龙哥阿算昆山人？
▲来自网络
昰趟“昆山龙哥”亇事体真亇是弄得全国出名，也行全国人民亇目光再次聚焦于昆山昰个全国第一县。但是，昆山人民作兴觉着冤枉得来！只棺材根本就不是昆山人嘞！哪恁全塱话“昆山龙哥”？！昰个撘上趟伊个短寿塱上海校门口杀人一样，新闻标题写“上海一男子”哪恁哪恁，弄得上海人呴透呴透！噢明明不是上海人嘞弄得人家当上海人一样！
昰种问题哪恁处理嗫？的确也蛮难处理。为啥？因为人们最自然亇认识就是：辰光、场许、人物、事体。
上趟亇事体，就是：6月份，上海，黄某，持刀行凶。
昰趟亇事体，就是：8月份，昆山，龙哥，持刀行凶。
当昰排要素结合著一俦作为新闻标题或者畀人们转述，几乎不可避免亇出现“上海一男子”撘“昆山龙哥”亇讲法，昰个的确符合人们最自然亇表述，就像佷讲着外地发生亇事体，也会蛮自然亇讲何塱亇一个啥人哪恁哪恁，而根本不会去深究昰个人到底阿是当地人，但因为不是讲着自家昰塱，故嘞根本不会去在乎当地人民哪恁想法，总贯按照大家最自然亇讲法来。但是若然碰着自家地方上啧，乃么发骤啧。毕竟，地名后头加人物，的确存在歧义——既有可能仅仅是交待事件亇场许、人物，也有可能是表明该人物亇地域归属。而对于事发地亇本地居民来讲，自然不希望昰点垃圾合著自家头上——尽管，若然是好事体，嗰么哪怕只是搭着眼边亇外地人也要算著自家地方上亇。就像明朝末年号称“嘉定四先生”亇著名文人，实际上一半是安徽人，但朆看见啥人一定要去撇清关系话只有能话“嘉定两先生”，还有两个根本不是嘉定人，呒能算著塰亇。
故所以啊，某个人阿算某地人，实际上交关辰光是一只头痛加蛋痛亇主观认同问题。通常总贯是：
好亇，哪怕只是撘本地俦搭眼边，也要算著本地，甚至可能会宣传为因为本地风气好嘞受著熏陶嘞做出昰种好事体亇。
恘亇，哪怕已经撘本地俦有相当密切亇关系啧，也要尽量撇清关系。若假实在是本地透本地透赖也赖不脱亇，乃么就去尽可能挖眼啥物事出来争取替佢翻案，想拿本地亇污名揩脱佢。
但是，昰个毕竟只是一只主观认同亇维度，还有一只客观亇维度——就是一个地方亇人口，到底有几许？何里排人实际上已经构成著昰个塱亇人口？昰个具有一定亇客观性。当然，相关机构会得作出一个专业亇统计。就我伲一个普通老百姓来讲，最直观亇评判方式，作兴就是跑到一垯户荡看街路上么阿闹猛，房子、车子么阿多，而不会去像查户口恁仔细甄别里乡何里両个么算昰塱人，何里両个么不算亇，因为佷一眼望出去，佢垯全存在著昰垯户荡，全处于昰个场许亇经济运行中，尽管开饭店亇、送快递亇、造房子亇、搞装修亇両个作兴大多数全不是本地出身亇，但硬碰硬佢垯构成著昰个地方正常运行亇一部分，若是话昰排人不算昰塱人，嗰么由佢垯切实撑起来亇相应行业也呒能算昰塱乡，像蓬勃发展亇建筑业啊、餐饮业啊昰排对于城市繁华程度具有至关重要作用亇行当及其产品全呒能算著本地头上啧。但问题在于，昰种繁华景象倒常常是本地人津津乐道、引以为傲亇家乡名片，尽管昰种繁荣著相当程度上是海海万万亇外地人胱出来亇，但本地人乐得其所，乐意拿佢归为自家家乡亇发达表现。但同时嗫，本地人从心理上又必然是对昰排外地人排斥亇。也就是讲，既望著有人来承担脱昰排自家不想做亇生活，为自家创造出一个更加适意、繁荣亇环境並增加自家亇地域自豪感，同时又希望昰排人覅出现著自家亇地盘上。
从人亇本性来讲，就是昰恁想亇，也蛮正常亇。但是，毕竟，事实上，又是不可能做到亇。昰个撘又要马跑又要马不吃草是一样亇。可以讲，昰个是开放社会环境下，发达地区必然面对亇问题。地方发达，必然吸引大量人口流入。大量人口流入，又进一步提升地方亇城市化撘繁荣度而不至于落后于其他竞争者。哪怕塱相对封闭亇古代么啧，成为繁荣大都会亇场许也是伊排开放通达亇户荡，昰个看历史就可以晓得亇，不是靠人亇排外本性就可以犟得转亇，因为人除脱著排外亇本性，还有追逐利益亇本性，而逐利本性是越加强大亇，故嘞必然照样会通过借房子撘上饭店嘞厛经济活动拿外地人牢固亇揿著本地，行佢垯事实上成为本地人口亇组成部分。
