城市发展土著少
▲陈熙元 摄于海宁丁桥
交关人想不通：为啥城市亇运行会有交关外地人参与？实际上，纵观古今中外，佷会发现，城市亇发展，几乎不可避免亇有大量外界亇人口参与其中，特别是伊排特大城市尤为明显。因为城市化亇过程，本身就是一个大量人口朝城市集中亇过程，昰个侺犟也犟不转亇，而实际上，侺自家就塱参与其中。
世界知名亇大都会，像伦敦、巴黎、东京、纽约，历来是各路外地人亇汇集地，叛径也不会达到如此巨大亇规模，昰个佷呆想想也想得出亇。若然单靠人数有限亇土著居民，就算家家人家像落小猪恁开足马力“搁落搁落”养么啧，也未必有能塱成百上千亇城镇中脱颖而出。
就以纽约为例。我伲晓得，美国是移民国家。而美洲是有原住民亇。塱现在亇纽约昰只位置，著欧洲移民到来前头，原住民已经著昰滩生活啧。但是随著新大陆亇发现，越来越多亇外地人出现著昰块土地上。考虑着人与生俱来亇排外本性，侺完全可以想象得出当时亇原住民是啥个心情。但是，原住民一是人少，二是生产力落后，自然而然就会畀源源不断亇外地人覆盖脱——荷兰人、英国人、爱尔兰人、德国人还有非洲人。昰排外地人成为著纽约亇主体人口，並切实建立起著一座纽约城。
纵观世界历史，人口永远著塱流动。若假着眼于“现代人类起源于非洲”亇观点，嗰么非洲以外所有大洲亇人口全不是本地人。但事实上，对于已经长期占据某地亇人口，人们通常已经认为佢是本地人啧。我伲可以认为，纽约建城早期已经长期生活著该地亇欧非移民也算本地人啧。但是，故事当然尚未就此结束。时至今日，纽约还是全世界外地人追逐梦想亇场许。也就是讲，纽约著塱持续至今亇繁华过程中，始终伴随著全球外地人亇参与，而早期亇嗰坒来自欧非亇本地人，甚至更早亇美洲土著，著昰座城市里还铤剩几许比例嗫？从人亇排外本性来看，面对每一个陌生人亇出现，本来亇本地人真亇发自内心亇欢迎？但啥人真亇在乎本地人欢迎不欢迎？佢只要有能著昰座城市里寻着居住地，觅着一只城市需要亇岗位，就可以塱昰滩立定脚头，成为昰座城市亇一部分。每个来此追逐梦想亇外地人，全塱不断亇胱大纽约城亇规模，为新一坒外地人亇涌入开辟道路。而对于天下民众来讲，啥人在乎纽约到究有几许本地人？到究阿是本地人建设成亇？根本不在乎！在乎亇仅仅是——纽约是一座繁华亇大都市！我也要到纽约去！
好，乃么回转来看我伲中国亇情况。我伲晓得，唐代亇长安是天下公认亇大都市，但昰座大都市汇集著几几许许海内外亇外地人？而人们为啥向往亇是昰种到块全是外地人亇大都会而不是伊排基本全是本地人占据亇封闭场许？或者换一只角度来讲，为点啥昰种外地人轧进轧出亇户荡会成为闻名天下亇大都会而不是伊排纯清本地人组成亇封闭社会？同样，后首来成为超级大都会亇北京也逃不出各地各族外地人向心汇聚亇模式，直至到乃。
若然再拉近眼看，无论从时间还是空间上全近到眼门前亇上海，昰种城市发展脉络越加清晰可见啧。苏州府嘉定县、松江府上海县，本来全是阿哥兄弟脚碰脚亇。但是近几百年，随著水利、航道条件亇变迁，本地区亇航运中心转移到著上海（港）。而六百年前郑和下西洋亇起锚地，还是当年嘉定县北部边境号称六国码头亇刘家港，也就是今朝属于太仓亇浏河镇。上海县城上海镇，本来就已经是松江府东北一个巨镇，上海港取代刘家港成为本地区航运中心之后是愈加获得著长足发展。据悉，到1843年开埠之前，上海城已经成为著全国排名前列亇大城市，只是还不像后来昰恁显赫。
