珍珠塔唱本

（第四回）
表演：周云瑞、薛筱卿
表）慈航高阁，婆媳碰头。虽然婆媳碰仔头，老太呢？晓得该，庵东家小姐是我外甥，也就是我媳妇。而陈翠娥小姐呢？万万想勿到家庵里向送茶格佛婆，就是自家格舅娘，又是婆太太。因为听到俚河南人，所以带到慈航高阁么，目的是要盘问盘问，打听打听自家小官人笃事体。因为俚替方夹里是乡邻么。勿抵桩先问俚格事体，一问老娘娘倒蛮苦恼，千里寻儿到襄阳么流落他乡。看俚眼泪唆落落，小姐好心肠，一想我勿问勿晓得倒也罢则，既然问到、晓得，哪哼好袖手旁观？一个人能够帮别人家忙总要帮点忙。有勒里则。
   陈翠娥：啊，老娘娘。
   方太太：是，是，是，小姐。
   陈翠娥：想你不必伤心，我倒有个主见在此。
   方太太：小姐，什么主见？
   陈翠娥：喏——
   （唱）叫自古家贫不是贫，常言最苦异乡人。
         你是不但举目无认识，且处怎有少亲丁。
         虽则当家把你留款住，到底一时片刻好良心，
         然而众尼姑又不是孟尝君。
   （表）虽然此地师姑拿倷留住，待倷也还好，然而师姑自家是吃十方格，靠十方之处，格倷去靠俚么哪哼靠得长久呢？说说屋里向千里关山也并勿算远，格点盘缠钿我总有法子喔！
   （唱）叶落归根从古说，早商量还是返家门，
         回乡人魂梦也安宁。
         千里故乡算不得远，无多盘缠易调停。
         待我稍停停，返家门，谴家丁，向庵门，
         资助盘缠五十金，你回乡也可度晨昏。
   （白）老娘娘可好啊？
   方太太：（表）老太太听到该搭么呆脱则，眼泪险加乎出来。啥格道理俚要出眼泪？听见外甥囡嗯资助俚五十两盘费。格么既然五十两盘费也用勿着什梗感动，倷方太太几百万家当也该过，格萨五十两么，呒啥大不了事体落，啥感动得来，险加乎眼泪要出来呢？勿，格个五十两，有五万两格资格。哪哼勒？认也勿认得，俚肯资助我五十两，倘然我说明白，我搭倷关点亲眷，自家人，起码要五百两，再说得近点，我是倷格舅娘，倷是我格外甥囡嗯，五千两，再说得近点，我是倷格阿婆，倷是我格媳妇，五万两！所以格个五十两有五万两格资格勒，什梗勒老太太眼泪险加乎出来，想想俚笃格娘能格势利，阿扩张出着什梗一个好格囡嗯。
   （唱）势利娘生贤孝女，真是感恩衔怨两无平。
         可叹我自家无福分，这样仁义贤哉的好外甥，
         我相逢不敢认亲情。
         虽则姑娘她情冷淡，表姐姑爹甚殷勤，
         你十分气恼要九分平。
         枉我中表联姻眷，极应该你翁婿双双同进城，
         定然差遣老家丁，相送你河南方少君，
         路途中或者可免灾星。
         如何决计归家转，真是暴虎病鹅无怨心，
         叫外乡人做了异乡魂。
   （白）啊呀，儿啦，儿啦——（表）格个是倷伲子勿好，啥格道理倷板要走呢？勒襄阳耽搁仔一夜天，就勿会碰着强盗则落。啊呀，我听见师姑讲格，啥叫啥陈翠娥接着一封平安书信，格封书信落搭来格？我伲子已经拨勒强盗杀脱，落里搭来啥信呢？照我看格封信一定是假格！
   （唱）乃是舍不得闺中的贤甥女，所以一封书信成为真，
         将她白头养老在内闺门。
