各位听众大家好，我是一名上海话爱好者，我叫小景。辣辣今朝个节目里向呢，我要来搭大家讲一讲关于浦东新区个历史变迁。
讲起浦东呢，现在大家应该是勿陌生了。现在个浦东啊是邪气个有名，勿光辣辣上海，辣辣国内以及国际浪向也有邪气大个影响力。葛末大家是勿是晓得，现在个浦东新区辣辣历史浪向个区划，是哪能变迁个呢？
今朝个浦东新区（也包括2009年并进来个南汇区），除脱北部地区属于原高桥乡以外呢，从唐天宝十年（公元751年）开始就属于华亭县。辣辣1291年上海设县以后呢，侪属于松江府上海县。到了清朝，随着经济发展，人口增多，需要分出新县。于是辣辣1724年首先辣辣上海县个东南部分分出新县，命名为南汇县。迭一年呢实际浪分出来个县是邪气多个。勿光是南汇县，宝山、金山、奉贤等县侪是辣辣迭一年当中分出来个。葛末分出南汇县以后呢，其他部分仍旧属于上海县。到了公元1810年，又从上海县搭仔南汇县当中分出川沙抚民厅，直辖于松江府。剩下来个部分呢仍旧属于上海县。
阿拉再来讲讲北部个高桥地区。高桥地区呢原来是属于嘉定县个，辣辣1724年嘉定县分出宝山县之后呢就划归宝山县，之后一直归宝山县管辖，一直到上海设市。到现在为止，迭块地方，就是原来个高桥乡地区啊，里向还有得老宝山城。原先呢有得嘉定县宝山所，那末宝山县个县名就是来自于高桥地区。那末原来讲个宝山宝山搿个地方呢，实际浪指个是现在辣辣浦东个，勿是辣辣现在个宝山区境内。
葛末到了民国以后，上海个级别开始提升了。直到后来设市搭江苏省并列，勿再属于江苏省管辖。葛末浦东个上海县管辖地区，就是洋泾、杨思、塘桥、高行、陆行、三林、陈行搿些地区，还有得宝山县个高桥，还有得南汇县个一部分（周浦市）侪划归上海市辖区。但是到了后来实际接收个辰光，只接收了洋泾/杨思/塘桥/高行/陆行/高桥，剩下来个部分仍旧由原来个县管辖，也属于江苏省管辖。浦东部分经过合并之后，成为了三个区，就是上海市个洋泾区/杨思区/高桥区。
解放以后，上海市个浦东部分从川沙县划进来一些地方。（1950年，川沙县部分地区划入上海市（浦东部分）（在划入之前，高行镇原来分属于上海市和江苏省）。南汇县部分地区划入上海县和川沙县。）到了1952年成立了东昌区，1956年洋泾/杨思/高桥三个区合并为东郊区，到了1958年又成立了上海市浦东县。到了1961年撤销浦东县，原来属于东郊区个地方划入川沙县，原来属于东昌区个地方呢划入黄浦/南市/杨浦三个区。原来川沙县、南汇县以及上海县浦东部分等地区1958年也划入了上海市管辖。1992年，黄浦、南市、杨浦三区浦东部分以及川沙县全部划归浦东新区。2009年南汇区并入浦东新区，成立了新个浦东新区。
好了，各位听众，今朝阿拉讲个呢是浦东新区个历史变迁，相信大家听了以后对浦东新区有得一个新个认识。好了，各位听众朋友，今朝个节目呢就讲到此地了，好了下趟再会。
新浪微博：吴语学堂微博
你还可以通过以下方式联系我们：
投稿信箱| wugniu@126.com
联系客服