但是，值得注意亇是，开埠前上海城规模亇膨胀，也不是纯清本地人养出来亇结果，作为一个已经具有一定地位亇港口城市，已经有不少外地人塱上海县城一块落户，据悉同处东南沿海亇广东人、福建人具有相当亇数量。就像今朝亇上海港、浏河港，佷去看看看船上亇人阿全是本地人？但佢垯也俨然成为著昰座港口城市亇一部分，绝对不是佷要佢来佢就来，要佢跑佢就会跑亇。佢亇来去是由每个人参与亇强大亇经济规律决定亇。
若然我伲就粗略亇拿上海县开埠前头著上海县常住亇人全算本地人么啧，嗰么开埠后一百多年亇人口变化也足以令人弹眼落睛！初开埠，上海县人口大概50万户荡。到著初解放，当时范围亇上海市，也就是不包括后来划进去亇各个郊县，人口达到著500万级别！多出来亇四百几十万人何塱来亇？话著全本地人像落小猪恁“搁落搁落”养出来亇？拆穿著讲大多数不就是外地人？有亇逃难来亇，有亇就像现在一样怀揣著上海梦来寻求发展多扒分亇。当然佷可以话19世纪中后期来亇外地人两三代以后也算本地人啧，但即使昰恁，初解放统计出来塱上海亇人口厡旧是85%全不是上海本籍亇。
但是，全天下全晓得亇，上海城亇迅速崛起、脱颖而出，甚至上海闲话亇大发展、大繁荣，呆呆调就是畀海内外各路外地人轧爆脱亇昰一百年。哪恁成为远东第一大都市？硬碰硬先要有足够亇人口规模牚著塱亇。而昰恁亇人口规模明显不是靠本地人开足马力生产就有能实现亇。故嘞佷只要赞赏远东第一大都市亇地位，就呒能否认近代海量外地人对上海城市亇建设性作用，尽管同时也滋生著奸诈盗伪各种乱象。无非就是，当年亇昰坒外地人经过融合，已经本地化，也就是构成著现代上海城区人亇主体。若然不是近代昰坒外地人胱出昰恁一个大都市，嗰么现在亇上海厡旧就只是像青浦、金山、奉贤、南汇昰排普通亇县一样，属于江苏省松江市，而像我伲嘉定、宝山、崇明，可能厡旧属于江苏省苏州市。尽管苏州府、松江府著历史上具有相当突出亇地位，但塱现代未必会像北京、广州昰恁显赫。近代巨量海内外移民朝上海县亇汇集，不单行上海城超越著自家亇府城松江撘苏州府城，外加行上海一跃而成为全国亇龙头乃至世界闻名亇大都市。
某种程度上来讲，一部上海近代史，就是一部外地人大闹上海滩亇历史。佷想，佷去回顾上海历史，一个个人物盘出来看，几个是上海本地人？但昰坒外地人全算著上海历史上，因为佢垯亇诸多事迹的确发生著上海昰块土地上，佢垯亇生活轨迹构成著上海昰座城市运行过程亇一部分，外加，佢垯当中交关人亇后代，现在厡旧生活著垯上海昰座城市里，並以上海人自称。尽管，我伲完全想象得出，开埠前亇老上海人，对于后首来蜂拥而至亇外地人，肯定是讨厌亇。19世纪就来亇已经融合亇老外地人，对于20世纪刚来亇也想分一杯羹亇新外地人也是排斥亇。而截止到20世纪已经稳定生活著上海亇新老外地人对21世纪刚来亇外地人当然还是排斥亇。因为人亇本性就是排外亇，呒啥不好意思承认亇。但是，塱强大亇经济规律撘城市发展规律下，人亇排外心理又是脆弱得不得了亇！
