啥个闲话正宗标准？
▲Yuko酱 摄于苏州藏书
近年来民间语言资源保护亇声势越来越浩大，但同时对于一个问题始终争论不休，就是“到究何里塱亇闲话么正宗、标准？”乃么常庄有人畀出来亇答案么就是当地中心城镇亇闲话么叫正宗亇、标准亇。言下之意就是——其他乡镇或者乡下头亇闲话，全是不正宗、不标准亇，用不着加二认真得还要去保护昰排区域亇闲话，弄也好覅弄啧！有亇人甚至明白无误亇表示：“要么不弄，要弄就弄正宗亇！”而佢所理解亇正宗，正是本区域内中心城区亇闲话。
但是，若然按照昰恁亇逻辑弄下去，还搞啥语言资源保护嗫？推普片面性亇一个表现就是有排人塱试图行大众认为：“讲汉语就要讲正宗、标准亇汉语。哪恁亇汉语正宗、标准？呶，就是近现代以来最终确立亇以北京语音为标准音来全国推广亇冠以'普通话’名称亇昰种闲话。”言下之意就是：“像尔垯昰排啥山西闲话嘞、四川闲话嘞、广东闲话嘞、上海闲话嘞啥全是不正宗、不标准亇汉语，好讲也覅讲啧！”不就是昰恁一种逻辑？既然大家意识着昰种逻辑对语言资源具有破坏性，为啥自家又要坞到昰只逻辑里去啧嗫？
原因，可能就是在于，我伲社会语言学知识亇普及忒个薄弱啧，以至于啥个是语言，啥个是汉语，根本从来朆搞清爽歇！昰个也是推普过程中某些片面做法有处获得大众盲目跟从亇重要原因。
语言撘任何事物亇分类一样，是一个抽象亇统称，每个人讲出来亇实际上是属于昰种语言亇某一个具体地点亇方言。方言是语言亇存在形式。英语是一个统称，伦敦、纽约、旧金山、新加坡……每个地方讲出来亇具体亇英语就是佢当地亇伊支具体亇英语方言。汉语也是一个统称，北京、上海、广州……每个地方讲出来亇具体亇汉语就是佢当地亇伊支具体亇汉语方言。就像人一样，每个人全不一样亇，但根据共同特征可以归纳为男人、女人，或者黑人、白人、黄种人，但全是人，有人亇共同特征。何里个人不是正宗、标准亇人？但何里个人呒曼自家亇特色？房子也一样，车子也一样，台子也一样……万事万物全可以昰恁理解。
乃么我伲回到语言本体。汉语是汉语区千千万万地点方言亇集合体，只有精确到某一个具体亇地点么有能抽出一套具体亇语音标准——何里両只声母，何里両只韵母，何里両只声调。所谓普通话，用亇就是北京闲话亇语音系统，本质上也是汉语昰棵大树上亇一䓝叶头，撘广大汉语区任何一个地点亇精确亇汉语语音全是平级亇。广州闲话与其一级，苏州闲话、上海闲话当然也与其一级。无非就是选择著北京闲话亇语音系统来全国推广帮助大家跨区域交流而已。
当然，上头话着亇北京闲话、广州闲话、苏州闲话、上海闲话，也只是粗略亇讲法，可以先理解为特指或者狭义指称昰几座城市市中心昰只方言点亇具体亇汉语。但是，众所周知，有人就有语言，任何人讲亇闲话全属于某种语言，但同时讲出来亇一定是昰种语言亇某一个具体亇地点方言。我伲就以上海地区来讲好啧。上海城区闲话是一支具体亇汉语，同时，广大亇上海郊区千千万万亇人讲亇闲话同样也是一支支具体亇汉语。
昰个标准具体到哪恁嗫？我伲就以声韵调系统一致、音类分合特征一致为一套具体亇标准。以嘉定地区为例，包括我伲华亭地区著塰，分东西两路朝南绕过嘉定中心地区，一直兜到马陆中部。昰个嘉定外圈，实际上语音是基本一致亇，只是少数用词不同而已，可以看成功是一套具体亇汉语语音标准。昰套标准，声母27只，昰个是包括无锡、苏州、上海、嘉兴最起码中心城区著塰亇本地区现代汉语普遍亇共同特征。声调6只，古汉语亇平声、上声去声、入声各分阴阳，昰个本来就是语言学界划分出来亇整个嘉定方言区亇共同特征。
