三门湾乡音
从读音及变调习惯上来看，广义三门话的区域远远大于今之三门县域。宁海、象山的南部区域，临海东部诸镇及椒北地区，甚至天台东乡区域，这么一大片范围内的语言相似度极高，这也是本公众号名为“三门湾乡音”的原因。
八月十六话中秋
今日八月十六，寔台州民间真正个中秋节，先祝大势家月圆人团圆，中秋快乐！
勿是浙东个人噢，听箇句话，装不落着还忖你神经有毛病，八月十五过也过爻，还走来祝你中秋快乐？欸，难讲起，我伲浙东沿海，台州、宁波、舟山，还有温州两搭坞荡，有几只月节蛮各别样相点个。何物月节呢？元宵节过正月十四；中元节，俗称七月半，过七月十四；中秋节过八月十六。今日要讲个，便寔中秋节。
为咋个浙东箇一片寔八月十六过中秋节呢？
讲法目劳劳，有几只一记望便不对，譬如讲有明朝时节台州状元秦鸣雷孝顺母亲，渠娘信佛，十五啜素，渠便畀中秋望后头推迟一日过。Khuaeh为咋个宁波也过八月十六呢？
宁波呢，亦是讲南宋宰相史浩八月十五箇日来不洎转得宁波屋里望老娘，便畀八月十六改子中秋节。问题是，为咋个台州也过、绍兴亦不过呢？
还有朱元璋约定八月十五起义个讲法，讲时间送迟爻，八月十六且送得台州、宁波。简直畀军国大事当儿戏。
也有讲寔元朝末年方国珍割据甬台温个时节，渠娘也信佛，十五要啜素，为之讲也望后头推迟一日。
一般来讲，形成一种民俗，都勿是一两年个事干，也不可能讲地方名人要求咋子，老百姓便跟牢咋子。可信点个讲法啦，大概还是佛教信仰跟政府政策上头个影响。
一、佛教影响方面：
唐朝便有写八月十六过中秋个诗。唐代诗人张籍在《祭退之》里向箇子写：“公因同归还，居处隔一坊；中秋十六夜，魄圆天差晴。”由此可知：八月十六过中秋，唐朝便有爻。
唐朝，包括落脚个吴越国，佛教都得知唣兴兴。单清浙东，鼎鼎有名个佛教胜地便有天台、普陀，有影响力个寺庙也整大揢，国清寺、天童寺、普济寺，一大堆，香火都兴得猛。浙东民间信佛个乡风也死兴。信佛个人，初一、十五寔要啜素个，你望每年个正月初一，多少人挤得寺庙去上香，去国清寺个车排得三门止。在十五过个节，扣便寔元宵节、中元节，还有中秋节，大概是为方便全家做月节，慢慢时便形成提前或者推后做月节个乡风，两搭坞荡还不止差一日。
二、政府政策方面
方国珍割据浙东廿年，统治台州、宁波、舟山，还有温州一部分，扣也寔且八月十六过中秋节个坞荡。方国珍得讲用地方政权个名义规定百姓要提前或者延后过月节，也不是不可能。
八月十六讲团圆，月饼肯定无之少。我小人时节见着个月饼，都寔筒装、纸包个苏式月饼，只加只大猛大，啜一只肚也饱爻。
还有麦焦，蛮多月节都要筒，八月十六也样。不管现筒现啜，还是煎来啜，味道都好得猛。
蛮多人还送月饼畀娘伯两边个亲眷，对过年拜岁样。
今年国庆、中秋放假连罅得放，第五日便寔八月十六。前四日在外头嬉高兴，八月十六好转得屋里望望娘伯，过我伲浙东自家个中秋节。
联系客服