         无识无知魂与魄，乃是生前恩怨不分明。
         你儿若有灵领我去，免叫年老太飘零。
         她是伤心哭唤亲儿子，忘形骸泪眼看贤甥。
   （表）方太太，倒说一个忘形骸，别转头来，两只眼睛戳牢仔格外甥小姐，对仔外甥小姐哭呀。（白）啊呀，儿啦，儿啦——
   陈翠娥：（表）小姐一看格来呒趣哉，嘴里向哭儿啦，指头指指到我头浪向，阿赛过占我便宜。对俚望望，我资助倷五十两银子么，哪哼倷反而哭起来则呢？看来勿够啊？算算么五十两盘缠钿用勿脱惯，该搭襄阳到河南，盘缠钿么顶多用脱十几两银子，还要挺点铜钿么，将来千年格盘缠也有则。作啥要哭呢？噢！对哉，我照应俚陌陌生生，就是照应也照应勿长格。倘使俚自家亲眷，有好格亲眷，近情格亲眷，格么照应起来呢，可以照应得长，勿知俚阿有勿有。（白）啊，老娘娘。
   方太太：是，小姐。
   陈翠娥：你襄阳可有至亲否？
   方太太：哦，至亲当然是有的呀！
   陈翠娥：（表）普通格至亲还勿能算至亲，真正格亲眷叫三党亲，父党、母党、妻党，格么真正亲眷喏。吃到分家酒，办到遗产事体，立得出，讲得上闲话格，象什梗格亲眷俚勿知阿有。（白）老娘娘。
   方太太：是……
   陈翠娥：既有亲眷，未识可有三党之亲？
   方太太：（表）啊？倷问我阿有三党之亲，格三党么，我搭倷就是三党勒嗨。讲到我男人，替嗯笃格老娘家，有郎舅之亲。我搭倷，我是舅娘，倷是外甥囡嗯，又是一党。将到新亲，倷是我格媳妇，我是倷格阿婆太太，阿是三党之亲才有勒嗨，当然有。（白）三党之亲有呀——
   陈翠娥：（表）有格，勿知落里一脉浪向下来格。（白）三党之亲与老娘娘何等相称？
   方太太：（表）喔唷，格句闲话就是勿相信我。倷有三党之亲，替倷啥格称呼？倷讲到称呼么我就讲点拨倷听听，我就讲嗯笃爷，讲嗯笃娘。（白）啊，小姐，你要问难妇人三党之中何等相称？
   陈翠娥：请问。
    方太太：喏。
   （唱）想我先夫有一个同胞妹，堂上翁姑两大人，
         爱惜她浑如掌中珍。
         选中邻家一个年少子，姑父招赘在家门。
         郎舅一双同发愤，都是寒家提拔他得功名。
         叫转眼金阶叨雨露，顿时白户做公卿。
         想当初哪有呼鸡食，
   （表）我勿是坍姑父格台哦，格辰光姑父屋里穷得来，连得鸡吃格谷也呒拨。
   （唱）到如今，有万贯家财敌国称。
         想寒家富贵他已企及，蓦地贫穷就卷帐行，
         恐有沿途的借贷情。
         方信古人言一句，叫一生一死见交情。
   （白）小姐，可是啊？
   陈翠娥：（表）咦？小姐一听奇怪则，老娘娘讲三党之亲讲俚笃姑父姑娘，哪哼俚笃姑父姑娘格事体替伲格爷娘，格番历史倒蛮象格喏！俚笃姑父，是格位老娘娘提拔，伲格老娘家，是伲舅娘笃提拔。现在格位老娘娘，闲话里向勒里埋怨俚笃姑父，当年穷该，幸亏俚笃提拔，而现在富贵则呢，忘记仔俚笃哉。啊呀，拨俚什梗一讲倒小姐想着哉，格位老娘娘勒里埋怨俚笃姑父，阿有格伲格老娘家，伲格娘勒浪襄阳，而河南杨氏舅娘也勒浪恨伲噶？一想勿会。哪哼勿会么，咦，虽然表弟到该搭来，伲娘势利，我绿秋亭浪向送塔，爷追到九松亭攀亲，格么象煞报还俚笃恩则。大约伲杨氏舅娘，勿会恨伲老娘家格。格位老娘娘格姑父、姑娘总呒拨什梗好。格么覅去管俚则喂，既然倷有什梗格亲眷，啥勿叫倷伲子去呢？（白）啊，老娘娘。
