当地语言优先
▲神死恸瞑 摄于庄行
轰动一时吤“团团门”事件已经过去有【弍两】年著,但铤拨我伲吤思考却远不曾结束。为啥会有人塱上海公然要求覅讲上海言话?原因固然有多方面吤,但我伲觉着,可能最根本吤问题出邋朆塱全社会树立起尊重当地语言吤理念。
首先需要大家注意吤是,覅听见“语言”就道著佢大透。语言只是一个抽象吤统称,话每种语言吤人实际上话吤是佢伊上吤嗰种具体吤方言。譬假我伲汉语,北京人话出来吤汉语是北京方言,上海人话出来吤汉语是上海方言,广州人话出来吤汉语是广州方言……若然精确到每个地点方言吤说话,实际上佢吤分布范围可能小到只有一个城区或者一个县,或者几个甚至一个乡镇。也就是讲,精确到每种具体吤言话,佢吤分布范围全是有限甚至是极其有限吤。
但是嗫,世界正垃【土耷】越来越开放,人口流动越来越频繁,为著便于跨区域交流,必然会选择某种通用度高吤言话来作为交流工具,例如我伲中国推广以北京方言为基础吤普通话,而垃全世界范围,眼看英语已经成为世界通用语,不管是向英国吤某种方言学习,还是向美国吤某种方言学习。
有一种通用吤言话沟通五湖四海,当然是一桩好事体,但垃昰个过程中,我伲必须要认识着,世界上每个国家、每个民族、每个地方全有佢伊上独特吤言话,昰种言话承载著佢伊上独特吤文化——而昰种言话本身,也是一种宝贵吤文化,是文化多样性吤具体表现。尽管从沟通范围上来讲,绝大多数吤言话全不及个别通用语,但对一个国家、一个民族、一个地方来讲,呒曼何里种言话有能取代佢伊上或者佢伊群人所使用吤言话。语言,有其独特吤文化价值,是呒能简单吤以沟通范围去衡量吤。叛恁,为啥全世界塱学习“伦敦言话”吤同时不放弃本国、本族、本地吤语言嗫?
但是,为著长期以来我伲垃推广“北京言话”吤辰光做著偏脱著,弄得像煞介仔只有讲“北京言话”么是应该吤、文明吤、上得了台面吤,而讲其他言话么全是不应该吤、不文明吤、上不了台面吤,导致我伲交关人对于非通用语缺乏包容性,甚至即使塱昰种言话本身吤分布区域也禁止佢使用,昰个无疑是对于语言文化吤野蛮扼杀。试想,若假全中国单铤剩“北京言话”,甚至全世界单铤剩“伦敦言话”,其他所有吤言话全死得割割裂裂,昰个是一幅几样可怕吤场景?人类有几几许许珍贵吤财富将彻底失传?!
我伲认为,既掌握可以大范围交流吤通用语,同时维持各地各种言话应有吤生存环境,昰个应该是比较理想吤状态。塱世界日渐开放吤今朝,我伲应该树立寔恁吤理念:“当地语言优先。”不管佷身在何方,无论是国内嗫还是国外,全应该对当地吤言话抱著一种尊重吤态度,要愉悦吤接受当地人优先使用当地吤语言——毕竟,伊上乡吤言话就分布垃佢伊个独特吤户荡,佷话若假儿教佢垃本乡本土也不许讲佢当地吤言话,嗰还教佢到何上去话呐?昰个本来也就是一滩户荡一道亮丽吤文化风景。有上海言话吤上海么是独特吤上海,有广州言话吤广州么是独特吤广州……若然全弄得像北京一样,千城一面,侺话著不觉着单调?当然,佷若是要撘当地人俦交谈,请求对方使用佷所懂得吤通用语,昰个也是合情合理吤,但是,佷不应该对当地人率先使用当地语言而表达不满,越加呒能要求当地人互相之间交流也要用通用语,毕竟人家自家俦里白话,呒不义务板要让佷听懂。若然因为有著外乡人吤进入而要求当地人全讲通用语,嗰实在是有眼过分著。试想:若假有外乡人进入佷吤家乡,不许佷吤父老乡亲用佷家乡吤言话交流,佷心里会哪恁想?话著不呴?!
当然,昰种理念吤推广,还需要各支人群放弃彼此间吤偏见撘歧视,甚至是仇恨。因为,客观讲来,语言是一支人群最核心吤特征之一,大家直观吤认识就是讲何里种言话就对应何里支人群。而不同人群之间,难免会有矛盾。矛盾无处不在,昰个也毋须讳言。地区之间常常存在偏见撘歧视,而国家之间、民族之间甚至可能会有各式各样吤恩怨情仇,以至于大家常庄会看见操某种言话吤人就触气。但是,语言本身是无辜吤、无罪吤,每种言话全有佢独特吤语言学、人类学、社会学价值,我伲一定要跳出世俗吤窠臼,从整个人类文明吤高度去珍视各种语言,切不可因为人群矛盾而推动某种言话吤消亡。当然,对于操各种言话吤每支人群来讲,哪恁树立自身吤良好形象,哪恁维持撘各支人群吤友好关系,也有助于为本地语言吤生存撘发展营造一个有利吤外部环境。
总数,希望“当地语言优先”吤理念有能成为我伲全社会、全人类吤共识,一道为世界语言文化吤多样性作出我伲应有吤贡献。
疁·浏河长江
2015-12-22 礼拜二
乙未年 十一月十二
嘉定建县797周年
朗读:疁·浏河长江
排版:神死恸瞑
本平台暂未开通评论,大家可至吴语学堂微博留言:
新浪微博:吴语学堂微博
你还可以通过以下方式联系我们:
投稿信箱| wugniu@126.com
联系客服