作者:戴耘
沪语改写:朱枫
讲述:王邦基
文字、语音审核:丁迪蒙
编辑:王乙其
往期回顾:《上海寻根》一
我搭两个阿姐从小就跟牢仔舅公搭姑婆住勒丰乐里同一只屋檐下头。舅公姑婆活勒海辰光,我伲一直习惯叫姑婆“大太太”。余庆坊婆婆听到了,就会得勿开心,㑚大太太长,大太太短,勿就是讲伊“大”我“小”么。
原来,我伲叫了一辈子个“大太太”,其实是更受舅公宠爱个小妾!拿大小颠倒,即使摆到今朝,也是勿作兴个。后来证明,余庆坊婆婆搿种勿满个背后头,实际浪是余庆坊一家门搭我姑婆老深个利益冲突。
一世情缘
姑婆小名爱娥,大名戴季清,是当时富商戴晓峰(我曾祖父)个小囡儿,伊上头有三个阿哥,其中二阿哥就是我爷爷。爱娥勒二阿哥二阿嫂屋里认得了我个舅公(二阿嫂个阿弟),二十世纪初,内陆富人家族之间个联姻并勿少见(包括我爷爷搭奶奶),大多数是父母作主。而姑婆搭舅公通过我爷爷奶奶个关系,从认得到秘密约会,自然有所勿同。
我舅公年轻辰光长得老登样个,聪明过人,熟谙诗文,字也写得好。两家头是郎才女貌,两情相悦。后首来舅公哪能就讨了南京个表阿妹,有勿同个讲法。
一种讲法是一场大火烧脱了张家个红木家具店(厂),导致联姻失败,但是,迭个说法并勿成立。搿场大火让张家损失是大个,但戴家仍旧上门到张家去提亲,于是就有张家搭戴家个联姻(也就是我爷爷奶奶个婚姻)。既然戴家有搿份诚意,后来就勿会因为张家个衰败而发生戴家拒绝张家公子讨戴家小囡儿个事体。
我爷私下头搭我讲出了其中原委。
当年戴家个“三太太”(老三个老婆)是个茄人头,常庄安排舅公搭姑婆勒老三屋里“私会”,最后偷吃禁果,呒没结婚肚皮先大了。老爷戴晓峰晓得后火冒三丈,但也呒啥办法,生米烧成熟饭,为了遮掩家丑,暗地里请仔医生到屋里为囡儿打胎,因为当时乡下郎中医术勿高,造成戴家小姐终身不育。搿桩事体大约摸发生勒1922-23年,当时戴家小姐不过十七八岁。张家公子也只好回南京老家,父母作主讨了南京个表阿妹。
再讲东台当地有家姓翟个大户人家有个儿子勒上海。翟家公子留学法国,懂三国外语,勒上海徐家汇个中华书局做翻译。翟公子回乡探亲看中了戴家个小囡儿(也就是我姑婆),大概勒姑婆二十出头个岁数(1925-1927年间),姑婆跟牢仔伊到了上海,住勒徐家汇华山路转角角子个孝友里65号(九十年代改革开放拨拆脱了,造了“太平洋百货”)。后来两家头又先后住过雷上达路(现在个兴国路)李家宅搭沪西“大自鸣钟”(“曹家渡”一带)。
图一、一百年前个上海外滩
图二、民国时期个上海徐家汇商业街
图三、九十年代改造后个徐家汇(太平洋百货个所在地旧址是“孝友里”居民小区)
翟家公子从小生活条件好,虽然留过洋,吃过洋墨水,做过翻译、编辑,教过法语,但因染上了鸦片烟瘾,不能自拔,拨中华书局辞退,成了一个上海滩个混混。爱娥经济浪依靠翟氏,也呒没啥办法。
图四、徐家汇天主教堂,1910年建成开放。姑婆个丈夫翟氏二三十年代曾勒附近帮助以后留法个进步青年补习法语
