作者:周云海
沪语改写:朱枫
讲述:王邦基
文字、语音审定:丁迪蒙
编辑:王乙其
儿子今朝勿转来吃夜饭。
天热,勿想围牢仔灶披间转,又赖得出去吃,老婆讲两家头就下点面条吃吃。我讲好个呀。突然就想念起烂糊面来了。乃末搭老婆讲,我要吃烂糊面,勿要烫个,要吃温热个。烂糊面勿是啥上等个面食,老婆笑我老了怪了。
是个,烂糊面勿是啥稀奇勿煞个物事。所谓烂糊面,其实是菜汤面做好后焐得辰光长了,面条拨汤水浸泡得没了可以拨筷子高高挑起个挺俏模样,变成功了糊搭搭个面食。烂糊面盛勒碗里基本浪是半汤半糊个样子,有些稠糊,面条却又根根清晰、菜叶子片片青绿。迭能介个烂糊面,最好是勒温热个辰光吃。好用筷子、也好用调羹舀仔吃,可以勿讲究吃相,用嘴巴贴牢搪瓷碗个边稀里哗啦像吃粥一样吃。一大搪瓷碗温热个烂糊面,菜软咚咚个、面烂沰沰个,几乎用勿着嚼,年轻人一记头吃光,用勿着一分钟辰光,一大碗烂糊面撑勿饱一个大男人个胃,往往还会得添一碗吃。老年人也欢喜搿排滑溜溜个软食。
烂糊面吃光个感觉是:肚皮里饱鼓鼓、心里爽歪歪、嘴巴里滑溜溜,下趟还想吃。
勒我伲青少年辰光,社会浪向食物匮乏,一日三顿,温饱而已,呒啥挑选个余地,将就将就吃啥侪香。对烂糊面个美好印象,让我想念烂糊面、我想重温昔日个口福。
可惜,我已经吃勿着真正个、让我怀念个烂糊面了。 并不勿是我对烂糊面挑剔了,而是老婆笃好个烂糊面,根本勿是我记忆当中个烂糊面。也勿是老婆勿会烧烂糊面,而是现在个面条笃勿烂、摆勒海也勿会糊。一大碗所谓个烂糊面,摆个辰光老老长了,面也冷脱了,但是,用筷子插到碗里撩串面,拿伊高高个挑起,面条仍旧是一根根硬挢挢个,根本就勿是我想象当中个烂糊面!
老婆讲,伊买个是正规厂家生产个面制品啊。奇了怪了,现在面条个质量哪能介好啦?是增加了和面辰光?联想起现在市场浪供应个又韧又有弹性个、烧勿烂个山芋粉丝,阿会是现在面条制作,也像山芋线粉一样,掺进了政府还呒没有明令禁止个配料?
老底子勒农场做知青,我伲是常庄吃山芋线粉个。伊歇辰光农场连队食堂里个红烧山芋线粉,烧个辰光摆眼酱油,稍为翻炒,用勿着镬铲勒铁镬子里切断,烧熟盛到碗里自然就是手节头长短。食堂炊事员用勺子拿山芋线粉舀到我伲搪瓷饭盆里辰光,粉丝一根根粗粗壮壮个,吃到嘴巴里软咚咚、滑笃笃,咸塔塔、鲜咪咪,一筷子一大口,要省勒海吃个,否则线粉吃光了,饭还剩一大碗,乃就要吃白饭了。埃歇横里山芋线粉哪能有现在搿能个有韧性、有嚼劲?是山芋线粉个质量变好了?勿是个。侬看烧熟之后个山芋,酥酥软软个,根本勿像熟土豆伊能介挺括!现在个山芋线粉搿能烧勿烂、有韧性,伊个生产制作过程,想想就会明白是加进了其他配料。
汤面勿会糊,山芋线粉烧勿烂。现在人们对交关食品安全缺乏信任感。迭能介个面条、山芋线粉,吃勒嘴巴里,肚皮里怀疑。明朝,我伲还敢放心吃啥个食品呢?民以食为天。对于我以及像我一样个芸芸众生,我伲个社会应该哪能让人们重建对食品安全个信任?而勿是放任生产商、供应商随便起只“生态食品”“绿色食品”个名字并让伊拉泛滥!
作者:周云海
讲述:王邦基
丁迪蒙
迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。
丁迪蒙所撰写的,与沪语相关的著作主要有:
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》,少年儿童出版社
《囡囡学成语》,少年儿童出版社
联系客服