   方太太：是，小姐。
   陈翠娥：既有如此亲戚，况令亲人家又是府上提拔，你何不命令公郎到令亲人家去投亲啊？
   方太太：啊，小姐，哪有不去的道理呀。
   陈翠娥：噢，老娘娘去过的？
   方太太：难妇人没有去。
    陈翠娥：噢。
   方太太：当时节，命小儿去过一次啊。
   陈翠娥：噢，令公郎前去。
    方太太：喏。
   （唱）曾遣小儿去求借贷，姑娘重富又欺贫，
         反把孩儿赶出门。
         道途传闻有言一句，说道虽则姑娘丧良心，
         幸喜姑爹尚有情，两骑红尘追出城。
         匆匆追赶到九松亭，再四款留再四行，
         故而亲上亲中表订婚姻。
   陈翠娥：（表）啊咦？小姐听奇怪则！我勒问倷格事体，倷浪讲我格事体喂！伲么，表弟到该搭来，娘么怠慢仔俚，伲老娘家么追出去，追到九松亭，拿我终身配拨俚，九松亭中表攀亲。啥老娘娘也是什梗嘎？噢，俚格伲子么也是拨勒姑娘势利，哪么俚笃姑父追出来么也是追到九松亭，也是当面攀亲，有格种巧事体嘎？格是九松亭造勒浪勿是歇凉，专门攀亲格！噢，日浪姑娘么才是势利格，姑父么才是好格，也呒勒格种事体勒嗨。格么老太讲得什梗明显么，阿要穿棚呢？小姐阿要觉得呢？叫啥朆觉得。勿是小姐笨，因为陈翠娥小姐，俚相信端阳佳节，王本带得来，表弟封平安家信，虽然中途遇盗，母子天伦之乐，勒浪河南。俚万万想勿到，嫡亲杨氏舅娘会到该搭来，就勒俚边浪。况且倷老太说得太嫌明白则，小姐想仔横跺里去则。倷么明明浪讲伲格事体，啥体要讲伲格事体么，懂哉。因为格位老娘娘么河南人，外加么好才情，替伲杨氏舅娘是乡邻，说勿定还是乡邻老姐妹，蛮要好格。表弟到该搭来，伲娘势利，该格事体是襄阳人也才晓得，况且表弟回转去么要讲，一讲么舅娘也晓得，四邻八舍么也晓得，格位老娘娘么也明白。老娘娘家境也蛮清寒格，苦格人总是帮穷苦格人。哪么俚想想伲陈夹里勿应该势利方夹里，今朝偶尔机会勒我庵堂里碰着我么，代表伲杨氏舅娘勒浪发发牢骚，骂骂太平山门，所以勒，勒浪讲伲格事体。小姐当仔俚勒浪发牢骚，代替杨氏舅娘浪不平，所以想勿到俚就是杨氏舅娘。格么想老娘娘倷勿作兴则，我想想戳穿棚俚，我倒好心，关心倷，问问倷格家史，倷勿应该假借倷姑父姑娘，说我爷娘势利。格么阿要什梗戳穿棚呢？什梗勿有趣，拨俚讲起来，我又勿勒讲倷，我勒讲伲姑父姑娘喂，噢！嗯笃实头势利该，倷承认该，反而呒趣想。既然倷是隔壁打碎水缸渗过来，格么我也渗过去。倷假借嗯笃姑父姑娘浪说伲爷娘，格么我陈旧假借嗯笃姑父姑娘来说好伲爷娘。（白）老娘娘，如此联姻，再好也没有了！
   方太太：（表）喔唷，老太太转念头，说得什梗近，哪俚倒还朆穿棚呢？非但勿穿棚，反而浪讲，啥叫啥嗯笃什梗格攀亲再好也呒拨！勿知好勒啥格浪。（白）啊，小姐，怎见得？
   陈翠娥：既然如此么，老娘娘。
   方太太：是……
   陈翠娥：（唱）你么忍耐三分闲气恼，周全一点至亲情。
                 婆媳生由长幼辈，翁婿姑侄旧亲情。
                 你是不妨依附他家去，饮食起居定称心。
                 贤哉媳妇完花烛，膝下依依欢笑人。
