乾健·掩面·急险乎
▲悦济浮桥 囧月摄于兰溪
吴语里表示身体好、能干吤ʥiɑ2，长远以来本字一直不曾落实，要么取“伽”吤文读音，要么就拣著並不符合音韵地位吤冷门字记。但是，就像有排学者指出吤嗰恁——交关口语词吤本字轧实往往就是顶顶常用吤伊排字。根据昰个理论，只要转变思路，想想看昰个读音阿会得是属于其他层次吤，问题就可能迎刃而解。
吴语·嘉定言话读iɑ韵母吤，一般讲来总贯是中古汉语麻韵三等字。但是，昰恁顺藤摸瓜朆垦着何个意义符合吤字。乃么再想想看，阿会得是咸山摄字蜕脱著鼻音韵尾之后朆像其他字嗰恁变成功ᴇ、iɪ一类吤读音。因为有排咸山摄吤字有ɑ韵母吤异读，像“突然之间、花丽斑斓”嘞排，作兴是早一个层次吤读音。嗰么像昰个ʥiɑ2，若然按照大份字吤音变规律，可能是读ʥiɪ2吤，也就是咸山摄三等群母平声字。塱昰只音韵地位吤字里垦垦看，觉着“乾”蛮有嫌疑吤，平常脚只晓得“乾坤”“乾隆皇帝”嘞啥，但“乾”到究啥个意思，讲不出。乃么马上查网络《康熙字典》 http://hanyu.iciba.com/hanzi/4925_3.shtml，发现佢吤本义是“健”。乃么马上查“健”，佢吤意思就是有强壮、强健撘善于吤意思，撘吴语口语里ʥiɑ2“健康、能干”吤用法完全吻合，嗰么就基本可以肯定，“乾”就是ʥiɑ2吤本字。吴语里“ʥiɑ2健”昰个词，轧质就是“乾”“健”两个字吤叠加。
轧实昰个思路也来自于几年前头一趟吴语网友吤聚会。记得一位网友提出来话表示躲藏吤ʔiɑ1应该是“偃”嗫还是“掩”一类吤字。当时辰光我倒也还不大有概念垃许，晚见来学著汉语历史音韵学，想想好像确实应该是昰恁。查著查，“掩”昰个字最有可能 http://hanyu.iciba.com/hanzi/7040.shtml。遮蔽、掩盖吤意思基本对应于吴语里吤iɑ1，稍有不同吤是，最起码嘉定言话里吤iɑ1表示吤是人或动物自家去躲藏，若然是人行啥个物事去藏起来，是用“囥”吤。但“掩”吤意思好像有眼是拿啥物事囥起来。当然，整体吤意思全是“藏”。乃么还有一个意思“乘人不备而袭击或捉拿”，例如“掩杀”，好像基本对应于吴语里偷偷【辶\半】【辶\半】到人家上去【沙/目】【沙/目】看或者寻找吤意思，譬假讲“我本书不看见啧。”“呴，佷到别人台肚里去iɑ1 iɑ1看吤呀。”就是凑人家不晓得吤辰光去【沙/目】【沙/目】看吤意思。
昰两条意思全基本对应，外加按照音变规律，最起码声母、韵母全对得起来，极有可能就是本字。虽然口语里iɑ1是第一声，也就是阴平调，而“掩”是上声字，外加朆查着有平声吤异读，但是考虑着口语里常有声调变化，特别是上声字“找缴垦”嘞听拣实际读音常读平声，昰个差别可以忽略。更何况，“iɑ面”昰个词语可能就反映著iɑ1吤本调是仄声吤，因为佢吤连读调反映著前字应该是一个阴上或者阴去字，而昰个iɑ3/5不大像是优雅、雅观吤意思，而是躲藏吤意思。譬如：“一歇儿讲座我要豪【忄（灾/又）】早点去，拣只iɑ面点吤位子，慢慢晏去著位子全拨人家坐脱著坐垃前头批考卷阿不像吤？”可见昰里吤“iɑ面”应该就是想遮掩牢自家，讲座辰光要朽垃只角落头里覅拨人家看见自家塱批考卷吤意思。昰个iɑ3/5应该也就是iɑ1，昰个“iɑ面”极有可能就是“掩面”。总数，不管iɑ1还是iɑ3/5，本字应该就是“掩”。
绽外，还有表示垃紧急情况下推扳一眼眼吤“急ɕiɑ乎”，例如：“我今朝~拨部车子撞着！”为此著昰种讲法一般人家全觉着又是老嘞又是土，故嘞昰里吤ɕiɑ3，不大可能是“下”一类麻韵二等字吤读书音，而是某种越加古老吤口语读音。嗰么，昰个ɕiɑ3就极有可能是同为咸山摄三等字吤“险”，只是蜕脱鼻音韵尾之后朆按照一般规律变化到iɪ韵母而已。
再有，像表示一种面具吤“ɕiɑ3/5狐脸”吤ɕiɑ3/5，蛮有可能也是咸山摄吤“猃” http://hanyu.iciba.com/hanzi/6595.shtml，昰个字表示嘴长吤狗，撘狐狸一类吤动物有相似之处，蛮可能就是用昰两类动物吤面孔摆垃一道来表示昰样物事吤。
还有一坒口语里乡读iɑ韵母吤词，若是佷发现麻韵字里明显呒曼本字，也可以转换思路，去咸山摄字里垦垦看阿有，作兴会有所发现吤。
朗读：疁·浏河长江
排版：神死恸瞑
本平台暂未开通评论，大家可至吴语学堂微博留言：
新浪微博：吴语学堂微博
你还可以通过以下方式联系我们：
投稿信箱| wugniu@126.com
联系客服
