作者：戴耘
沪语改写：朱枫
讲述：胡芷苓
文字、语音审核：丁迪蒙
编辑：王乙其
小序
电视剧《繁花》不免勾起长期勒海外个我对故土个怀念。特别是电视剧里个“虹口小汪”就勒我从小居住个四川北路浪，勿由得让我想写一写记忆当中个上海往事，权且称之为“上海寻根”。
“上海寻根”有双重意义。第一层意思，我1991年离开上海到美国去，暂且拿之前勒上海个生活称为我个前半生，之后美国个生活称为后半生，各三十多年。所以，上海寻根，寻个是我前半生个根。
第二层意思，我爷娘侪勿是勒上海出生个，所以伊拉是第一代上海移民。呒没伊拉到上海讨生活，也就勿会有我。葛咾，上海寻根，是伊拉寻自家个“码头”，石库门里弄迭块栖息地让伊拉能够做窠，养儿育女。
我个同学、文化学者朱大可讲，电视剧《繁花》唤起个是一只“上海梦“。《繁花》小说作者金宇澄讲，上海人有自家个活法，勿管有啥劫难，灾变，等恢复了常态，伊拉还会回到自家欢喜个方式。迭个梦是啥？迭个“活法”是啥？我想通过我父辈个经历搭我早期个石库门生活寻着一只答案。
我个“上海寻根”是一段家族史。从《史记》以来，中国个历史向来是改朝换代史，帝王将相史。历史学家葛兆光认为迭个是一种错误史观。每个人个家族史侪具有历史价值，搿能介，我伲小老百姓再勿会永远是“沉默个大多数”，拨历史轻易忘记脱，就像从来呒没来过迭个世界。我个“寻根”冲动，也源于搭金宇澄同样个留下历史记忆个愿望。
上海寻根之一：我个舅公
舅公姓张，是我爷个亲舅舅。舅公1973年去世，已经半个世纪了。我爷廿二三岁从乡下到上海学生意，投靠个就是我舅公；呒没伊，我爷勿可能会到上海。搿能，我搭上海就勿会有交集，更准确个讲，迭个世界根本就勿会有我迭个人。
四川北路个石库门生态
我勒四川北路溧阳路口个丰乐里住了三十多年。据我父亲讲，房子是舅公当年用几根金条买个。丰乐里建勒勒1916年，一个由108个两层楼独立单元构成个石库门居民区，建筑风格是江南民居搭英式联排屋个混搭，勒美国叫town house。夹勒两排平行联排屋之间个是狭窄个“小弄堂”。走出小弄堂，就是所有居民外出必经个大弄堂。
我屋里老宅就勒搿条小弄堂里。搿能介个弄堂口原来侪有铁门，1958年“大跃进”大炼钢铁，铁门侪拆脱了，厾进了熔化炉炼钢“赶英超美”，最后成了一堆铁渣。
四川北路勒上海个地理位置搭人群分布比较特殊。
四川北路朝南，跨过四川路桥到了苏州河另外一侧，是四川中路，再跨几条马路就到了南京路，当年个跑马场就勒现在个人民广场区域。南京路往西一直走就到了静安寺，然后左转弯走常熟路华山路，就进入了拥有大片洋房个“上只角”，也就是当年个法租界，今朝个“巨富长”网红打卡地。
四川北路朝北，到虹口公园（现鲁迅公园）就是笃底了。再往东北方向走，就是杨浦区，伊面因为当年有大量“棚户区”，是穷人聚集个区域，拨称为上海个“下只角”。所以《繁花》里个“虹口小汪”，而勿是“杨浦小汪”或“闸北小汪”，就容易理解了。勒上海居住区“鄙视链”里，虹口区是个比上勿足比下有余个地方。生活个地区代表伊拉个身份，即使是文革时期，迭个“鄙视链”仍旧存在。
丰乐里隔壁个永安里，建成于1925年，是当年大名鼎鼎个南京路四大百货公司之一永安公司个职工宿舍。虹口区也有勿少“洋房”，比方讲我屋里附近个溧阳路山阴路。我伲个弄堂里有好几家是“资本家“、“资方代理人”，但像荣毅仁或者永安公司老板伊能个大亨是勿可能住勒四川北路个。
搿能介，也好理解为啥文学社“太阳社”（1927-1929）就设勒我伲弄堂里，为啥《良友》画报也诞生勒四川北路（1926年），为啥当年个作家群，像鲁迅、茅盾、巴金、丁玲，柔石，侪住勒四川北路一带（有一种讲法，萧红为了搭屋里住勒景云里个鲁迅住得近一眼，曾经住过丰乐里）。鲁迅个日本朋友内山完造个内山书店（1929-1945）就设勒四川北路山阴路口。施蛰存开个书店也勒伊个一带。
四川北路1999弄（丰乐里）32号，左翼文学社“太阳社”旧址（1927-1929）
讲述：胡芷苓
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
联系客服