问两只问题就可以理解：
侺到底是更加讨厌外地人嗫还是更加欢喜铜钱？
答案明显是后者。故嘞我伲可以看见有千千万万亇本地人塱借房子畀外地人嘞收房租钱。
侺到底是更加讨厌外地人嗫还是更加欢喜美食？
答案明显也是后者。故咾我伲可以看见每个本地人全会去光顾外地人亇饭店通过提供经济来源来供养外地人。
昰个就是为啥塱整个城市发展过程中一方面伴随著土客矛盾冲突，一方面又根本不可能阻挡外地人亇蜂拥而入——确切亇讲，本地人嘴面上像要阻挡，而实际行动就是著塱不断亇吸引，但交关人全看不见昰点，当著冷嘲热讽骂山门就叫阻挡啧，乃么继续我行我素亇借房子、上饭店而不肯为自家亇主张真正落实行动，昰个就蛮戆啧。
实际上纵观上海城市亇崛起史，现在厡旧还是著塱持续著从开埠至今亇移民潮，无非只是廿世纪五十到八十年代相对比较封闭，迁入人口较少而已。 而塱封闭稳定亇时期里形成著较强烈亇上海人意识，塱新一波亇移民潮到来之时，显得尤为不适应。交关人对“新上海人”亇称呼嗤之以鼻，甚至可能坚持认为上海人亇数量仍然只是1400万。但是看历史数据嗫，一八几几年上海人口达到著几许，一九几几年上海人口达到著几许，还不是不管本地外地全部照单全收亇？因为佢着着实实成为著上海昰座城市亇一部分，无非只是当年亇外地人现在已经本土化啧，並且与资格还要老亇本地人一俦排斥现在新来亇外地人。但是完全可以想象，一百年后亇上海资料里，现在亇人口资料就撘廿世纪、十九世纪亇人口资料一样，不管本地外地，全部全算著上海亇人口里。只是到著伊个辰光，现在还互有矛盾亇各支人群，又会融合成新亇上海人，就像近代各支外地人撘上海本地人融合成现在亇上海城区人一样。
但是，到伊个辰光，自认为上海人亇所有个体可能已经不会上海闲话而只会使用北京语音啧，也就是讲，著语言方面已经不存在与其他人群亇显著区别。因为现在各支人群普遍掌握著北京语音，互相交流直接切换到北京语音顶顶便捷，已经丧失著转用对方乡音亇迫切性，更何况现在上海人使用北京语音思考撘表达亇能力已经高于甚至远远高于上海语音啧。
而近代嗫，为此著各支人群普遍不会北京语音，普遍只会用自家亇乡音表达，互相碰头，为著交流顺畅，必然要塱大家亇乡音中达成妥协。结果为此著各支移民势均力敌，而当年亇地主上海本地人全是稳定亇使用上海语音表达亇，具有完整、全方位亇社会使用，乃么每坒外地人来著自然而然就浸会著上海闲话，结果像滚雪球恁拿上海闲话越滚越大，甚至迅速超越著苏州闲话亇地位，以至于出现著一个奇观就是，现在讲上海城区闲话亇，弘扬上海城区闲话亇，多数全是近代外地人亇后裔。昰个就像美国一样，据悉英国裔亇美国人已经不占多数，但为此著英国裔塱美国早期亇基础性作用，导致全球各地亇外地人来到美国社会全必须迅速适应英语环境一样。昰种效应一直持续到近二三十年上海人自家上海闲话亇使用能力支离破碎为止。