                 到将来，令公郎日后登科甲，先有泥金捷报临。
                 完婚割晋完花烛，大小登科喜万分。
                 晚境享尽无穷福，合家欢同返故乡城。
   （表）明晓得倷讲仔半日浪讲伲格事体，倷格亲眷说勿出啥人该，我偏要问问倷。（白）啊，老娘娘。
   方太太：哦，是。
   陈翠娥：（唱）不知亲戚居何处，此去杳杳有多少程。
   （白）但不知令亲居住何处？
   方太太：（表）方太太一听么，噢！懂则。问我格事体啊，完全是假格。俚自家格事体啊，朆吐露，喏，现在浪吐出来则。生怕我要觉着，所以落先拿我格事体，拿我格家世问问，外加还要装两句，嗯笃格种攀亲么再好也呒拨，又是倷格外甥囡嗯，又是倷格媳妇，将来一定是孝顺倷。啥勒将来倷格伲子么能够得仔功名，回转来，合家欢返故乡，回到屋里，将来么天伦之乐，连下来亲眷住勒啥场化？格句就是俚乃相思格根！既然倷问到我，我有心来迁就点生意。（白）哦，小姐，难妇人首亲人家近在咫尺之间，但不过我而今不去了。
   陈翠娥：（表）哦，亲眷人家俚勿去则。（白）你欲往何处？
   方太太：因为小姐资助难妇人五十两盘费，我要回转河南去了。
   陈翠娥：噢，回转河南！
   方太太：是啊。
   陈翠娥：哟，再好也没有了！
   方太太：啊，怎见得？
   陈翠娥：（表）本来要问倷格事体是假格，就要勒倷嘴里向打听打听小官人格事体，方夹里格事体。现在倷回转河南么，咸，闲话倒可以近上去则。（白）老娘娘。
    方太太：是。
   陈翠娥：（唱）想你路过太平庄上否？
   方太太：（表）阿是？生意一迁就，马上就来喏。啥叫啥倷回转河南，阿要路过太平庄？太平庄自家屋里，啥叫啥阿要路过呢？有心迁就点，说得近点。（白）哦，小姐，太平庄近在咫尺之间，我一定要路过的呀！
   陈翠娥：噢，既然如此么——
   （唱）要拜烦与我寄佳音。
   方太太：（表）噢，要寄一封信，送拨勒啥人介？（白）请问小姐，这一封书信呈与哪一个啊？
   陈翠娥：喏——
   （唱）要问候一声贤舅母，只为河鱼天雁杳无音。
   方太太：（表）噢！原来是送拨勒我格！舅娘么。格是格封信很快，倷拿过来我马上可以收着。有心假痴假呆问问俚。（白）哦，小姐，不知令亲人家尊姓大名啊？
   陈翠娥：若问首亲人家——
    方太太：哦。
   陈翠娥：与令公郎么——
   方太太：（表）喔唷，勿知啥格花头来则。
   陈翠娥：（唱）同姓同名同籍贯，倘非族文定乡邻，
                 幸方家也有这一门亲。
   （白）倒也是姓方。
   方太太：（表）老太太一听么，一顿。哎呀，我说格歇语已经拨俚祥仔出来则喂。因为刚刚替二师太讲格啦，二师太讲格辰光，我说我格伲子天圆地、云淡风，喏，现在拨俚祥出来则。所以落勒浪讲，我格亲眷替倷格公郎同姓同名同籍贯，格么让我稍许避得远点，太近哉，勿大好。（白）哦，小姐。
    陈翠娥：嗯。
   方太太：府上的令亲姓方？
   陈翠娥：是啊。
   方太太：噢。因为卑处河南太平庄，耳闻姓方的很多，有好几百家姓方，也有念书的姓方，也有做官的姓方，也有行商的姓方，也有务农的姓方。但不只令亲人家的姓方么，哦……做什么生理的呀？
