来源：more 城读
原创：董鸣亭
沪语改写：史素瑛
诵读：姚琳
审阅、推荐：丁迪蒙
编辑：王乙其
引子
上海是个移民城市，我个父辈就是从浙江宁波过来个，只不过是我邪气荣幸个生勒上海，从小生活了上海，亲眼看到搭仔听到了上海个发展搭仔演变个过程。
更加幸运个是因为工作关系，我了解到上海个近代发展史，伊是由本土个居民、本国个移民搭仔外来民族个共同开发，再有了今朝上海迭个国际大都市。
但是，我勿能理解，现在个上海人为啥讲上海闲话会得介难呢？为啥上海人勒讲上海闲话个辰光，会得拨误解成为是种排外个现象呢？甚至，勒一场上海人个传统独脚戏演出当中，拨一眼听勿懂上海闲话个外来人员哇啦哇啦叫：请用普通闲话讲！
搿真是让人哭笑勿得。
伊听不懂上海话
有趟，我到楼下头邻居屋里去处理点事情，刚好是吃夜饭辰光，看见一家门围牢吃饭台子，大人让小囡叫我“奶奶”。
我就用上海话搭小囡讲道：侬吃啥？侬今朝乖伐？小囡搭伊妈妈讲：“奶奶在讲什么？我听不懂。”我吓了一大跳，啥？上海小囡居然听勿懂我个上海闲话？邻居就讲：为了让伊从小勒幼儿园学习得更加好，阿拉一直搭伊讲普通闲话个。
喔哟喂，真是急煞人个事体，上海小囡也侪勿会讲上海闲话、听勿懂上海闲话了，葛末，再过廿多年，随牢仔搿个小囡长大，结婚生子女，伊个小囡也就理所当然勿会讲上海闲话了，上海闲话就呒没了，上海个文化也就消失了。
普通闲话搭仔上海闲话，勒上海搿座城市里，就好比是一个人个左右手，假使讲普通闲话是左手，葛上海闲话就是右手，啥也缺勿了。也有可能上海闲话勒某种场合下头比普通闲话更加有得亲和力。
上海闲话是上海个一种文化，伊是经过一百多年个演变再进化到现在个搿种“阿拉”“吃力勿讨好”“买汏烧”“屋里向”“瘪三”等上海闲话个。
融入上海
想当年，我个父母亲也是廿多岁从宁波到上海来个，伊拉来上海个辰光，有一口浓重个家乡闲话，直到现在，阿拉个口音里也带点宁波口音，但是，搿一点也勿妨碍搭别人交流，父母亲老快就加入上海人个行列，伊拉勒工作岗位浪搭来自五湖四海个人交朋友，一道工作。当时还呒没推广普通闲话，大家侪用上海闲话交流个。同时，还带勒自家个家乡口音，假使现在再来听听伊些老一辈个上海闲话，远远叫比周柏春、姚慕双个滑稽戏里向讲到个上海方言来得生动可爱，任何个文学作品侪是来源于生活，高于生活个。
每个地方侪有伊个文化属性，再形成了中国灿烂个文化。
好几趟我到饭店去吃饭，一台子坐个侪是上海人，阿拉拿好仔菜谱叽哩咕噜个讲小菜名字，然后，用普通闲话叫：“小姐，点菜。”伊个拨叫小姐个来了，阿拉就用标准个普通闲话搭伊讲阿拉要个菜。
想一想，一个外来人员，侬到上海是来工作个，却勿学上海个语言，搿对侬是一种损失，普通闲话也要讲，但阿拉每个人勿是播音员，也勿是演员，阿拉是生活勒上海个人，是吃黄浦江个水生活个人，上海闲话是阿拉个地方语言，是阿拉个母语。
诵读：姚琳
——————————————————
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
联系客服
