▍巴多博物館
阿拉上趟讲到摩洛哥结束，阿拉今朝从突尼斯开始。
阿拉上趟讲到阿拉碰到突尼斯航空个飞机，突尼斯航空飞机呢，高头个空乘，无论是空姐也好，空少也好，侪是长来蛮好看个，就连老阿姨也是有一种像法国人一样个感觉。包括搿个安全广播倒是蛮阿拉伯人个。里向呢没电视也没电影，就几个空中小姐拿了根带子随便掼两记，然后呢老阿姨来旁边配音，用法文讲一遍，阿拉伯文讲一遍。速度侪快得来勿得了。明显伊拉晓得没人会得听个。然后呢我一直听到人家讲中国人声音响，讲搿闲话个人肯定没趁过突尼斯航空个飞机。噢哟，如果讲侬趁来一趟突尼斯航空个飞机，侬会得晓得阿拉中国人真个是老内向个，勿大响个。伊拉个飞机高头哦，声音最轻个是一个小毛头，因为全程来睏觉。
讲起突尼斯航空个飞机餐呢，倒是只特色。之前呢我咨询个辰光，就是别个事体嘛，没想到搿个突尼斯航空个客服小姐一看到我中国人，主动讲：侬要申请海鲜特殊餐伐？后头我真个去申请了。阿拉拿着个海鲜餐倒是蛮好，又有虾又有鱼。美中勿足个地方也有个。伊提供个咖啡是没奶也没糖个。最后呢我用了阿拉小朋友个芝士块，伊没吃嘛，还有其他个糖放进去个。我问空姐要，空姐帮我讲马上就来，马上就来，结果落到地面高头都没拿着。
▍海鮮飛機餐
后头搿飞机落地个辰光呢，阿拉还看了。我去拿包个辰光，看到飞机高头个地毯还没铺满，搿缝道里向侪是勿晓得啥人掼下来个垃圾还塞辣里向，侪吃个物事个垃圾。从摩洛哥卡萨布兰卡到突尼斯呢，一共两个钟头。两个钟头之后呢，就到了。就到了突尼斯了。
一到突尼斯机场，就是讲拨人家感觉嘛，就是半开放个状态。突尼斯进关老便当个，然后老爷叔拿了张护照，一边蹲旁边吹吹牛皮，一边敲了只图章就好了。入关之后呢，就拿了张免费个突尼斯电信个卡，卡里向有得100M跟6分钟通话嘛，侪勿要钞票个。后头我充了5块洋钿，就相当于人民币15洋钿个通话，还有15块洋钿个网络。拿着免费个卡之后呢，就碰着突突，伊突尼斯嘛，伊搞笑个第一桩事体。行李带坏脱了伊讲。我坐过介许多国际国内个飞机，第一趟听到介搞笑个事体。难末呢阿拉集体拨带到行李传送带，难末阿拉只航班，还有另外只意大利飞来个航班，一淘出来。还有得小朋友呢，还有就讲我一个突尼斯个朋友，还有辣海宾馆个接站个老爷叔侪来等。然后呢感觉哪能后头班行李哪能已经侪撤脱了啦？阿拉行李还没？
然后托阿拉带物事个搿小朋友就讲唻，伊讲阿是搿行李有问题啊？后头我还去，我还去行李处问唻，搿辰光外头宾馆接站个老爷叔还去寻人哦。已经去广播寻人寻阿拉伊讲。难末呢行李处个搿女个呢，蛮淡定个，一边来搓指掐，一边来讲。我讲侬看阿拉行李落脱了。伊讲：㑚阿里只航班？我拿航班号头报拨伊。伊讲：行李还没走光唻。我讲我看后头行李还没出来唻。搿女个讲还没走光唻，走光了全部寻勿着，全部走光了，然后行李㑚再寻勿着再来寻我。难末我屏勿牢了，我上厕所去了。觉着勿对啊，阿拉飞机高头个，也是上海人个老阿姨拿了行李跑脱唻。我上好厕所一看，阿拉个行李放了另外一只传送带高头，勿是先头带阿拉去个一只。后头我再晓得，因为阿拉只行李带坏脱了嘛，前半飞机个人，拨带到阿拉搿只行李带，后头飞机个人，拨带到另外只行李带。居然，至于侬搿飞机阿里只位置出，阿拉也勿晓得。反正伊拉也晓得，阿拉没拿着行李是勿会得跑个。
