▌东正教神父
讲起从贝尔格莱德到索非亚呢，确实搿条路线蛮神奇个，因为呢，伊没直达个啦！难末只好从塞尔维亚一只西南部个城市嘛，叫尼什，搿搭中转。之前呢莫名其妙拨坑了180第纳尔搿进站费。不过还好，搿行李好联运个嘛，就等于讲，少付只行李费。噢哟，不过搿搭哦，感谢一下尼什express搿只阿迪斯先生帮阿拉买票子。因为搿只赤佬本生呢要提前一个礼拜再好买，后头呢我帮伊讲了讲，第二天就好买了。
然后从贝尔格莱德到尼什个路高头呢，阿拉注意高头有五只阿拉逼，听口音呢好像是篱笆男，就是黎巴嫩个人嘛。伊讲好像是一个老师带了老婆还有三个学生子出来。我大概真个是搞了错乱了，我看到搿帮阿拉伯人我还觉着阿拉倒坐对了车子了。通常辰光交关天朝人勿会得觉着个。
贝尔格莱德到尼什呢大概三个钟头，到了尼什汽车站之后呢就阿拉两家头帮五只阿拉伯人拨叫下来，让阿拉拿护照交拨伊拉。好像老外侪要提前帮边境高头要报备个。我还特地用阿拉伯文问问看搿老师，我讲㑚是勿是到索非亚去，伊讲是个。本来尼什到索非亚车子到达是八点五十分，我车子高头睏了一觉醒过来，感觉哪能停了一只看上去两旁边侪是山个老刮三个地方。看到两个边境个警察叔叔来拉只拉杆箱，然后只阿拉伯人老师拨叫下去了，我还帮小朋友讲了：侬看噢，阿里搭有阿拉伯人，阿里搭就有安检。闲话刚刚讲好，隔手发觉勿对唻！搿两个警察叔叔来拿阿拉个箱子。哦，搿赤佬，我马上冲下去哦。搿警察阿姨问我，伊讲是侬自家整理个箱子伐？我讲是个呀，问我搿里向有点啥，我讲我就一点自家用个物事呀。还让我自己拿箱子打开。警察阿姨还拿箱子里向个姨妈巾摸了摸。我心里想：阿姨，侬没用过卫生巾咾？挨下去伊让我关好了。后头来阿拉小朋友个箱子也拨叫下去开箱了。
就因为搿只耽搁，阿拉个车子到索非亚个辰光已经十点钟唻。晏了一个多钟头哦。本来阿拉计划是坐，阿拉搿天子就十点廿分搿天搿班车子，出发站是西站嘛，阿拉为此还大手笔计划了全程唯一一趟拦差头。阿拉当时辰光连行李都来勿及寄哦，直接拖了行李就跑噢。然后呢，乌龙又出来唻。因为保加利亚文呢是毛毛字母，我直接拿离线导航个定位拨开差头个老爷叔看，搿老爷叔老光眼镜，就看到下头一只Ovcha Kupel，没看到高头个小字：汽车站。然后伊拿阿拉开到Ovcha Kupel搿只中心之后老得意个跟阿拉讲：到了，㑚阿里搭下车？阿拉急杀脱唻，难末老爷叔搿再戴好眼镜，发现高头还有排小字：汽车站，搿再开过去。
阿拉到了汽车站已经10:40分了，问了一个汽车站卖票子个小姑娘。伊讲最早班车子要明朝唻，今朝个已经开了跑了。我问小姑娘有啥办法勿啦？伊讲可以到只地方中转，但是搿能算下来个闲话回来要下半天六点多，阿拉想想还是算了，因为来勿及看其他物事了嘛。搿辰光阿拉再想起来，阿拉个厕所问题还没解决唻，所以呢也算了，阿拉否则个闲话车站厕所要钞票阿拉从来勿去个。阿拉呢投了0.5leva，阿拉先进去。然后呢一歇歇卖票子个小姑娘跑了。小朋友看看没人，试了拿搿进口个栏杆反过来转，果然顺利个覅钞票进了厕所。
上好厕所，刷好牙齿，阿拉出来再发觉，里向个小姑娘侪搿能上个伊讲，侪是搿能拿进口地方栏杆反过来进个。然后伊拉呢没零碎钞票，就拿投币个机器拆开来，拿里向零碎钞票。搿能一来呢，阿拉只好放弃一个世界文化遗产个一只修道院嘛，只好回到汽车总站。来门口呢坐5路有轨电车。5路有轨电车高头呢阿拉看到一个东正教神父。来一个东正教个国家里向呢，搿也是桩老平常个事体。
▌班尼查
