《冬天》

父亲节、沪语诵读会

缘由：

沪语，汇集了江南文化的语言精华，流淌着上海文化的血脉，积淀着上海文化的全部基因。很难想像，一个不再说上海话的上海，还有哪些地方有海派特色，不再说上海话的上海人，将怎样从文化角度，来诠释自己的身分。

但是，目前年龄在80岁以下的上海人早已形成用通用语思维，写作，早已不知沪语可以用来朗读、表述观点。看来，要保护、传承沪语，光靠口口相传已然不够。只有让高雅的文学语言参与进来，才能留住上海文化的根。

领队：丁迪蒙

原上海大学中文系语言学教师。国家级普通话水平测试员，二十多年来，一直致力于沪语的传播和传承。出版过多本上海话方面的书籍。有公众号《海上梦叠》》《启迪心田沪语》，每天发表各类沪语朗读文章。

活动名称：怀念父亲

以父亲节为主题，寻找了十六篇纪念父亲的文章，用上海话演绎出来。让听者感受与普通话语音不同的、具有海派文化风情的沪语朗读，真真切切沉浸在沪语的朗读魅力里。

参与者：

沪语朗读爱好者十五人。前来聆听、观摩者若干。

作者：朱自清

朗读：张秉娟

语音审核、推荐：丁迪蒙

编辑：王乙其

各位老师，大家好！

今朝是父亲节，对我来讲，是第一个父亲勒勒天浪个父亲节，刚刚听了介许多老师个诵读，我更加想念父亲了！感谢丁老师组织迭能一个“父爱如山，’沪’侬一生”个“父亲节沪语诵读会”活动，让我可以用迭能特别个方式歌颂父爱，表达思念。

我选了朱自清先生个《冬天》来朗读，我欢喜伊用淡淡个笔触来描写浓浓个亲情友情，我也希望用我个朗读，感恩父母，伊拉同样拨了我一个温馨有爱，守护了我一辈子个港湾！

《冬天》 朱自清

讲起冬天，突然想到豆腐。是用一只小钢宗镬子烧个白水豆腐，热气腾腾个。水勒海滚，像交关鱼眼睛，一小块豆腐养勒里向，又嫩又滑，像反着个白颜色个狐皮大衣。

镬子勒勒“洋风炉”浪，搭洋风炉一道，侪拨熏得乌漆墨黑，更加显出豆腐个白来了。埃个是夜里，房子老了，虽然点仔个'洋油灯'，还是蛮暗个。围牢台子坐个是父亲，搭我伲弟兄两家头。

'洋风炉'忒高了，父亲只好常常立起来，微微个抬起头，眯起仔眼睛，从蒙蒙个热气里伸进筷子，搛起豆腐，一块一块个搛勒我伲个酱油碟子里。我伲有辰光也会得自己动手，但是炉子实在忒高了，大多数个辰光还是吃现成个。搿个并勿是真正个吃饭，只是弄弄白相相。父亲讲夜里冷，吃仔末大家暖热点。我伲侪欢喜搿种白水豆腐，一摆勒台子浪，大家个眼睛就侪盯牢仔搿只镬子，等牢伊冒出热气来，等牢仔热气里向从父亲个筷子浪向搛过来个豆腐。

又是一个冬天，记得是阴历十一月十六个夜里。搭S君P君勒西湖里向坐小船，S君刚刚到杭州教书，事先伊来信讲：“我伲要游西湖，勿管伊是勿是冬天。”埃日夜里个月色，真好；现在想起来还像煞照勒身浪一样。本来前一日夜里是“月当头”。也许十一月个月亮真个有眼特别，埃个辰光九点多了，湖浪向好像只有我伲一只船，有一眼眼风，月光照勒软悠悠个水波浪向；当中搿个一串反光，像刚刚抛过光个银子。湖浪个山，只看得见淡淡个影子。山下头偶尔有一两星灯火。S君脱口读出了两句诗：“数星灯火认渔村，淡墨轻描远黛痕。”我伲侪勿大讲闲话，只有均匀个划船个声音。慢慢叫我快要睏着了，P君“喂”了一声，我睁开眼睛，看见伊勒勒微微个笑。船夫问我伲要不要到岸浪个净寺去，埃日天是阿弥陀佛个生日，交关闹猛。到了庙里向，大殿浪灯烛辉煌，侪是佛婆念佛个声音。好像醒了一场梦。迭个已经是十几年前头个事体了，S君还常常搭我通信；P君呢，听说调动了好几趟，前年是勒一个特税局里收特税，后首来就呒没有消息了。

勒台州过了一个冬天，一家门四个人。台州是个山城，可以讲勒一个大山谷里，只有一条两里长个大马路，别的路浪日里简直看勿见人；夜到呢，墨黜黑一片，难板有人家个窗门里透出一眼眼灯光，还有走路个人拿仔个火把，但是埃个也是老少老少个。我伲住勒山脚下。

有个是山浪向松林里个风声，搭仔天浪向一两只个鸟个身影。我伲是夏末到埃面个，春初就离开了，但是好像一直勒勒过冬天一样；不过，就算是真个冬天，也并勿冷。我伲住勒楼上，书房沿牢马路；路浪有人讲闲话，我伲可以听得清清爽爽。不过因为走个人忒少了，有一眼眼讲闲话个声音，听起来就像是风远远叫送过来个，呒没想到啊，就勒勒窗门外头。

我伲是外地人，除脱到学堂里去之外，常庄只是蹲勒屋里。妻子也习惯了搿种恹气，只搭我伲爷三家头守勒一道。

外头，虽然老是冬天；屋里，却老是春天。有一趟我出去，回来个辰光，楼下厨房间个大方窗开勒海，伊拉娘三家头呢，并排并个坐勒海； 只只面孔侪带仔天真个微笑看牢我。好像台州空空个，只有我伲四家头；天地空空个，也只有我伲四家头。埃个辰光是民国十年，妻子刚刚从屋里出来，浑身个自在。现在伊走脱快四年了，我却还老是记得伊埃个微笑个样子。无论天哪能冷，大风大雪，想到伊拉，我个心里总归是邪气温暖……

谢谢！