后头来好勿容易出关，寻着阿拉搿小朋友呢，阿拉再晓得，阿拉去个搿几天，突尼斯个差头司机侪罢工了。噢哟，搿罢工两个字哦，想想是蹲辣阿拉国家只有教科书高头再学着过哦，居然拨阿拉碰着了哦。讲起来之前嘛，阿拉小朋友拿就是只汉莎航空个十年来个罢工日脚全部列出来了，还特地排了只勿会罢工个日脚出来。没想到跑到突尼斯碰着罢工，也是噢哟。
▍巴多博物館的馬賽克作品
宾馆个接车个老爷叔碰着阿拉，搿只赤佬更加搞笑，伊讲伊就是罢工个差头司机。为啥伊蹲了阿拉近呢，因为理论高头伊应该来罢工，伊利用罢工个辰光出来赚外快。常怕拨人家认出来。后头呢，一边开阿拉回去呢，一边来讲侬加五块洋钿，就拿阿拉送到一只当地个博物馆。因为阿拉本生就想去嘛，阿拉想也来三。就让伊拿阿拉行李送到宾馆，阿拉就先到只博物馆去了。迭只博物馆个宾馆呢，是11块洋钿。寄包是勿要钞票个，理论高头四点半关门，但是阿拉伯人侪晓得个，基本浪四点钟就会得侪跑光了。所以阿拉到个辰光三点多了，搿寄包个阿姨讲，叫阿拉保证一个钟头之内全部看光。然后阿拉就真个蹲辣一个钟头之内全部看光了。
搿个博物馆呢，是突尼斯最大个一只博物馆。里向有得交关蛮珍贵个马赛克个作品。从博物馆一只窗口头看过去呢，有得只名字蛮左翼个一只杂志个出版社。出来之后呢，我再晓得，我拿了一只手机号头，我还勿晓得是啥唻？然后我问搿前台，前台小姑娘，我讲手机号头是啥？我末寻来寻去寻勿着，结果伊拉也没寻着。最后呢有得一个叫Emad个，搿个也是爷叔伐，不过也勿好讲，因为伊拉长了老，搞了勿好说勿定年纪还没我大。老积极个，伊讲用伊个手机，叫我，伊用我个手机拨伊个号头，还老开心个讲，伊讲哎哟，我只号头是第一个打侬搿只号头哦。侬唻。我想想哦。
▍巴多博物館內部
后头走辣路高头，有两个好像，至少是90后，最大勿会，应该讲是00后伐。两个小赤佬，特地蹲辣阿拉身边停车，还跟阿拉用中文打招呼：你好。阿拉吓了一跳了。阿拉其实两个也是老阿姨了。出门之后呢，阿拉蹲辣AL BARDO搿只站头趁地铁。地铁票呢辣一只老破老破个，像垃圾桶一样个售票亭买。除脱地铁票呢，还有得小火车个票子，就是趁到啥蓝白小镇，还有迦太基个，嗯，就是只小火车个票子，好一淘买个。一共是一块洋钿多一点。到了巴塞罗那，到了巴塞罗那之后就转三号线，再到Tunis Marine搿只站头。就小火车到sidi bou said，就蓝白嘛。
讲起搿只突尼斯蓝白小镇哦，真名叫sidi bou said。搿只，搿只小镇呢，是网红了勿得了，红得来突尼斯红得来发紫个地方。首先讲一声，从铁路下来，是要走个。小火车嘛，下来是要走个。搿只铁路站，破是破得来勿得了。秧沟洞盖头也没个。盖头放辣旁边伊讲。噢哟，吓了我一跳。至于从啥地方走呢，反正火车下来，跟牢人家走就对了。基本浪侪到搿地方个。走到搿搭呢，就是讲反正，侬要走到搿最著名个搿只咖啡馆呢，侬就笔直走。一直走，走到底，走到底呢，就是人家网红照片个地方。