何塱么外地人不会来？贫困地区么外地人不来。贫困地区倒的确是接近纯本地人环境，但可能本地人也还是更加希望背井离乡朝外去做外地人，尽管家乡全是本地人——昰个就是纯本地人地区亇代价。而对于经济发达亇多外地人地区，本地人虽然也有交关到海外去做外地人，但毕竟对于大多数人来讲是呒得迫切需要朝外谋生亇，昰个是福利，但代价就是不得不面对海海万万亇外地人撘自家俦共享家乡。
就网上粗略亇信息大概可以晓得，龙哥好像已经塱昆山盘踞长远啧，阿是十几年也已经有啧？佷话佢阿算昆山人？出昰种恶性事件大家全不肯承认佢亇。但还有交交关关像龙哥昰恁已经长期生活著昆山亇人嗫？佢垯阿算昆山亇组成人口？佢垯参与亇各行各业阿算昆山亇经济规模？昆山神州第一县亇殊荣阿有佢垯亇功劳？从客观上来讲好像是否认不脱亇。尽管本地人心理上肯定排斥亇。但所谓再排斥么啧，仔细去剖析，昰排外地人来到昆山，啥人提供亇语言交流？啥人提供亇居住场所？啥人提供亇经济来源？何里个昆山本地人逃得脱？问题就在于此。昰个就是神州第一县必然面对亇问题。
不过，昆山当然不是头一个面对昰种问题亇场许。我伲来看看一百年前亇神州第一县——上海。今朝包括昆山著塰交交关关亇发达县市，轧实就是塱再现当年亇上海，只是上海县是现代都市大发展最早亇伊坒。一百年前亇上海，就像现在亇昆山昰恁各路外地人铺进铺出，超过著昰个县本地亇人口，甚至多出一到两倍。从现在各个发达场许本地人对外地人亇排斥情绪来看，完全可以想象得出一百年前亇老上海县民是几样亇怨声载道！若然当时就有网络是现在翻翻地域攻击帖肯定也一长拖。毕竟排外也是人亇本性之一，呒啥不好意思承认亇。
但问题在于，饶佷讨厌佢么啧，佢照样会源源不断亇来。好地方啥人不想去？而佷也必然通过经济联系拿佢吸牢著本地。即使佷不承认佢，佢硬碰硬也成为撘佷一样稳定出现著本地亇人。佷话佢不算昰塱人，但好像历史最终会追认。上海因为起步早嘞昰一系列亇过程已经真实亇展示著我伲面前啧——上海县1843年初开埠嗰歇儿终人口50万介仔，1910年达到129万，1927年上海建市嗰年达到264万，1943年当时范围亇上海市330万，到著1949年达到著540万！初解放统计，上海本籍人口只有15%！也就是讲，所谓上海亇人口几几年达到几许，几几年达到几许，根本就不是上海人亇数量，而是少得可怜亇上海人亇数量加上多得吓人倒怪亇外地人亇数量！但现在啥人去分？因为昰点外地人亇急剧增长本来就撘上海城市亇迅速崛起互为因果亇，作为现在亇既得利益者，根本就不会去追究，横出现著一座世界级亇繁华大都市，横自家养出来嗰歇儿昰点人全已经塱上海啧。
外加，有一点不得不指出亇是，现在亇上海城区人，普遍就是近代移民亇后裔，晏亇伊坒是爷娘就还是刚来亇外地人嘞！但因为近代上海外地人实在是多得豁边，以至于，外地人几乎完全拿本地人盖没脱啧，上海城区范围里正式亇本地人已经成为绝对少数。昰支庞大亇移民群体，必然对自家近代从外地来打拼亇祖辈进行追认。
若然话人口统计上拿近代海量亇外地人统统算成功上海人口具有客观性，嗰么拿近代著上海塘上活动亇各支人群全称为上海人而不是外地人，不得不话是带有主观认同性亇一种追认。昰排人，佷去盘盘看，几个是上海本地人？拆穿著讲就是一大坒塱上海闯荡亇外地人，就撘现在来亇両个外地人一样亇。甚至，有意思亇是，三个外来亇黑道头头、流氓大亨，竟然号称“上海三大亨”。杜月笙虽然老家高桥后晚来划畀上海市啧，但硬碰硬当时辰光不属于上海大都市，照现在上海人欢喜讲亇，就是乡下人。但为啥现在不单不看见上海人义愤填膺亇呼吁改变“上海”三大亨亇称呼，甚至像煞还颇有眼自豪亇拿佢垯宣传为上海历史上浓墨重彩亇一笔？虽然讲起来饶恘亇人也总贯不是一无是处亇，也有优点撘贡献亇，但硬碰硬黑道、流氓亇罪恶是揩不脱亇，相对上海大都市来讲，外来人或者乡下人亇身份也是板上钉钉亇事体，嗰为啥还要承认佢垯是“上海”三大亨？