差别点，集中著韵母上。我伲昰支汉语亇具体标准，古汉语侯韵字，“兜风”“偷窃”“头顶”“楼房”，“兜偷头楼”，我伲发ɘ韵母，当然不同区域音值可能稍些有眼差别。而包括娄塘镇中心朝南、徐行镇中心朝南到嘉定镇一块亇嘉定内圈，侯韵字发ɤ韵母，读tʌɤ\ thʌɤ\ dʌɤ\ lʌɤ\。与此同时，古汉语灰韵帮组字，“杯子”“胚胎”“培养”“梅花”，“杯胚培梅”，嘉定外圈也发ɘ韵母，而嘉定内圈发iɪ韵母，读piɪ\ phiɪ\ biɪ\ miɪ\，或者稍些低一眼，读e韵母。
乃么嘉定内圈内部，嘉定城里撘城外又有一组不同：古汉语麻韵字，“山楂”“丫杈”“调查”“黄沙”，“楂杈查沙”，内圈城外部分撘我伲外圈一样是ɤ韵母，而城内，有一部分人是发o韵母亇，最起码《嘉定方言研究》上调查着亇发音人是发o亇，读ʦo\ ʦho\ zo\ so\。
好，我伲就先粗略亇拿嘉定中北部亇汉语语音标准归纳为嘉定外圈、嘉定内圈城外、嘉定内圈城里昰三套。再加上其他区域，像外冈、南翔、黄渡、江桥嘞厛，毛头毛估，我伲就先当分布于嘉定区境内亇现代汉语有十套具体亇音系。乃么，昰十套，何里套不是正宗亇、标准亇汉语？撘北京、广州、苏州、上海昰両个市亇中心城区亇汉语一样，何里套不是汉语昰棵大树上亇一䓝叶头？何里套不是来自汉语昰棵大树亇同一个树根、同一个树身？
但是，为此著交关人是不晓得昰个原理亇，全是片面崇拜某一行政中心亇地点方言亇，故嘞会出现看似不同，但内在逻辑完全一致亇表现：
讴，何塱亇汉语顶顶正宗、标准？呶，北京亇呀！其他地方亇全是乱七八糟亇土闲话！
讴，何塱亇上海闲话顶顶正宗、标准？呶，上海城区亇呀！郊区亇全是杂乱无照亇乡下闲话！
讴，何塱亇嘉定闲话顶顶正宗、标准？呶，嘉定镇上亇呀！城外昰排乡下人讲亇闲话哪恁可以算正宗、标准亇嘉定闲话？
乃么，是人全会讲人话，嗰么，请问：顶顶正宗、标准亇人话是何里塱亇闲话嗫？
昰种逻辑，撘语言资源保护亇精神完全是相悖亇，昰个厡旧只是强调语言沟通价值亇逻辑。
语言有交流沟通撘文化传承两大价值。若然片面强调交流沟通，嗰么全世界只要一种闲话就可以啧，咋嘞烦得又要么英语，又要么汉语！若假片面强调文化传承，嗰么所有亇人只要会讲只有自家伊支人群会亇闲话就可以啧，咋嘞还要跨区域、跨人群沟通？故所以，世界上所有亇人，既掌握辐射力广亇通用语，又维持好只有自家伊支人群使用亇非通用语，就可以既满足跨区域、跨人群交流沟通，又可以尽最大可能亇保留语言文化亇多样性。
但可惜，当人们开始觉醒，觉着自家地方上亇语言资源要防止受通用语过度影响而消亡亇同时，又开始塱本地区寻觅所谓最“正宗”、最“标准”亇伊个地点方言，重新拾起片面推广通用语亇思路，实在是可悲！
现代汉语任何一个地点亇语音全是从共同亇祖先古汉语传承而来亇，大家全是正宗亇古汉语亇子孙，大家全是正宗亇现代汉语，不在于佷住著皇城嗫地方，住著街上嗫乡下。就以前头话着亇侯韵字来讲好啧，“兜偷头楼”：
北京读tou- thou- thou/ lou/，说明古侯韵字，现代汉语北京语音读ou韵母。
