▌酒店自助早餐
阿拉本生呢有只蛮大个计划，就是要去非洲之手，就是突尼斯靠近地中海有得一只像手一样个只地图个半岛。但是呢因为突尼斯个差头司机罢工。葛末只好勿来三唻。只好改成去哈马马特了。搿天早浪向吃早饭，早饭还是可以个，就是也算自助餐嘛。
就讲但是呢我讲搿只酒店勿好呢，就勿好辣搿搭。伊只酒店勿靠近任何地铁站，去地铁站只好靠走，而且老城里向勿通公交车个。而且侬辣老城个边边高头也算了，还来老城个还要望里向走交关。勿是种市中心个搿种。阿拉两家头呢走了老长辰光再出老城。
老城里向正好交关学生子来等校车。噢哟，搿当地个小朋友哦，男女生是亲密亲密得来嗲得来勿得了。搿种狗粮也好晒晒个。阿拉问了交关人，一路浪向跑到一只叫BAB ALEOUA搿只汽车站。就坐了当地种小巴嘛，叫LOUAGE。小巴个好处呢，就是人到了就走了，大概一个多钟头就到了搿只哈马马特个LOUAGE站头。
▌差头司机罢工
小巴站呢到海滩走过去十分钟。当中呢阿拉还看到差头司机罢工。哎哟老有劲个，搿罢工一个人罢工，十个人来看。哈马马特只老城呢就来海滩旁边。伊只海滩是真个好看。搿水清是清得来勿得了。路旁边呢还有得卖茉莉花个人，搿搭卖个茉莉花特别个香。但是呢伊只老城就一般性，到底勿是世界文化遗产嘛，伊搭店老少个。
▌哈马马特好看的海岸
哈马马特老城帮海滩之间呢，有只饭店，阿拉点了两杯薄荷茶，跟一只咸个Crepes。因为上海一般性甜个比较多嘛，埃面搭是咸个，而且是金枪鱼芝士口味，蛮好吃个。价佃也勿贵，就九块洋钿两个人。
▌金枪鱼芝士可丽饼
▌两杯薄荷茶
阿拉回去个辰光本生想趁LOUAGE回去个，后首来呢经过只大巴站。看到大巴有得到突尼斯个嘛，就直接跳上去了。其实哈马马特到突尼斯个辰光大巴跟LOUAGE是差勿多个，但是大巴价钿便宜交关。大巴站头呢，哈马马特只大巴站头还离老城老近个。所以我个人还是推荐㑚大巴去个，因为大巴呢只有一只站头。回来第一桩事体就是买了过夜车个车票，到托泽尔。
▌安东尼海边浴场
突尼斯到迦太基其实是比较简单个，就是之前一只蓝白小镇个小火车嘛，趁搿小火车辣海蓝白前头之前个一只站头就是到迦太基。到迦太基汉尼拔搿只站头下来就可以了。下来跟牢导航走。搿搭呢，安全侬绝对放心个。突尼斯呢，伊搿搭是富人区，到处有得警察保护个，两旁边侪别墅。阿拉去个辰光已经关门了，所以我就顺带便上了只厕所，老勿好意思个。老勿好意思个，门票也没买，就假装上只厕所。只看门老头子问我要门票个，后头我其实没听清爽，挨下去就讲，侬学生子啊，搿就算了伊讲，就搿能没买门票。后头来顺了阿拉伯人个标志呢，又去了安东尼一只浴场。留下来呢唯一一张照片，是立辣两旁边个墙壁旁边拍个。
帮阿拉伯人人人侪会得讲中文，一句叫「沙漠玫瑰」。另外呢还有只老戆个交通标志，伊只标志高头还拼错脱了。还有一只少了只s，就自家手写上去了。搿个旁边两个警察蛮好孛相个，阿拉来拍照，伊拉看牢阿拉。还特地让开位子让阿拉拍伊讲，但是仍旧看牢阿拉。看了老长老长辰光，屏出来两个中文字：你好！搿当地路旁边个阿拉伯警察更加搞笑，阿拉小朋友先上去，人家瘦嘛，跑了快，我码子比较大，跑了慢。小警察问伊是勿是天朝人，小朋友讲：对个，就天朝人。隔手小警察开心杀了，伊讲：侬会勿会得讲阿拉伯文伐？阿拉小朋友呢卖人还是卖了蛮快个，伊讲：会得阿拉伯文个来后头。好，我走上去个辰光，搿阿拉伯警察就帮我讲阿拉伯文。一群警察一淘过来帮我讲阿拉伯文。我来想难道我面孔高头写字个，会得讲阿拉伯文啊？后头再晓得是阿拉小朋友拿我卖脱了。