可能，就是，一是佢垯亇主要事迹客观上发生著上海，撘上海昰个地方俦息息相关，对于人们亇普遍认识来讲，可能就是遵循最简单亇“场许+人物”亇模式来称呼亇，就像昰趟网上传亇“昆山龙哥”一样，还有可能就是因为现在占据主导地位亇上海城区人昰支庞大亇群体就是当年像昰両个大亨一样亇外地人，要强调自家是上海人而不再是外地人，也需要对历史进行一眼模糊处理。就像常庄讲着亇近代“上海人”哪恁哪恁，佷确定讲亇是上海人而不是塱上海亇外地人？若然按照昰只口径，嗰么现在来到上海亇外地人的确也可以称为上海人啧。问题在于，交关现在亇上海人，承认近代来亇外地人是上海人，而不承认现在来亇外地人是上海人，可能是因为昰恁亇：
1. 人总贯是最关切自家亇现实感受亇。近代亇人群杂居、碰磕、融合，自家朆亲身经历亇，看见亇只是一只只冷笃笃亇统计数据，拆穿著讲不管佢哪恁统计，自家不会得真正哪恁痛嘞痒亇。而当代亇人群杂居、碰磕、融合，自家正著垯亲身经历，从人亇本性来讲，必然是对不同于自家亇人群存在排斥心理亇。
2. 人总贯是以自家为中心亇，一定渴望自家被接受，却未必乐意接纳别人。会为自家或者祖辈亇移民寻找理由，甚至美化，但未必认同别人亇移民具有正当性。
但不管主观哪恁认为，从客观上看，历史事实摆煞著塱：自从1843年上海县开辟为通商口岸之后，外地人大批大批亇涌入，著垯县城外头胱出著一大爿新亇城市化地区，成为著当年亇全国百强县第一名，甚至成为远东第一大都市。到1950年外地人达到著登峰造极亇85%。后首来塱廿世纪五十年代到八十年代亇封闭期，人口相对稳定，近代亇几百万外地人撘少得可怜亇几十万老本地人全部融合，形成著现在内部互相认同又对外有所区别亇上海城区人，著世纪之交新一轮亇城市发展中，又有一大坒一大坒亇外地人涌到上海，撘之前已经稳定下来形成认同亇上海人产生矛盾，现在正处于昰个阶段。而未来会哪恁，参考历史就可以晓得啧。
而上海因为起步早，现代都市发展亇整个脉络已经清晰亇呈现著我伲眼门前啧。2018年亇昆山就相当于1918年亇上海，前后两个全国百强县第一名，前头一个已经昭示出后头一个未来亇走向。神州第一县，外地人必然蜂拥而至，本地人必然通过经济联系吸牢外地人，最终本地人比重越来越低，外地人比重越来越高，但两者又会以语言融合作为核心标志合二为一，无非只是近代大家不会北京音嘞外地人只好学会本地闲话，现在大家全会北京音嘞直接一拍一脗缝，但最终外地移民后裔全会宣称自家是更大、更高、更繁华亇新城市亇主人。而到辰光以外地移民后代为主体亇昰支新亇人群看待现在亇昰段历史，必然不同于现在昰坒本地人亇想法，佢垯作兴会拿像龙哥昰恁已经长期生活著昆山亇外地人统统模糊亇称为昆山人，就像现在亇上海人拿近代上海滩上亇外地人模糊亇称为上海人一样，而龙哥昰恁亇角色，无非就是像近代上海塘上交交关关剥田鸡、剥猪猡、抛顶宫、背娘舅、种荷花亇流氓、黑道一样，虽然是为非作歹亇坏短寿，但因为蜂拥而至亇外地人里更多亇是切实繁荣城市亇建设者，最终佢垯亇后代必然会更强调自家祖辈对昰座城市亇建设性作用而並不真正在乎混杂其间危害地方治安亇坏棺材，甚至可能照样有人拿龙哥举报他人犯罪亇义举挖出来著宣称“盗亦有道”，就像现在有排上海人对近代外来流氓亇辩护一样。
故所以，龙哥到底阿算昆山人，的确是一桩头痛加蛋痛亇事体，最起码，对于还可以称为本地人亇讲昆山闲话亇土著居民来讲，肯定是极其不愿意承认佢是昆山人亇。但是，就像近代上海塘上胡横乱道亇各路外来流氓一样，是啥人塱提供语言交流，啥人塱提供居住场所，啥人塱提供经济来源，让昰个些儿些儿像龙哥一样亇人可以长期盘踞著本地为非作歹直到“扬名全国”败坏本地亇名声？昰个值得每个本地人深入亇思考。
疁·浏河长江
2018年9月6号 礼拜四
戊戌年 七月廿七
嘉定建县800周年
朗读：疁·浏河长江
排版：神死恸瞑
本平台暂未开通评论，大家可至吴语学堂微博留言：
新浪微博：吴语学堂微博
联系客服