抗战辰光,翟氏离开了上海。伊曾勒芜湖搭戴家老三戴履之见过一面。经历了战乱后个翟氏,曾经打算洗心革面,重新做人,回到上海来寻爱娥(姑婆),搿歇再发现,1945年抗战胜利后,任银行襄理个张亚南从无锡转到上海工作,又搭戴家小姐重续旧好,已经结为夫妻,定居四川北路丰乐里。从此,翟家公子离开上海,一去不返。伊个去向搭结局呒没人晓得。
上海托孤
姑婆跟仔翟公子新到上海,还有另一个重要机缘,搿就是戴家个衰败。
前头讲了,创业发仔财个戴家老爷戴晓峰有三个儿子一个囡儿,我爷爷排行老二,姑婆最小。随牢仔大儿子搭二儿子先后成家,迭个一家人家,包括佣人、厨师,有廿几个人吃饭,曾经是镇浪向个大户。但是1924年横里,倒霉个事体接牢仔来了。开始是大儿子戴乐山个老婆突然染上“霍乱”,呒没几化辰光就跑脱了。伊个一年,伊拉个囡儿戴逸兰五岁,儿子戴传忠三岁,小阿妹“和喜”两岁。
根据当地风俗,人死脱棺材要摆勒屋里祭祀三年后再好下葬。第一口棺材只摆了几个号头,戴家老太太(戴晓峰个老婆吕氏)生毛病死脱。一年多后,老二个老婆(也就是我奶奶,张家三小姐)因长期“肺痨”也跑脱。戴家个厅堂里,有一年同时摆勒海三口棺材!
好像迭能介个灾难还勿够,大儿子戴乐山家年仅两岁个小囡儿和喜,二儿子(我爷爷)屋里还勒学步个小儿子也先后夭折,戴家三年当中(约1924-1926年间)大人小囡死脱五个人。曾经兴旺一时个戴家几乎遭受灭顶之灾。
葛咾,年仅七岁个戴逸兰就跟仔姑母来到上海。是姑婆搭翟公子结婚后直接拿大阿哥个囡儿戴逸兰带到上海,还是之后戴家老大戴乐山拿囡儿送到上海,已经无从考证。但有一点是肯定个。大阿哥戴乐山觉着囡儿跟伊阿妹勒上海生活,比留勒当地,更会有条活路。
戴家老大个囡儿戴逸兰,小名“凤喜”(所以后来同辈侪叫伊“凤姐”)。逸兰是老大戴乐山搭老婆祝氏(杭州人)个囡儿,1919年生,五岁娘死脱,7岁横里拔带到上海由姑母(即我个姑婆)抚养。按照迭个辰光计算,姑婆是1926年前后跟牢仔翟氏到了上海,当时辰光21岁。逸兰从小由姑母抚养,勒徐家汇孝友里长大成人,葛咾伊拿姑母当作母亲,后来伊个小囡侪叫我姑婆“外婆”。解放后定居常州个逸兰,对姑婆晚年个生活一直照顾。
三十年代,戴家老大戴乐山还几次带仔儿子戴传忠到上海去看望阿妹爱娥(姑婆)搭囡儿凤喜(戴逸兰)。当时翟素新搭姑婆已经从徐家汇个孝友里搬到了雷上达路(现在个兴国路)李家宅。从此以后,戴乐山就搭伊个阿妹(我姑婆)以及囡儿凤喜永远失联,呒没了音讯。一种讲法是伊死勒勒南京街头,因为听说伊后首来一直勒南京下关个一家小旅馆里当会计。
图五、兴国路、武康路、淮海路三路交界处个武康大楼,民国期间法租界个“诺曼底公寓”,1924年建成,是当年交关名导演名演员个住处(像郑君里,赵丹,秦怡,孙道临搭王文娟)。
讲述:王邦基
丁迪蒙
迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。
丁迪蒙所撰写的,与沪语相关的著作主要有:
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》,少年儿童出版社
《囡囡学成语》,少年儿童出版社
联系客服