   陈翠娥：（表）嘿，小姐对老娘娘望望，问伲格亲眷做啥格生意格。勿瞒倷说，勿做生意格，伲外公、娘舅是宰相、礼部，说出来，倷要一吓得来。小姐还有点小囡脾气，倷问到俚亲眷，俚要海外两声。（白）老娘娘。
   方太太：是……
   陈翠娥：若问首亲作何生理。
   方太太：哦，是啊。
   陈翠娥：请老娘娘坐稳了哦。
   方太太：（表）喔唷唷，格位小姐有点小囡脾气格，叫我坐稳点，俚生怕俚说出来我一吓一个跟斗。倷也覅海外则，海外奇谈外公笃，喏！就是孤苦伶仃格佛婆笃。勒里做个佛婆么！听听看。（白）倒要请教。
   陈翠娥：喏——
   （唱）想我外公即是方从哲，燮理阴阳极品臣。
         母舅天官为礼部，文武领袖列朝廷。
         赫赫河南方相国，纶音日日降门庭。
         可怕妒贤奸佞贼，金阶谎奏九重闻。
         说道方家国库尽吞没，所以敌国家财有万万金。
         抄没家财四百万，
   （表）当时间外公、娘舅，宰相、礼部，官做得算得大则，拨勒奸党陷害，皇帝面浪谎奏，说啥格方夹里么吞没国库，有敌国之家财。皇帝听信奸党闲话么，就此御林军太平庄团团围绕，人赶出来，房子封脱，家当抄没，一家人家就此完结。
   （唱）富贵门第须臾平。
   （白）我家舅娘她苦啊。
   方太太：（表）噢，我苦俚倒也晓得勒嗨。（白）啊，令舅娘怎样？
   陈翠娥：（唱）她寡妇孤儿无以活，只好女工针黹作营生。
                 而今寄迹祠堂里，
   （白）我家表弟是——
   方太太：噢，令表弟如何啊？
   陈翠娥：（唱）表弟文名号子文。
                 未冠时有神童誉，拨处前貌十二龄。
                 咫尺太平庄左右，量闻通品的秀才名。
   （白）可明白？
   方太太：（表）老太太一转念头，格位小姐脑筋里向记得蛮牢。的确，方夹里向抄没家财，格个，嗯笃外公、娘舅气死坟浪。喏，说么说气煞，其实骨子是服毒格。不过俚乃死下来呢，倒说河南场化商家勒，三日天勿做生意。啥？俚是冤枉格！皇帝派点御林军下来团团围绕，抄没家财是赶两个人出来啦。所以大家勿服气，等到礼部天官替方相爷死，倒说门前格纸钱灰烧得土墩什梗两个。就是说明，方夹里向对待河南地方浪向，的确，是有点益处，是一大大忠良。什梗勒现在浪讲出来么，老太太心里向蛮快活，总算外甥小姐肚皮里蛮熟。格么我倒也要和俚格调，倘然我说勿认得，俚心里要勿快活格落！（白）哦，小姐。
    陈翠娥：嗯。
   方太太：噢！就是这一家方家啊！
   陈翠娥：是啊。
   方太太：既如此么，另外祖乃是宰相叫从哲公。
   陈翠娥：正是。
   方太太：令母舅乃是礼部天官叫斤张公。
   陈翠娥：是啊。
   方太太：嗯，斤张公有一个外号，好象叫……
   陈翠娥：叫一斤公啊！
   方太太：哦！是啊！叫一斤公啊！（表）啥格道理方太太，啥格“叫……”阿是连得自家老男人格外号俚忘记脱咋？朆。勒浪有心试试外甥囡嗯，看外甥囡嗯阿迭得出。倘然俚乃说得出，格么俚笃爷娘还勒浪讲起伲方夹里。倘然俚乃说勿出呢？俚笃爷娘勿会提则。其实骨子陈夫人从来朆讲歇，陈御史有转把提起，喏，小姐听勒耳朵管里勿会忘记。所以落劈口回头一斤两字。（白）噢……照如此讲来，令舅娘只怕姓杨，杨氏么？