阿拉没买索非亚一日票。有轨电车个驾驶员搿搭呢可以买票子个嘛，直接买票子。阿拉辣海离火车站最近个一站下车，走到汽车站行李寄存个地方。交钞票个地方呢，一只老爷叔，一只小赤佬。搿只小赤佬辣拨阿拉行李票个辰光还想帮阿拉白相一记土耳其男人冰淇淋个一套，就是豁发豁发勿拨侬。我直接冲上去拿伊两只手捉牢，拿阿拉两张行李票拿着，伊开心杀了伊讲。
▌从二楼拍火车站全景
寄好行李之后，阿拉开始吃昨日子蹲辣贝尔格莱德买个面包跟牛奶，当早饭吃。索非亚汽车站旁边呢有只角落头。好像就是当地老阿姨坐辣伊面搭茄山河啊，吃饭啊就搿种地方。吃好早饭呢，阿拉就开始白相搿索非亚了，就开始一日游了嘛。索非亚市中心只火车站市场还是蛮出名个，据说讲是原来火车站改建个。阿拉就蹲辣搿搭买了土耳其传统点心叫班尼查跟保加利亚酸奶。不过呢实事求是讲，保加利亚酸奶超级难吃，就跟阿拉伯人个酸奶一样个，我觉着有点上当了。
▌火车站市场外观
不过呢搿辰光又碰着一桩老严肃个问题，整个市场里向勿提供调羹个，而且勿同个摊位之间呢关系老差个，再加上搿搭免费厕所要排队。阿拉干脆到对过去吃物事。还好对过呢，就讲阿拉小朋友囥了一把毛毛航空个塑料刀，正好工具可以用来吃物事。
讲起来对过呢有只清真寺，保加利亚呢曾经是奥斯曼土耳其个领土嘛，所以讲呢市中心位置有只清真寺，阿拉吃光之后呢就蹲辣清真寺解决出个问题。关键因为勿要钞票，就排队短。保加利亚清真寺门口竟然看到一个穿了低腰裤戴头巾个女人，我也是觉着忒刮三了。
▌阳光下的索非亚清真寺
门口头呢是一个阿拉伯人老太婆。还跟我茄山河，伊讲自家瑞典人伊讲。噢哟，搿只面孔瑞典人。不过呢头巾老阿姨搿点蛮好。厕所间里向人勿出来，伊要去敲门伊讲。意思就帮人家讲：朋友，侬快点来，敲到出来为止。狠是伊拉狠个，勿光是敲外头人，伊个朋友蹲辣里向长辰光勿出来，伊也去敲，只物事结棍个。
▌博物馆
上好厕所呢，阿拉就去后头个博物馆。博物馆门口搿点矿泉水呢是当地土耳其人发掘个。当然咾，伊高头写个标语也蛮有劲个，高头写：勿好汏浴。估计有人冲进去汏浴。高头搿只清真寺占了只好地方，贴贴市中心，就是地铁两根线交汇个地方下沉式广场，搿点蛮好。
▌小教堂
▌女神像
下头下沉式小广场高头呢有只小教堂。觉着后头，对，伊后头有只议会大楼嘛。总归觉着好像后头有苏维埃标志。后头东欧剧变之后就拨咔嚓了。然后呢伊还有只女神个只像我也觉着老刮三个，穿了件黑衣裳，胸末特别大，搿算啥意思啊？路旁边呢还辣海考古。一路走过去呢，还有个警察，远看蛮好看个，结果拍照，拍照片拍下来，嗯，是勿大好看。搿条路高头呢，还看到总统府士兵个调岗。真个，让我想起怪鸭历险记里向两只蝙蝠：动作末慢得来像只霍闪一样个。不过啥路道啊，还有得摸屁股伊讲。
▌总统府士兵的换岗仪式
▌索非亚教堂
索非亚呢还有只老皇宫建筑蛮灵个，旁边有只圣尼古拉斯教堂跟东正教个修道院。因为之后阿拉修道院没去嘛，也算疗疗伤伐。索非亚教堂。就辣阿拉休息个辰光呢，路旁边碰着只讨饭爷叔，一副勿讨着钞票勿罢休个样子。然后我问伊，我讲钞票没，礼物要伐？伊讲好个呀，然后阿拉就拨伊一只。只赤佬拆开咪咪笑，讲谢谢伊讲。
▌索非亚老皇宫建筑
▌东正教修道院
一只索非亚教堂呢倒是索非亚城老著名个只教堂。搿只教堂呢金碧辉煌，就勿好拍照片个。阿拉因为怕拨毛亲阿姨抽嘛，冲上东正教堂里向还会得有几个看上去老结棍个毛亲老阿姨。勿敢尝试。
▌金碧辉煌的圣尼古拉斯教堂