搿只地方呢，真名，搿只地方交关侪叫Cafe Delice。所有个蓝白小镇照片侪是来搿搭拍个。问题是侬来地图高头寻，侬寻，侬是寻勿着搿只Cafe Delice个。因为搿只咖啡馆个真名叫Cafe Bou Chabane。为啥体叫Cafe Delice呢？因为伊搿只阿拉伯文名字呢，放辣忒高，拨字𢴳（挡）脱了。然后呢，Cafe Delice呢意思是就是比较精致个咖啡馆嘛。是伊拉自家封个，就放辣当中，就拨人家看到了。所以伊本生名字已经看勿到了。因为拨字𢴳（挡）脱了。
▍咖啡館
搿咖啡馆最有名个呢是带松子个薄荷茶。两杯12D。讲起搿账单高头还写一万两千块，吓了我一大跳。可以讲来突尼斯看起来是天价了。葛末人家出名呀，啥人叫人家出名呢？里向有只老头瞎有劲，硬劲要拿伊拉个26岁个老帅个儿子介绍拨阿拉小朋友。我心里想，噢哟，阿拉侪，两家头侪大阿姐唻。
▍薄荷茶
出了蓝白之后呢，阿拉下来个地方有得只勿要钞票个接免费水个地方。我看到有只老头辣接免费水。路高头呢转了半日天，我还是决定吃烤鱼。一条烤鱼是八点五块，八块五角，两家头吃蛮实惠个。回突尼斯个火车有点搞笑。因为忒晏了，卖票子个人回去了。就跟我讲，反正要查票个。查票个地方侬顶多补票好唻，勿要紧个。后头来回去个路高头呢，还有只老难看个人硬劲问我要facebook，后头还讲请我吃咖啡。我虽然是老阿姨，但是看到介难看个看看还是勿来三个。回来路高头还碰着一个阿拉伯人冷陌生头跳舞，我以为神经病了。后头只小赤佬讲，因为伊欢喜个球队赢了，所以要跳舞。搿辰光呢，有个卖相蛮好个人主动讲，伊跟阿拉一路，看看卖相蛮好嘛，卖相也蛮好，伊陪阿拉一直，就到刚刚只巴塞罗那搿只地方。
▍烤魚
来埃面搭呢我打电话拨宾馆，叫宾馆个人出来接阿拉。接阿拉个路高头呢还陪阿拉等。期间呢来了把差头，跟阿拉讲，伊讲送阿拉回宾馆可以，要30块伊讲。我心里想，阿拉机场回来也搿点。搿辰光宾馆个人终于回来了，一个男个一个女个过来。一个男个，一个女个。搿男个，竟然90后哦，搿只面孔哦，讲是70后我一眼也勿会怀疑。
▍咖啡館夜景
我觉着其实老城个夜到还是蛮吓人个，冷陌生头角落里窜出来一群人。搿男个问伊：㑚做啥？阿拉夜里没事体做来唱歌。后头来走了老长辰光到宾馆了，还讲了，阿拉就带㑚走一趟，下趟㑚自家走。阿拉个行李倒是到了房间了，但是火气大个是啥？搿只宾馆个卫生间哪能来外头个？因为我之前帮老板讲，伊讲有独立卫生间。难末伊讲伊拉只有一间有独立卫生间，已经订出去了。难末阿拉想反正就一只房间，就算了。一只夜到也就算了。其实搿只宾馆呢是人家推荐个，但是呢搿推荐个人价钿是阿拉三分之一。然后呢搿家老板是蛮好个，人也蛮好，但是实事求是讲，侬位置跟设施一塌糊涂。所以后头我就拿搿只，最后一天，搿只宾馆行程嘛，我本生订辣，后头取消了，我调了另外只宾馆。
摄影：小女生施维雅
口述：小女生施维雅
听写：神死恸瞑
编辑：神死恸瞑
点击
联系客服