   陈翠娥：老娘娘，难道我家杨氏舅娘你也认识的么？
   方太太：（表）嘿嘿……哪哼拨倷说出来呢？勿见得穷得来自家勿认得自家勒嗨，自家总归认得格。（白）噢……认识的，认识的。（表）格是什梗看起来，闲话好说得近点则。（白）哦，小姐。
    陈翠娥：嗯。
   方太太：照如此讲来，小姐尊姓是耳东陈了。
   陈翠娥：（表）小姐险加乎笑出来。搭倷老娘娘讲仔半日格闲话，俚刚准晓得我姓陈勒嗨！（白）是啊。
   方太太：哦……府上令尊令堂，起居纳福？
   陈翠娥：（表）喔唷，看上去要攀亲眷快则。浪问到自家爷娘，小姐懂规矩，直立格立起来。（白）噢，家君家慈，托庇粗安。
   方太太：呵，请坐啊，请坐啊。
   陈翠娥：呃嗯，是！（表）重新坐定。
   方太太：常言道：鼓不打不响，话不说不明。难妇人见小姐的时候，还是在三、四岁的时候，而今长成得一表人材，呵呵，怪不得我们要老大了啊！
   陈翠娥：（表）喔唷，一听老娘娘勒浪买老则。不过照俚口气，看上去替伲蛮近情该。（白）老娘娘。
   方太太：是……
   陈翠娥：难道认识寒家家君家慈么？
   方太太：（表）呵，啥叫认得介？实头是亲眷哦！（白）哈呀，小姐啊——
   （唱）真是两叶浮萍归大海，人生何处不相亲。
         我屈指桓外有到十六载，有缘相见你女娉婷。
         我与你家令堂闺阁相依久，宛比同胞姊妹形。
         想尊翁出使到波斯上，海外封王万里程，
         令堂是么鸡家娟等向襄城。
   （白）当时节，令尊大人到外国封王，令堂太太要搬到襄楚。令舅娘在那里相送，难妇人也在旁侧，所以看得请清楚楚啊。
   （唱）你们临行只虑天意慢，真是惜别依依悲不声。
         从此天涯千里外，真是河鱼天雁杳无音。
         想我们一十六年难见面，真是江东外泊两乡绅。
         小姐幼年我还抱过，
   陈翠娥：（表）一听啥么事啊？我小辰光俚还抱歇过格啦？（白）怎样？
   方太太：呵呵。
   （唱）叫喃喃也把我舅娘称。
         你在襁褓之中三四岁，相随卷张竟回门。
   （白）小姐，你下船的时候，令舅娘有一样东西送给你，你可记得否啊？
   陈翠娥：（表）一想杨氏舅娘几化欢喜我，送伲下船格辰光分别格时候，送伲格么事蛮多格，勿知落里一样。（白）老娘娘，当时杨氏舅娘相送什么，奴倒忘怀了。
   方太太：（表）噢，忘记脱则。格我勿会忘记。（白）哦，难妇人倒还看见呀！
   （唱）叫纸厚金钱二十四，乃是舅娘爱惜你女贤甥。
   （白）有二十四文金钱，套在小姐头颈之上，可有么？
   陈翠娥：（表）的确有格。实在小姐是朆忘记，因为舅娘送拨俚么事蛮多，勿知落里一样，现在倷讲出来么一想就是。格辰光河南格风俗习惯，养仔男宝宝呢，头颈里向套廿四个金铜钿，金铜钿浪向有口采句子，啊，聪明智慧，长命百岁。中户之道人家么银子该，推委点么铜格。当时方夹里已经抄仔家，老太拿自家宿里宿笃金子回一回炉，打廿四个金铜钿套勒外甥囡嗯头颈里。格为啥自家爷娘倒朆打拨俚么，格辰光陈培德老夫妻是俚要伲子格，养仔囡嗯么勿大欢喜俚，重男轻女，所以廿四个金铜钿是舅娘送拨俚个。小姐至今还浪闺楼浪时常拿出来看格。看见廿四个金铜钿就要想着舅娘，哪哼会忘记呢？啊咦！格位老娘娘哪哼晓得格呢？（白）老娘娘你也知道么？