外观是蛮好个。从另外一条路回去嘛。然后好像搿一片侪是各个部个部委，还有一只伊万·瓦佐夫一只剧院，来搿搭大学生蛮多个。搿个，其中有一个来吃面包个，不过也勿是老好看个。
▌伊万·瓦佐夫剧院
阿拉然后呢，又回到火车站市场后头嘛，搿呢就辣海清真寺个附近呢，还有只索非亚犹太教会堂。想起当年阿拉伯人帮犹太人是好呀，清真寺就辣犹太教会堂个对过。
▌犹太教会堂
▌Happy and Bar晚餐
之后呢阿拉就开始吃夜饭了。目标就是之前N个人推荐个Happy and Bar。搿只饭店哦，可以讲是旅途全程最算得上性价比个夜饭。搿家店呢就辣海Vitosa商业街附近。N个人蹲辣攻略高头侪推荐搿家。勿仅味道好，性价比高。而且因为搿家有寿司嘛，还有筷子唻。搿搭也好解决厕所问题个。因为阿拉辣海索非亚没订酒店嘛，解决大号问题就推荐清真寺隔壁一个犹太人开个一个叫TZUM Mall，搿里向厕所间人少清爽还安静还勿要钞票。
▌玫瑰水饮料
难末呢，讲起来搿只Vitosa商业街嘛，阿拉吃好夜饭就去逛了嘛。阿拉初中历史课个辰光呢，我记得老师讲过，当时辰光呢，毛毛老大哥，苏联老大哥嘛，帮各个社会主义国家侪分配了任务。天朝当时个任务呢就是发展农业，保加利亚个任务呢就是种玫瑰花。所以讲保加利亚个玫瑰花是老出名个。所以讲呢阿拉来保加利亚Vitosa大街高头呢，买买买对象呢就是玫瑰个制品。保加利亚个玫瑰花据说讲也是当年土耳其人搞来个，种类是大马士革玫瑰嘛。搿搭个玫瑰最好个牌子叫Bulgarian Rose，第二名叫Rose of Bulgaria。除脱呢带个礼物呢，阿拉还买了一罐吃个玫瑰水个饮料，也蛮有劲个。
▌烛光游行现场
阿拉买好之后回来呢，发觉阿拉又碰着新闻事件，阿拉搿已经第三趟碰着新闻事件了。阿拉买买买买好想回到车站个辰光呢，发现路拨堵脱了，交关人好像是辣盖法院门口头点蜡烛。难末阿拉问警察老爷叔，我讲啥事体？伊讲自家勿会英文。阿拉呢只好问一个大学生模样个人。伊讲其实警察侪会讲英文，但伊拉勿想告诉㑚。因为有一个人呢拨当地政府杀脱了，所以讲呢伊拉就用烛光仪式搿种方式呢来纪念伊。后来呢我网高头查了查，还真个寻着搿只新闻报道。不过其实也没啥，阿拉还是走到了汽车站。
本来呢，就是本来想去搿只MALL解决最后一趟厕所个问题个，结果呢因为MALL提前关门了，勿晓得是勿是因为搿只游行噢。阿拉就只好去对过个麦当劳。保加利亚个麦当劳厕所呢要密码个，然后呢服务员蛮好，还特地打了张空个单子拨我，告诉我密码。
然后呢阿拉从索非亚回到布加勒斯特个搿只车子呢又是Flix bus个车子。就跟阿拉第一部从德国到克罗地亚个车子一样个。阿拉蹲辣主汽车站两楼稍微休息休息，因为一楼没座位嘛，两楼有个。然后阿拉就到楼下头去拿行李了。拿了行李之后呢到隔壁停Flix bus个地方去等了海。搿搭地方还有一个梗，Flix bus伊只办公室嘛，门口头贴了张纸头：阿拉勿是问讯处，估计拨烦杀脱了。
到布加勒斯特个车子人勿多，反正停下来第一只服务区个辰光呢，我赶快去上只厕所。搞笑个是呢，蹲辣语言完全勿通个情况下头，我刚冲进去，老阿姨直接帮我指厕所间个位置。上好厕所之后呢，没多少辰光，就经过边境嘛，上车，敲图章，护照拨伊拉，敲图章，敲好继续睏。再醒过来，竟然看到所有人侪下车了，我以为当中停站唻，问问再发觉布加勒斯特到了伊讲。
摄影：小女生施维雅
口述：小女生施维雅
听写：神死恸瞑
编辑：神死恸瞑
本平台暂未开通评论，大家可至吴语学堂微博留言：
新浪微博：吴语学堂微博
联系客服
