洋钉,用来挂锻炼辰光脱下来外套……搿辰光,我会得跑上去一步劝伊拉:“树干浪挂衣裳其实是勿卫生个,当心有得蚂蚁钻到领头里去,有辰光小虫子还会得勒衣裳浪产卵个……”看到正勒往树干浪敲洋钉个,我也会得上去讲一声:“哎呀,勒树浪敲洋钉,侬没听到树也勒喊痛?”当然咾,有眼人是勿肯听劝告个,回应是朝我翻只白眼。
随牢仔时光个流逝,体育场个勿文明现象一点点减少了,更加让人欣喜个是,有关部门可能觉着了,介大只体育场,要让来锻炼个人有得挂衣物个地方,否则是交关勿便当个。有个冷天个早浪,我突然发现,体育场一大排铁丝网栅栏浪,明晃晃装勒一排挂钩了。从搿辰光开始,伊些来锻炼个人再也用勿着往树干浪敲洋钉了,伊拉自然而然拿随身所带个包、还有脱下个衣裳挂到了挂钩浪,整整齐齐,蛮好看个。
——妙哉,沪语绕口令还会读成“树浪七根钉”伐?
作者:吴翼民
讲述:牛美华
丁迪蒙
迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。
丁迪蒙所撰写的,与沪语相关的著作主要有:
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
联系客服