三门湾乡音
从读音及变调习惯上来看，广义三门话的区域远远大于今之三门县域。宁海、象山的南部区域，临海东部诸镇及椒北地区，甚至天台东乡区域，这么一大片范围内的语言相似度极高，这也是本公众号名为“三门湾乡音”的原因。
阿Q正传
第六章 从中兴到末路
等在未庄亦望着阿Q，寔箇年中秋扣对过爻个时节。大势家人都死奇怪，听讲阿Q来爻，都想上去问问相渠早装何物去爻。阿Q以前得城市头走带，老早便兴高采烈讲出去爻。箇次渠不响响转来，也无人留心着。渠大概对管老爷殿个老官头讲过爻也无数，反正在未庄，便只赵太爷钱太爷对秀才大爷箇三个人上城且算一桩事干，假洋人都还不算，难讲阿Q：为之讲老官头也（勿会）畀渠宣传，未庄也都无人识得。
渠阿Q箇次转来，对早整大揢不样，老蛮古怪个。黄昏脚，天要黑了，渠装来无困醒样，荡得酒店门口头，走得柜台横边，手拔出来，一满把银子洋钿，掼柜台的，讲：“现钿！酒打来！”渠着件新夹袄，裤腰上头一只满膯膯个大搭袋坠的，重猛重，畀裤腰带都拖ghuae3落去。未庄箇坞荡，得讲望着有头面个人，都要敬渠三分。且望阿Q对早穿爿衣裳个范子不样爻，“士别三日当刮目相待”，为之不管堂倌、掌柜、酒客，还是路人，都用敬仰个眼光望渠。掌柜头笃笃，讲：
“欸，阿Q，你转来啊？”
“唵，转来爻。”
“哦，发财发财，你寔在……”
“我得城里去爻。”
箇新闻第二日未庄便传转遍爻。个加个都想识得阿Q咋子发财，酒店、茶馆，便连老爷殿檐阶头都有人在吤问。慢慢时，人家也都问出来爻，接落去，大势家亦对阿Q恭恭敬敬。
听阿Q讲，渠寔在举人老爷屋里做忙工。大势家听讲寔举人老爷，都畀阿Q刮目相看。箇举人老爷姓白，反正在城里便只渠独个举人，讲着举人便识得寔渠爻，姓也用不着讲。不单单未庄，方圆百里以内都样，装得落脚，不识得个人还忖渠个名字寔出子“举人老爷”。在渠府上做生活，当然不一般喽。结果阿Q亦讲，渠且不想畀渠做爻，讲箇举人老爷畀渠装来（勿会）舒服，落晏渠讲讲还讲咄来。听个人都为渠可惜，私下亦有点高兴相。不去举人老爷府上做生活是可惜，讲转来阿Q也无箇资格去啦。
听阿Q亦讲，渠箇次转来，还对渠望不惯城市头人也有关。也便寔长凳讴条凳，用葱丝煎鱼箇络物事。间亦望着，箇城市头个女人连路走来都无范子。当然，也有让渠服气个物事，便寔未庄个人打来打去都寔三十二张个竹牌，麻将便只假洋人独个会叉来。城里便连小猢狲麻将都死尚尚，假洋人箇水平，便算放城里十把岁小猢狲头前，也只“小鬼见阎王”。大势家听听面都听红来。
“你帮人杀头见过不唵？”阿Q讲，“哦，好相，杀革命党，好相，老好相。”渠头讲摇来，饭唾卤都飞得对头个赵司晨个面的止。大势家都听呆吤定。阿Q头圈望望，蓦丁头顺手挈上来，望头颈伸来长猛长、扣听来味道个王胡个头颈项的箇一记劈落去。
“策。”
王胡㦜跳来，连忙之紧畀头缩转去。横边个人也都听爻㦜jioehjioeh。落晏王胡个头耗揢日数难过落去，都无胆走阿Q边的爻。大势家也都无胆靠近阿Q。
阿Q箇时节在未庄人眼里向个地位，便算比不过赵太爷，讲差不多，也无人反对。
无唣昶，便连未庄箇帮老孺人也都在的传阿Q个事干。未庄便只钱、赵两户寔大户人家，各个都寔穷苦个小户人家，且帮老孺人都在的讲阿Q，也是蛮奇个。老孺人碰着，肯定都要讲，邹七嫂在阿Q吤一件蓝绸裙买来，寔人家退落来个旧裙，只九角洋钿。还有赵白眼个娘——也有讲寔赵司晨个娘，哪个不识——也一件小人着个、七成新个大红洋纱衫买来，只三百九二串铜钿。且箇帮老孺人都想寻阿Q，缺绸裙个想问渠买绸裙，要洋纱衫个想问渠买洋纱衫，见着都不避爻，两套时阿Q都走过去爻，还要追上去畀渠讴牢定：