到了市中心之后呢，阿拉辣海巴塞罗那站附近呢寻了只连锁超市，叫monoprix搿里向呢买了点吃个，就三明治嘛，金枪鱼，三明治嘛。但是咬了一口发觉是辣个，瞎难吃，还有得牛奶也是我自家买个。
只手机拨抢脱个事体呢，纯粹是自家作。本生呢从迦太基回来天已经墨墨黑了，有眼吓。店呢侪关脱了，路也寻勿着，寻着两只老头子。两只老头子呢勿大认得，又寻了两只老头子，一共四个老头子，陪牢阿拉两个女个一淘走。寻着了，搿老头子还特地提醒我拿手机放放好，现在看来呢，是我自家忒大意了。搿是疏忽一哦。到了宾馆呢，阿拉拿物事寄存了就跑了，地图也没拿。而且呢搿前台还打电话，我还哇啦哇啦勿睬伊，搿是疏忽两。然后呢一路里向还看牢手机导航，搿是疏忽三。其实呢，当中还有只蛮吓人个细节。辣海老城已经关门个商店旁边，旁边呢睏了个人，搿人靠了柱子高头，眼睛就搿能瞪辣前头，勿晓得是死人还是活人，我吓也吓杀脱了。
但是当时辰光也想勿着介许多，阿拉其实当时辰光已经接近出来老城了，马上要出来了。辣陌生头一只黑颜色影子，搿只小赤佬应该勿会超过十五岁。黑衣裳黑裤子，精精瘦，拿了我手机就跑了。我哇啦哇啦穷叫，我思维混乱哦。当时辰光老自然出来段英文，就想了去追。伊熟门熟路望墨黜黑地方跑，我辣陌生头觉着我勿好再追了，毕竟人家地头蛇嘛，人家搿搭熟我搿搭勿熟。搿辰光路旁边阿拉伯人侪拨我叫声吵醒，问我哪能回事体啊？我就讲了，阿拉小朋友搿辰光辣海老城门口嘛，吓杀脱了。搿个阿拉伯人老板蛮好个，还拨伊水吃，勿要钞票个。还有路旁边个小姑娘陪阿拉去报警。结果到了埃面搭警察局，伊讲：勿属于伊拉管，属于另外只警察局管。
后头我到了车站，我就打了当地个报警电话。当地警察倒是来了，拿阿拉搿部车子也拦牢了，勿让车子开伊讲。一车阿拉伯人等阿拉两家头。我讲坐车要到托泽尔去，后头伊拿阿拉个护照拍照片，伊讲要末等侬回来再到CASBAH搿只警察局去也来三个。
来车子高头呢我拿所有想到报失个卡全部报失了，可以停脱个卡全部停脱了。还用阿拉小朋友个手机开了另外一只微信，拿损失也算减少到最小嘛。毕竟搿只手机也是旧个，而且国产手机，唯一个遗憾就是搿点照片了。不过重要个照片阿拉已经发辣网高头了已经。还比较刮三个呢，是天朝吹辣比较结棍，比较结棍个一只12306，我想伊拉吹辣介结棍末我就打打。结果人家问我人有事体伐？我讲人没事体。伊讲葛侬用勿着来寻阿拉。当时辰光呢我有点怪阿拉小朋友，听信人家推荐，选了介戆只酒店。后头想想呢还是自家勿好。不过呢搿能一来我倒真个决定要调酒店了。
突尼斯到托泽尔搿只车子呢是过夜个车子，就是讲开了一夜天个车子，开了老长老长辰光。就是晃啊晃，每晃晃晃我醒一醒，问托泽尔到了伐，人家讲没到。又晃一晃，再醒一醒。我讲托泽尔到了伐?没到。过了老长辰光，再到托泽尔只站头。之前联系好个只突尼斯个搿沙漠个老板嘛，帮阿拉寻着个司加导，就是司机加导游嘛，伊来埃面搭等阿拉。埃面搭个人呢倒蛮好个，阿拉到了搿只车站之后呢，伊拉还帮阿拉开开搿种厕所间啊，叫阿拉刷刷牙齿啊啥物事。倒是蛮好个，好上只厕所个。没多少辰光，阿拉到个辰光，没多少辰光，然后搿司加导就到了，伊然后就拿阿拉接走了。阿拉是要到托泽尔有得半天个当地个旅游嘛。
摄影：小女生施维雅
口述：小女生施维雅
听写：神死恸瞑
编辑：神死恸瞑
点击
联系客服