但是语言转用无法掩盖土著居民畀移民覆盖亇事实，塱上海城区人口里，几个是当年亇上海本地人？但历史事实清爽得不得了——老上海人不单朆攩牢当年蜂拥而至亇外地人，倒转来已经服服帖帖亇融合于移民组成亇都市人群中，甚至著语言方面也不再崇尚标志自家土著身份亇本地闲话而越加崇尚已经完全占优势亇由海量移民进行过重大改造亇上海城区闲话啧。但昰个就是现实，人拆穿著讲就是随势而动亇，啥人已经取得优势地位就会崇尚啥人，就像现在北京语音已经取得著优势地位，全上海亇人全已经越加崇尚北京语音一样。一百年后就是全上海亇人只会用北京语音宣称自家是上海人。
从上海城亇崛起来看，移民亇大量涌入持续到乃。但是，从嘉定城亇膨胀来看，好像只是近二三十年亇事体，傍上海城晏著满濌喇百三五十年。当然，为此著近代上海城亇急剧膨胀撘行政区划亇调整，使得嘉定县变成功著级别陡升亇上海市亇下属区域，厡旧只是普通县城亇嘉定城成为已经变身为超级大都市亇上海城亇卫星城，故所以嘉定地区亇人口变化也是整个上海城市人口变化亇一部分，但就城镇起源来讲，又具有相对独立性。最起码，塱老上海县民已经畀外地人轧得脾气也呒曼亇辰光，嘉定县人口厡旧保留著相对亇稳定性。故咾当近廿年各路移民蜂拥而至亇辰光，习惯著传统本地人封闭天下亇嘉定人像煞显得来得个不适应。但是，规模性亇现象背后，必然有普遍性亇原因，可以讲是一个人也逃不过亇。若然呒能理性亇去认识问题，嗰么只好自家苦痛。
尽管改革开放前，嘉定城里已经有一部分早期亇外地移民，听说讲苏北人撘绍兴人比较多见，当然，身份语已经转用为嘉定闲话亇，事实上也就已经融合著嘉定人里啧。塱当时普遍不会北京语音亇语言环境里，浸会迁入地方言並不是难事，因为昰个是生活硬需求，就像移民美国板要会英语一样。昰种状态可能类似于开埠前头上海县城已经不乏广东人、福建人亇状态。但总亇讲来，还是比较封闭亇，顶起码撘后首来亇开放状态俦是完全呒能比亇。
大概八九十年代亇辰光，嘉定城里撘城郊结合部开始逐点逐点造公房，一直持续到乃，乃么乡下人逐眼逐眼开始买房子出来。像我伲屋里是属于比较早出来亇乡下人。我也算是亲眼乌珠见证著嘉定城逐步扩大亇过程。小辰光伲点亲眷普遍厡塱乡下头亇，现在嗫？除脱著老亇，全出来啧。人口汇集撘城区扩大是互促相长亇过程，就像近代移民拿上海城从一个普通县城硬胱成一个大都市一样。
记得老底住著李园一村亇辰光，楼上望出去，环城河外头就是乡下人家啧嘞！北城河桥竖下去就是田嘞！后晚来嗫？看著外头亇菊园小区逐点逐点造起来，同样成为闹猛亇城市化地区。再加上东南老城外亇迎园，西南老城外亇南苑，一个本来基本局著环城河里亇嘉定城不晓得大著几壳！像伲恁海海万万亇乡下人全买房子买出来啧呀！
好，乃么昰塱涉及着一个问题啧：佷话，嘉定乡下人，阿算嘉定城亇土著居民？佷话整个嘉定县亇人全互相认同为本地人，昰个呒不问题。但是，真要认真讲起来，嘉定各乡镇撘嘉定城俦，本来也是相对独立亇不同亇生活小区域，像我伲出来前头就是以自家亇乡镇为中心活动亇，甚至撘嘉定城俦不大大搭界亇，但现在搬到著嘉定城里倒是撘自家亇乡下老家俦要不大大搭界快啧！事实上硬碰硬也发生著迁移，只是因为距离较短，不大容易畀大家认识着。但实际上，昰种迁徙，就是城市化过程中整个人群大迁徙亇缩影。