“阿Q，你绸裙还有不？没有啊？我纱衫也要要，还有不？”
落脚便连钱、赵箇两户人家头屋里个老孺人也都识得爻。箇邹七嫂抖乱擞擞，长讴赵太太过去望望相渠个绸裙值不值，赵太太转来亦hae3赵太爷讲，也讲阿Q卖个物事亦个好亦个巧。赵太爷啜夜饭时节，便对秀才划算，讲阿Q个人古怪是古怪，防点牢便是爻，得讲有何物物事好买，买点来也不搭界。扣箇时节赵太太也想买件价廉物美个皮背心，便决定落来，讴邹七嫂随即便去寻阿Q，还特地允许晚头也好点灯。
油蛮揢点燥落去爻，阿Q还无来。赵府全家都等心焦来，个加个气架咧咧爻，有怪阿Q长游记荡记都无固定个坞荡，也有怨邹七嫂做事干无较要紧。赵太太还㦜渠为上半年个事干无胆来，赵太爷倒一点也不愁：箇次寔我讴渠来。赵太爷到脚还是有见识个人，老实无唣昶，阿Q便对邹七嫂和队进来爻。
“渠便讲没有没有，我讲你自家当面去讲，渠还死讲死讲……”邹七嫂一头走一头讲，气敨呼呼声。
“太爷！”阿Q徛檐阶头，嘴戾记，似笑非笑讴声。
“阿Q，听讲你且在外头发财唵。”赵太爷慢慢时走过来，畀阿Q上下望望，讲：“蛮好，是蛮好。箇子嚎，听讲你有旧货在的卖，要便都驮来望望相，也不是为别样，我是想……”
“我对邹七嫂讲过爻，都卖光爻。”
“光爻？装法介快欸？”赵太爷随即接上去问。
“带来都寔畀朋友家啦，本来便无多少，还两样让渠帮人买去爻凑……”
“剩点的还有呶，总？”
“且便只剩张门帘爻呶。”
“khuaeh你门帘也驮来望望相。”赵太太连忙之紧讲。
“khuaeh你天亮驮来唵。”赵太爷也（勿会）介上心猛。“阿Q，你下套得讲有何物物事，先驮我的来望望相起……”
“价钿不比人家少个。”秀才讲。秀才老孺连忙紧朝阿Q望眼，相相相渠感动爻没有。
“畀我皮背心装件相。”赵太太讲。
阿Q嘴得无较要紧应应，应完便懒懒散散出去爻，也不识记牢记不牢。渠箇范子畀赵太爷装来（勿会）舒服，亦气亦愁，气架也不打爻。秀才望阿Q箇副范子摆出来，也死戳眼，讲要畀箇王八蛋防点牢，要便讴保长不准渠住未庄。赵太爷不同意，㦜结仇，再讲渠个物事来路不明，在自家村头还无较猛，夜的望点牢便是爻。秀才听渠伯箇子讲，忖忖也正是，也便畀赶阿Q走个忖法打消爻，还再三嘱咐邹七嫂，讴渠难对人家讲。
结果第二日，邹七嫂便畀件蓝裙驮去染染黑，还畀赵太爷讲阿Q个物事来路不明个话传出去，便只秀才讲要赶渠走个话无传。便算箇子，对阿Q来讲也得知唣不利爻。先寔保长上门，畀渠个门帘驮去，阿Q讲赵太太要望，渠也不还，还要对阿Q畀每个月日个孝敬钿讲落直。接落去寔村头人也不对早样箇子望渠爻，动寔无胆动渠，都畀渠避牢定，对早防渠过来“咔策”个时节亦不样爻，有点敬而远之个味道。
还有两个人闲不牢，要去寻根究底，阿Q也不瞒，还蛮得人识样畀渠个事干讲出来，人家嚇识得，渠阿Q也只是畀人家打打下手，渠墙也爬不上，洞也钻不进，便只徛洞外接接物事。有日夜的，渠扣一只包接着，手想抡进去凑，无唣昶便听着里头有人在的讴爻。渠连忙之紧逃爻，连夜逃出城，逃得未庄转头，且无胆转去爻。结果箇事干一讲，对阿Q便越发不利爻，早大势家对阿Q“敬而远之”，寔㦜结仇，何里识得渠寔连偷都无胆偷个贼骨头呢？实在是无道理㦜渠。
联系客服
