讲到香港电影嘅代表作，你可能会谂起好似《无间道》呢啲箭弩拔张、刺激紧张嘅警匪片；
又或者系《胭脂扣》呢种缠绵悱恻、唏嘘伤感嘅文艺爱情片。
而香港嘅青春纯爱片，你又数得出几多部？
既然听日就周末，今日我就推荐几部香港青春纯爱片，畀你哋周末放松时候睇下啦！
秋天的童话（1987年）
豆瓣评分：8.4
剧情：李琪为男朋友而去外国留学，结果发现男朋友早就移情别恋，人生路不熟嘅李琪唯有投靠亲戚船头尺，船头尺嘅鼓励同陪伴李琪重新振作，两人慢慢产生情愫……
一部直接将童话爱情演到同真实生活一样嘅纯爱片！每次返睇都可以发现入边好多巧妙嘅细节！当然啦，其中有唔少经典对白——
最后欣赏下红姑同Danny嘅盛世美颜！！！
新不了情（1993年）
豆瓣评分：8.3
剧情：一个怀才不遇嘅音乐才子同一个身患绝症嘅少女嘅爱情故事，可惜才子重新振作，事业重遇曙光，但系病魔带走咗少女嘅生命。
虽然剧情好韩剧，不过胜在靓靓长相同演技都灵气十足，前期嘅开朗乐天，同后期嘅痛苦悲情衔接无痕！
如果你连住《金枝玉叶》一齐睇，你会觉得两部片设定好似，刘嘉玲条仔都系搞音乐，都被移情中意靓靓！最重要嘅系，靓靓先后凭呢两部戏攞两次金像奖！
九个女仔一只鬼 （2002年）
豆瓣评分：6.2
剧情：一个高富帅死咗之后失忆，变成一只寄居喺汽车嘅游魂野鬼，遇到一群活泼嘅靓女中学生，双方相互帮助同时男女主角拍下拖嘅故事。
好多90后嘅青春回忆，怀念当年未学习摄影嘅Edison！
早熟（2005年）
豆瓣评分：6.6
一对未成年情侣偷食禁果而怀孕，牵起一贫一富两个家庭之间嘅战争，牵涉出早恋、家庭教育、个人成长等一系列思考。
剧情略平庸而单薄，薛凯琪同房祖名嘅演技有啲不温不火，不过睇黄秋生、余安安、曾志伟、毛舜筠饰演嘅两对父母就够啦，几场矛盾冲突戏都表现得好好。
很想和你在一起 （2009年）
豆瓣评分：7.4
剧情：一对欢喜冤家因为各种阴差阳错而错失缘分，重遇嘅时候，已经阴阳双隔，一人一鬼却依然可以见到彼此，但在世嘅一方宁愿被认为系精神病，都唔放低爱人嘅鬼魂……
中国版嘅《人鬼情未了》，剧情有啲老土滥情，不过依然有感动人嘅能力，好多画面都拍得唯美而细腻，如果你睇得多残酷而现实嘅成年爱情片，睇呢部嚟调剂下都唔错。
王家欣（2015年）
豆瓣评分：7.4
剧情：坪洲少年偶遇一个清纯售票员，剩知道佢叫“王家欣”，凭呢个名寻找心目中嘅真爱，因缘际会之下遇到一群同名同姓嘅“王家欣”……
一个发生喺纯真年代嘅纯真爱情故事，引发到我对青春嘅共鸣，同时令我第一次觉得吴千语系有演技。
其实，我哋曾经都会对自己心目中嘅“王家欣”念念不忘，但到最后发现，自己搵紧嘅“王家欣”一直就喺身边。
哪一天我们会飞 （2015年）
豆瓣评分：7.1
剧情：结婚十年嘅男女主角，感情已经趋于平淡，有一日女主角发现旧同学嘅博客，不由自主咁回忆返青春时期嘅三角恋故事，同时发现咗一个隐藏多年嘅秘密……
爱情故事本身冇太多亮点，不过佢成功带出咗对梦想与未来嘅思考。
从青春期进入成人，每个人都试过企喺人生十字路口，思索自己未来何去何从，到最后，有人屈就于现实，有人坚持原有梦想，唔知你又选择咗边条路？
青春纯爱电影，可能系最老土最同质嘅电影，剧情都系围绕恒定嘅话题（学业、早恋、梦想……）展开，不过同时都系最容易产生共鸣，最多人受落嘅电影。
唔知边部电影，可以勾起你嘅青春回忆？神马影院
联系客服