   方太太：啊，非但二十四文金钱晓得，就是小姐的年庚八字难妇人也晓得！
   陈翠娥：吓！（表）小姐听见么一吓得来，啥么事啊？非但晓得杨氏舅娘送我廿四个金铜钿，连得我年庚八字也晓得嘎？哎呀，从前小姐格年庚八字何等贵重，任何人勿晓得格，除脱爷娘。倷小姐要出嫁哉，喏，哪么年庚八字送到夫家去。倘使年庚八字迭脱，被别人家捡着，要破坏倷名誉是，倷生路也呒拨格。哪哼老娘娘会晓得格？听听俚看，讲得阿对。（白）老娘娘，请问！
    方太太：喏。
   （唱）乃是年辛未，月庚寅，元宵佳节亥时辰。
   （白）可是么？
   陈翠娥：（表）喔唷，实头对惯！看上去老娘娘会隔夜算嘎？哪年庚八字会得晓得格呢？小姐倒呆脱勒浪则。
   方太太：呵，非但小姐的年庚八字难妇人晓得，就是这生下来的时候，难妇人倒也晓得！
   （唱）无雨雪，少风云，灯月交辉水临盆。
         再有小姐在胸前有一个朱痧记，两字明珠作小名。
   （白）可是啊？
   陈翠娥：吓——（表）小姐哪么呆脱哉。老娘娘非但晓得我年庚八字，连得我养出来辰光天时啥格颜色，啥格气候，连得我身浪向格暗记号都明白。小姐胸口头有滩朱痧记，所以两字明珠作小名。胸口头格朱痧记，照陈翠娥小姐算算，别人勿晓得格，只有两个半人晓得。哪会两个半呢？两个么爷娘，身生父母，半个是啥人？半个是采萍。采萍浪我身半边几化年数则，一紧勿晓得格。还是最近，勿长远，天么热，小姐白相仔花园勒，吃力则，打中觉。到坠夜快，采姑娘拿盏蜡台火，到楼浪来请小姐下去吃夜饭。帐子掀开来，蜡烛火一越，看见小姐胸口头有宣宣红格一滩，象铜钿什梗大小。采萍一吓，勿知啥格名堂，蜡台火放脱，帐子扎起，袖子管一翘，起高长指甲浪小姐胸口头，红吼吼格地方去剥则，剥法剥法。小姐阿要跳起来格啦！喔唷倷啥格路道？！采萍说，小姐，丫头勿当心，勿知哪哼，勒倷小姐胸口头打翻滩蜡烛油。呸！蜡烛油打翻到胸口头是我变死人什梗则！格么格个啥么事？红吼吼？小姐说道勿是蜡烛油，天生成功一滩红格，叫朱痧记。倷看上去么颜色红格，但是皮肤浪是光滑格，并勿凸出来格。噢！朱痧记！朱痧记么阿好介？说好惯，生仔朱痧记么也蛮好，啥格浪勿好呢？咸！采萍说道我小丫头倒也有格。噢？倷啥也有嘎？让我看看看。采萍拿袖子管撩开来么，臂巴浪向也有什梗一滩。小姐一摸，一看两样格。说倷格一滩红么是红格，有点凸起来格，搭我两样格，倷格勿是朱痧记，是朱痧痣。噢！勿是朱痧记哦！所以俚笃两家头，一个生痣，一个生记，叫知己知己，真正知己到老死得来。采萍登勒楼浪长远，最近刚刚晓得么所以只好算半个头。格位老娘娘哪哼晓得得什梗详细呢？看来俚会隔夜算嘎？哪倒奇怪则！看上去一定是近格亲眷，倒要问问勒里。（白）老娘娘。
    方太太：是。
   陈翠娥：但不知你与家母何等相称？
   方太太：噢！你要问难妇人与令堂何等相称？
   陈翠娥：是啊！
   方太太：嘿嘿……说讲出来，真是淡淡薄薄，薄薄淡淡。
   陈翠娥：（表）咦？格个算啥格称呼介？薄薄淡淡，淡淡薄薄，又勿是豆腐浆。倷倒勿说浓油赤酱，赤酱浓油。（白）什么称呼？
   方太太：（表）倷一定要听称呼么我讲拨倷听听吧。
   （表）哪么要婆媳穿破机关。