【前言】前昶，看见吴语学堂浪连牢有两期无锡场化山歌个推送，觉着蛮好，也让我想起仔十来年前搭苏州山歌个一段故事。
箇歇毕业弗长远，工作关系咾单位派我到乡下头去搜集山歌。小壗里儿歌么晓得几只嘅，山歌是从也朆听过，伽拉劲道十足。用仔终半年辰光，跑遍仔苏州城北虎丘山脚下每一个村巷，问会唱山歌个老娘家录山歌、记山歌。成果是寻着仔十几个会唱山歌个中老年人，录着一百多只长短山歌。后来为仔编本山歌书作为结项，亦翻查仔弗少关于吴地山歌个资料。白洋湾地区原来喇山歌浪蛮出名，八十年代记着过只长歌《赵圣关》，有万把行得勒。后来看仔文本么晓得，轧实故歇搜集个百把只山歌，绝大多数侪是《赵圣关》里个“段落”。原来长歌也是短山歌根据故事情节需要巧妙串联起来嘅，伽拉会唱山歌个人有“吊山歌”个本事。
太湖场化个山歌没落个哉，像煞会唱个侪要六七十岁宽则。现在田也弗种则，村也呒不则，娱乐活动也行情行事，山歌老早拨喇大家厾仔角落里去。看见公众号勾起实梗段回忆，箇么我也来共共兴，问亲眷好婆录仔只吴县版本个《十长工》，好搭宜兴版本对照仔看。巴望好叫更加多个人晓得，喇伲江南，民歌是实梗样式唱个。
【歌词】十长工
（蠡口登云桥 蒋阿三唱 录于20年5月）
长工做到正月中，姐汏衣衫郎上工。
路浪闲人问㐻到啰搭去，我暴时落难喇做长工。
长工做到二月里中，罱泥船出浜闹丛丛。
大舱小舱侪罱满，艄夹脊弗满要骂长工。
长工做到三月里中，山树花插起两边红。
细碎头蒲鞋相对百脚绕，啥人家田里出仔晃长工。
长工做到四月里中，挦秧田拔草闹丛丛。
上坵化到下坵住，搲乱稻种么骂长工。
长工做到五月里中，左手拿起黄秧，
右手端端唔个莳。抬起头来望烟囱。
长工做到六月里中，掮把耥耙到田中。
奴上坵耥到下坵住，窠里稗弗拔要骂长工。
长工做到七月里中，戏台孟姜闹丛丛。
把台把凳把勿着，奴揩台揩凳要长工。
长工做到八月里中，扛车掮轴要长工。
东车图搬到西车图，田鸡墩弗踏没要骂长工。
长工做到九月里中，挑担黄稻到场中。
上场挑到下场住，鸡扒狗倒弗送要骂长工。
长工做到十月中，东家大娘娘吃仔鱼干白米饭么喇大大叫睏。
长工吃仔稀汤薄粥浪牵夜砻。
长工做到十一月里中，淘米洗碎要长工。
十个节头管痛得个个会心痛，拉起柴来着火烘。
长工做到十二月里中，东家大娘娘廿四个算盘听听淌、淌淌听算还奴工钿。
奴吃仔廿四夜团子么还家转，开年弗做老长工。
图片：菜人人头
编辑：神死恸瞑
联系客服