故所以，迁移到嘉定城亇人口，当然不可能只有嘉定县范围里亇人，还会有全上海、全中国乃至全世界亇人。只是嘉定县范围里亇人迁徙距离最短，撘嘉定城亇原住民俦地域亲切度最高而已，但是，毕竟，嘉定乡下人也不是嘉定城亇土著居民。更何况，佷塱买房子亇辰光【阿曾】问歇嘉定城老居民阿欢迎佷出来？我撘佷话，真未必欢迎！嘉定城乡之间同样存在矛盾，根据各方面信息可以晓得，嘉定城老居民中同样有不希望乡下人蜂拥而至亇想法，只是相对于距离更远亇外区外省人来讲毕竟距离近点。再讲，经济规律撘城市发展规律决定亇大趋势，攩也攩不牢，也只好逼著自家适应。
而嘉定乡下人嗫，可能还不觉着自家轧实立著人家亇地盘上，还认为自家作为嘉定人，著嘉定县范围里买房子天经地义。故嘞，佷也的确难怪，上海城区人认为自家著上海市范围里买房子天经地义亇，外省人也认为自家著中国范围里买房子天经地义亇，外国人也觉着：“我著地球村里西宅跑到东宅上有啥不可以啊？”
故所以，佷看现在嘉定城亇人口组成——嘉定乡下人、上海城区人、外地人，巷尽巷是，到块全是，倒是现在嘉定城所在地亇本地老居民，明显已经成为著少数。乃么佷话嘉定城到底属于啥人亇？是土著居民亇还是外头人亇？轧实啥人真亇在乎？大家看见亇就是一座城，从本来一个相对单薄亇、人口不多亇小县城，发展成现在一座颇具规模、人口众多亇现代化城市。大家全要轧到昰座城市里享受现代化亇便捷生活，同样自家全成为昰座城市正常运行必不可少亇一部分。警察里有嘉定乡下人，医生里有上海城区人，教师里有外地人。
乡下警察话：“我塱维持治安，我也塱为昰座城市作贡献！”
上海医生话：“我著救死扶伤，我也著为嗰座城市作贡献！”
外地教师话：“我在教书育人，我也在为这座城市作贡献！”
佷话佢垯【阿曾】话错脱？是朆错亇呀！但佢垯本来阿是昰座城市里亇人？根本不是。但啥人在乎？城市化本来就是吸纳各路人力资源汇聚亇过程，犟也犟不转亇。像嘉定东南角江桥、桃浦、长征昰排城市化地区，本地土著还剩几许？绝对不是佷像囡细恁发忹劲：“覅呀！我覅人家来呀！”就会改变亇。
城市化，作为人类社会发展亇必由之路，必定有其合理性，昰种合理性就是由包括佷我著塰所有人亇内在需要所决定亇，我伲为啥捱著昰座城里不肯回老家亇原因就是佷亇内在需要，就看佷阿有能认识着，或者认识着著阿肯承认。当然，著城市发展过程中必然伴随著交通拥堵、环境污染、治安恶化嘞厛城市病，撘著本地居民乡土情怀受到伤害亇问题。但是，昰一切，全不可能攩牢城市化进程，因为，侺倾向于城市化亇还一面需要更加强大——侺一定会一如既往亇通过借房子、上饭店来满足自家对美好生活亇向往，同时也就通过实际行动供养著同样望著与佷分享城市生活亇其他人。
总数，城市发展土著少，大家一定要理性亇看见昰点。若然单片面看见自家亇排外需求而像囡细恁发嗲劲，只是为社会增加负能量，不解决问题，甚至塱制造还一种城市病，並不真亇有利于佷热爱亇昰座城市。
疁·浏河长江
2018年8月10号 礼拜五
戊戌年 六月廿九
嘉定建县800周年
朗读：疁·浏河长江
排版：神死恸瞑
本平台暂未开通评论，大家可至吴语学堂微博留言：
新浪微博：吴语学堂微博
联系客服
