【宁海话】借米聋

借米聋

敬请聆听滕延娟讲述故事

一个老太婆耳朵半聋膨，平常日脚都会有问必答，人家背后讲其坏话，耳朵灵的猛。撞着人家向其借东西，便会装聋作哑，好像全聋了。

有一日，一个邻舍阿婶问其借米：“婆，米借点得我猛。”老太婆一听要借米，假装用一只手弯成喇叭状，贴在耳朵上讲：“妹，你说搞姆？我勿会听闻？”箇阿婶讲：“想问你借点米呢。”老太婆说：“哦，被啊，被洞打洞咯，透风个，哪会暖啦。”阿婶讲：“不是被，勒米。”“哦，勒箸呀，箇箸笼里的箸长长短短，呒不一双配对啦。”阿婶着急，腔口重点：“不是箸，勒米啦。”“哦，我听闻了，勒簟啊，脆嗷滴滴落，放在堂前里壁，晒勿来咯。”箇阿婶存外着急了，大腔洪隆讲：“不是簟，勒米啦！”老太婆装出吓一呸，讲：“水便水啦，你腔口介大装姆啦？你把我当聋膨啊？我耳朵比老鼠侏还要灵，针跌到地上也听闻，你到四邻右舍去打听打听，我到终是不是聋膨？真个呒青头，水啊问我来借借，水井得自家难去担！”

箇阿婶见老太婆不大高兴，生怕米勿会借得其，只好轻轻腔腔讲：“婆，我借个勒米，好煮饭吃个米。”为了搭其晓得，箇婶把口舌舑出来呆呆长，用撮头点点。老太婆装出啯一灒：“嗐，吊死鬼啊！箇个坏东西我家呒不咯。啊唷，霍人倒怪个！”箇婶见“急惊风碰到慢郎中，”着急爆弹唻，腔口像山厂婆样，连急连吖：“米、米、米！”老太婆佝拢一团：“搞呣，死、死、死？”箇阿婶来外忖，今日米没借来，反使听了一百担个瘟话，触些霉头，自家连急解晦：“拍脚声消！“拍脚声消！转日饿死也不问其借米唻！”

宁海还流传着“涨米聋”个噢法，其实还是勒“借米聋”个谐音。