上海城区读tɤɯ\ thɤɯ\ dɤɯ∨ lɤɯ∨，说明古侯韵字，现代汉语上海城区语音读ɤɯ韵母。
上海嘉定内圈读tʌɤ\ thʌɤ\ dʌɤ\ lʌɤ\，说明古侯韵字，现代汉语上海嘉定内圈语音读ʌɤ韵母。
上海嘉定外圈读tɘ\ thɘ\ dɘ\ lɘ\，说明古侯韵字，现代汉语上海嘉定外圈语音读ɘ韵母。
佷话何里亇地点不正宗？不全撘老祖宗古汉语俦对著煞齐亇？若然话嘉定外圈侯韵字读ɘ叫不正宗亇嘉定闲话，嗰么嘉定内圈读ʌɤ阿是叫不正宗亇上海闲话？上海城区读ɤɯ阿是叫不正宗亇汉语？因为首都北京读ou呀！昰恁不就是片面推普亇逻辑咾——讲汉语要讲正宗亇汉语！何塱亇汉语正宗？呶，北京亇汉语正宗，佷垯昰排不正宗亇汉语全应该废弃！
但为啥有亇人一方面意识着要塱北京语音亇覆盖下保护上海闲话，一方面又奉行“只有上海城区闲话叫正宗亇上海闲话”？还是伊个问题——语言知识普及忒薄弱啧——交关人根本不晓得上海闲话就是汉语，就是汉语亇具体形式之一，还停留著“上海闲话是上海闲话，汉语是汉语”亇思维。
当然，也有人会钻牛角尖，片面强调“上海闲话就只有能指上海城区闲话，上海郊区亇呒能叫上海闲话”“嘉定闲话就只有能指嘉定镇老居民亇闲话，城外亇全呒能叫嘉定闲话”，一定不承认对整个行政区域亇广义称呼。好，可以，用不着争，因为民间本来就会存在泛指整个行政区域亇广义称呼撘特指中心城区亇狭义称呼，俗称本来就蛮难有绝对亇权威性，必然会出现有人坚决不承认广义称呼亇情况——尽管以“留存乡音”为宗旨亇保护“上海闲话”亇活动塱上海郊区也广泛开展。不碍，嗰么我伲就拿语言学亇专业划分来讲，乃总明确啧嚷？！
北京、上海，全属于汉藏语系·汉语言。
北京属于汉语言·官话方言。官话方言，佷可以近似亇理解为北方方言。
上海属于汉语言·吴方言·太湖片。
太湖片下头亇划分学界有不同版本。一种分法是上海属于苏沪嘉小片；一种分法是上海就属于上海小片，包括嘉定嘞些儿郊区也属于上海小片。
乃么上海地区内部嗫，学界也根据语言特征进行著细分，对于包括上海城区著塰亇主要位于吴淞江南面亇松江大方言，分法撘命名上几位大家稍些有眼不同，但对位于吴淞江北面亇嘉定方言区，或者叫嘉定片，划分是相当一致亇，叫法上本质也一样。
乃么我伲看，从华亭兜到马陆亇嘉定外圈阿属于嘉定方言区？撘嘉定内圈俦同样属于嘉定方言区呀，撘宝山亇罗店、月浦嘞啥同属于嘉定方言区呀！昰个是根据最重要亇具有一致性亇语言特征划出来亇，话著只有嘉定镇闲话叫正宗亇嘉定片方言？
嘉定内圈、外圈撘上海城区一样，同属于吴语·太湖片，话著只有上海城区闲话叫正宗亇太湖片吴语？
嘉定、上海城区撘北京一样，全是汉藏语系当中亇汉语言，话著只有北京闲话叫正宗亇汉语、正宗亇汉藏语？
昰恁一看阿就觉着某种认识有眼可笑啧？
世界上任何一个地点亇人讲亇闲话全属于某个语系、某种语言，並不在于昰群人生活亇区域或者相对亇地位就有正宗不正宗亇区别。叛恁侺永远想不通，《现代吴语的研究》撘《当代吴语研究》，选择亇几十只方言点里竟然有罗店、霜草墩昰恁亇点！还撘苏州城区、上海城区平起平坐嘞！照有排人亇逻辑完全想不通：“噢罗店连当县城也不是，霜草墩连当乡镇也不是，哪恁好算'正宗’亇吴语？！”佷昰个正宗不正宗，不是撘自家老祖宗俦比亇，而是塱看隔壁老王，嗰自然想不通！
