▌超市里的面包
上趟阿拉讲到阿拉到了杜布维罗尼克了，搿呢也是阿拉蹲克罗地亚最后一天。阿拉前头一天呢拿杜布维罗尼克老城城墙走了一圈。从C字个一只头走到另外一只头。阿拉第二天呢阿拉主要个计划就是缆车，帮白相套票里向剩下来个几只景点。 ▌超市里的牛奶 其实呢讲老实闲话，搿天早饭哦，港口跟汽车站附近没啥好吃个。不过呢因为为了寻到缆车个车子，阿拉意外个寻辣只超市。而且呢搿只超市个价钿蹲辣搿老贵个里向，简直噢便宜得来一塌糊涂。阿拉老样子，买了三只面包跟一大罐牛奶。 ▌跟作者同名的店 当中呢其实是阿拉跑错脱路了嘛，走多了一站，然后呢，倒意外寻着帮我名字一样个店，也蛮好白相个。因为否则个闲话阿拉勿可能存心走过去个嘛。讲起搿只缆车个来回票呢，是150库尼一张。比较搞笑个呢，是阿拉有得200现金，还有信用卡，我本生想帮伊讲，搿两张票子先用现金付，勿够个闲话呢就拉卡。然后呢搿卖票子个老阿姨哦，居然回答我一句伊没办法分开结账。好伐，葛末我一张一张买，一张用现金，另外张用信用卡。虽然其实是一样个啦。
▌在山顶俯瞰老城风景
搿缆车呢一路走到山顶，搿风景倒是蛮好看个，阿拉大家看到一只半岛呢就是只杜布维罗尼克老城嘛，就阿拉昨日子逛个地方。然后一只像乌龟一样个岛蛮好白相个。山顶下头个平台高头呢，有一只十字架，加上克罗地亚个国旗，传统高头呢克罗地亚是信仰天主教个，就是跟巴西一样个嘛，所以我发觉伊拉侪欢喜搿种样子个装饰。山顶搿种地方，搿狗粮多是多得来勿得了，拍拍照片就碰着狗粮唻。所以呢阿拉就干脆乘缆车先下山，阿拉下山之后呢继续望下头走，回到老城去看剩下来个搿点老城个景点。
▌克罗地亚国旗和十字架
搿天出门个辰光蛮有劲个，阿拉看了看天气预报，瞎好白相。伊高头写8点钟、10点钟、12点钟、14点钟、16点钟各一阵雨。开始以为开玩笑。结果搿天真个是搿能介伊讲。而且搿点雨哦，落个辰光有点大。阿拉呢只好老努力个蹲辣老城里向走，但是实在是雨忒大了。
▌小鱼火锅
最后阿拉只好蹲辣一家像大排档一样个饭店里向躲雨。正好看到呢，三个德国小男人辣海吃阿拉昨日子没寻着个搿只小鱼个火锅，伊拉还辣吃搿青口贝嘛。搿三只小男人呢侪是90后，是到杜布维罗尼克来白相个，不过呢侪长了勿大好看，其中只有一个有女朋友。然后呢赶快送拨伊只礼物，主要我想拍伊拉个照片嘛，吃个物事个照片。
▌方济各修道院
之后呢阿拉又冒雨去了老城另外只景点，教堂跟方济各修道院。路高头呢阿拉还买了只冰淇淋，看到旁边只流浪猫蛮好白相个。其中呢阿拉吃好冰淇淋之后呢就跑到方济各修道院搿里向去参观了。方济各修道院个回廊呢还是蛮赞个，伊只修道院门口呢就是著名个叫修道院药妆店。专门卖各种各样个药妆个。
▌修道院的流浪猫
▌方济各修道院的回廊
修道院里头哦，有只超级戆个物事，就是一块板，一只头末，挖了只洞，难末每个人跑上去，拿自家头伸了只洞里，难末假装是方济各会会士。本生想介戆个合影啥人要？没想到竟然老外还来得个欢喜。之后呢阿拉就去了就前头一天没去成功个远离老城个只城堡嘛。搿只城堡比较大，需要呢之前城墙票子一淘再好免票。我必须讲呢我还是比较欢喜搿种窗个。阿拉速度是蛮快个，十分钟里向，搿只城堡全部参观结束。参观好之后呢，阿拉到下一站去。到科托尔去。
▌城堡的窗
从杜布维罗尼克到科托尔呢仍旧坐大巴。因为是克罗地亚最后了嘛，阿拉已经没足够个现金支付行李费了。看到阿拉现金勿够呢，搿只售票员，只小男人嘛，就讲算了。
科托尔呢是属于黑山个，黑山入关个地方呢竟然有得wifi，蛮好个，勿要钞票个。不过呢，讲起来搿部车子高头印了有得wifi，其实就是入关个辰光搿点WIFI。搿只广告又老大兴个。
▌有意思的餐厅
到了黑山之后呢，我跟搿只小男人谈谈了。难末伊讲伊94年个，有女朋友个。好，然后我又送拨伊只礼物。只小男人开心是开心得来勿得了，用自家个手机帮阿拉联系黑山个女房东嘛。搿女房东特地来汽车站接阿拉个。伊还让阿拉蹲辣旁边，等辣海嘛，然后伊呢一家头去停车场去帮阿拉等搿女房东。等女房东到了之后呢，再叫伊个同事，就是搿驾驶员过来接阿拉。
黑山个女房东呢之前跟我讲过，阿拉订个搿间房间没了，伊帮阿拉调一只更加大更加好个，价钿一样个，我想想也可以啊。到了埃面，好是蛮好个，山中个一间木头房间。周围环境闹中取静，离汽车站也勿远。唯一个缺点噢，搿家人家，后头个家人家有只老大个狗，吓杀人了。
▌餐厅的青口贝
讲起到了科托尔呢，已经是吃夜饭辰光了。阿拉就马上到老城去吃夜饭嘛。老城个后门呢，因为修路关脱了。所有个人只好望前门绕一绕。就辣海老城个门口勿远呢，我看到一家老好白相个餐厅。好白相个呢，因为我看到搿家……因为黑山是用欧元个嘛，用欧元个地方大家侪懂个，肯定算算是贵个。但搿家店呢，三文鱼汉堡跟青口贝侪勿算贵，味道也蛮好个。但是缺点呢就是，也勿是搿家人家啦，所有人家侪是个，埃面搭个青口贝里向是勿汏个。
▌餐厅的服务员
搿搭个黑山服务员呢还硬劲要拨我伊个FB。然后呢我无聊，我真个打开FB嘛，发觉伊FB高头侪是跟老婆晒狗粮个。而且估计伊后悔伊拨我自家FB了，一直没加我。
▌乞食的猫咪
吃了汉堡呢，一只猫咪还爬到阿拉台子旁边来要吃个伊讲。搿只猫咪还老挑食个哎，阿拉拨伊青口贝个壳还覅吃伊讲。
▌科托尔老城的教堂
讲起科托尔呢，虽然黑山整体以东正教为主个，但是呢老城里向个教堂好像交关还是天主教个。
摄影：小女生施维雅
口述：小女生施维雅
听写：神死恸瞑
编辑：神死恸瞑
本平台暂未开通评论，大家可至吴语学堂微博留言：
新浪微博：吴语学堂微博
联系客服