乃么还要好孛相嘞！有趟有人指著一个上海城区妇女话：“佢讲亇是正宗亇吴语/沪语啧噢！”言下之意我伲上海郊区亇叫“不正宗亇吴语/沪语”。嗰就以谐音亇“妇女”为例来讲好啧，同样全是妇女，为啥住著城里就叫正宗亇妇女，住著乡下头就叫不正宗亇妇女？到究不正宗著何塱？大家身上全昰点物事呀！
事实上，每个精确地点亇闲话，无论城市乡村，全是一套完整亇体系，语言三要素——语音、词汇、语法，一样不缺，全有自家亇相对标准，其中语音标准最最明确，声母、韵母、声调就昰両只，明确可数。词汇虽然浩瀚无边，可能来源不一，但全可以用本地明确亇语音表达出来。佷想，若然呒没一定亇标准，世界各个角落里亇人是哪恁用佢当地亇伊套闲话来完成生活所需亇？就像上头举亇例子：
嘉定外圈，侯韵字发ɘ韵母，昰个就是嘉定外圈亇汉语语音标准。
嘉定内圈，侯韵字发ʌɤ韵母，昰个就是嘉定内圈亇汉语语音标准。
上海城区，侯韵字发ɤɯ韵母，昰个就是上海城区亇汉语语音标准。
北京，侯韵字发ou韵母，昰个就是北京亇汉语语音标准。
何里塱亇闲话不标准？不在于佷北京音全国推广嘞就叫“佷是其他地点汉语亇语音标准”啧，用北京音来衡量上海音，岂不滑稽？同样，用上海城区音来衡量嘉定音，用嘉定内圈音来衡量嘉定外圈音，也是蛮滑稽亇事体。
正宗、标准，应该是以本地点昰套精确亇汉语为衡量依据。若然互为标准，以其他地点亇标准来作为本地点亇标准，拿佢看成功是自家亇“正统祖宗”，昰种认识本来就不恰当。外加。如果昰恁认识，不会覅搞语言保护亇咾！大家全以北京音为正宗、标准么还讲啥其他汉语嗫？索介再彻底眼，一步到位认著“伦敦音”为正宗、标准么好啧，省得人话多得乱七八糟不统一！
总数，人类语言，看似纷繁复杂，但精确到任何一个地点讲亇闲话，全有一套具体亇标准，昰个标准全是从与其有亲属关系亇其他地点方言亇共同老祖宗传承下来亇。人类语言分成功几大语系，同一语系内部亇各种语言具有共同历史来源，语言亇具体标准全是要精确到某一个具体亇地点方言亇。昰个是语言学亇基本原理。若然我伲拿一个语系比成功一棵树，嗰么人类语言全部全可以整合成几棵树，有棵树叫印欧语系，有棵树叫汉藏语系，有棵树叫阿尔泰语系，还有其他几棵树。我伲就属于汉藏语系昰棵大树，叶头饶多，全著昰棵树上，撒也撒不脱亇。我伲每个人讲亇昰个地点亇闲话，全是昰棵树上亇一䓝叶头，不管侺著一座城市嗫还是一个乡镇，从语言本质上来讲全是一样亇。嘉定外圈、嘉定内圈、上海城区、北京城区，讲亇全是一支支具体亇、正宗亇汉语、汉藏语，各自全有自家亇精确标准。
塱语言资源保护亇实践中，一方面要注意覅仗著城市中心自诩“正宗”“标准”来压制周边地区亇语言文化，还一方面也要有意识，讲得正宗、标准亇乡音是啥？绝对不单单只是昰个户荡亇乡音，而是撘北京语音俦平起平坐亇同样正宗、标准亇汉藏语系·汉语言！
疁·浏河长江
2017年8月21号 礼拜一
丁酉年 闰六月三十
嘉定建县799周年
朗读：疁·浏河长江
排版：神死恸瞑
本平台暂未开通评论，大家可至吴语学堂微博留言：
新浪微博：吴语学堂微博
你还可以通过以下方式联系我们：
投稿信箱| wugniu@126.com
联系客服
