三门湾乡音
从读音及变调习惯上来看,广义三门话的区域远远大于今之三门县域。宁海、象山的南部区域,临海东部诸镇及椒北地区,甚至天台东乡区域,这么一大片范围内的语言相似度极高,这也是本公众号名为“三门湾乡音”的原因。
吴语三门话译读的经典文学作品。如觉可以,请帮忙点赞,谢谢!
阿Q正传
第八章 不准革命
未庄个人心一日比一日安稳爻。听人家传,革命党进城也无何物不样,县老爷还是县老爷,听讲讴法不样爻;举人老爷也何物当的——箇络名堂,未庄个人也讲不清爽——便连带兵个头头都样。便只有样事干(勿会)好:有几个歪个人夹革命党里头捣乱,第二日便动手剪头发辫,听讲隔壁村撑船个七斤便撞着,头发辫一剪,望来便不像人范爻。当然,箇事干也不㦜猛,未庄个人本来得城里也不去猛,便算两个要去,也办法忖来,撞不着。阿Q本来也想进城寻弟兄家,听着箇事干,也便算数爻。
未庄也无之讲没有改革。隔两日,畀头发辫盘头的个人便多起来爻。头前便讲过,秀才公顶早盘,接落去寔赵司晨对赵白眼,落脚寔阿Q。得讲在六月,大势家畀头发辫盘头的也好,打结也好,都不算稀奇。箇且都立冬了,还“秋行夏令”,箇帮盘头发辫个人也老实果决,也无之讲未庄同改革无关。
赵司晨后司ie3空荡荡走来,望着个人都叫起来:
“哦唷,革命党来爻!”
阿Q听爻便死记挂。渠识寔识得秀才盘头发辫个大新闻,便无忖着自家也好箇子做,且望赵司晨也箇子,且忖着学样,决心去做。渠用一梗竹箸畀头发辫盘头顶的,一昶捱爻,且有胆走出去。
渠走得街的,人家望也在的望渠,话都不讲,畀渠装来(勿会)舒服猛,落晏便得知唣胀胀。渠间脾气(勿会)好猛,也勿是讲渠个生活比早孬过,人家见渠也客气,店的不收现钿也无较。寔渠自家忖忖(勿会)心过:革命都革过爻,还是箇副范子。落脚望着小同,老便肚皮都气炸爻。
小同也学渠样,用竹箸畀头发辫盘头的。阿Q无忖着小同有胆学渠样做,绝对不允许个事干。小同算何物唵?渠老想走过去畀渠捽牢定,箸扼断,头发辫放转落来,闷头掴掴两掴凑,便当罚渠连生辰八字都记不牢,还有胆冒充革命党。落脚渠还是算数,便眼举转来望渠,馋唾卤吐口:“呸!”
箇两日,便只假洋人进城过。赵秀才忖着举人老爷还有箱囥渠屋里,也想借个事干亲自上门拜访,亦㦜头发辫剪去爻,便无胆去。渠一封“黄伞格”个信写来,托假洋人带去,讴举人老爷介绍记,好进自由党。假洋人转来,还问秀才讨四块洋钿,秀才便在大襟上头挂块银桃。
阿Q扣还(勿会)心过,也为受人冷落个事干难过,亦听着人家在吤讲箇银桃,渠且忖着自家受人冷落个原因爻:要革命,单清讲投降寔无较用个;单清盘头发辫也无较用;便要对革命党结交且好用。渠识得个革命党便只两个,城里箇个老早便“咔策”爻,且便剩假洋人。渠除赶快对假洋人划算条路之外,便无别样个路数爻。
钱府个大门扣开的,阿Q㦜jioehjioeh样,脚都硬下梢爻。走得里头,望着假洋人徛道地头,一统乌黑个衣裳着的,对洋衣样,身家也一块银桃挂的,手的梗棍阿Q也领教过,尺把长养来个头发辫也解爻,披得肩胛头止,蓬头散发望来便对刘海仙样。赵白眼对三个闲人在对头笔直徛的,毕恭毕敬听渠讲。
阿Q轻轻个走得边的,徛赵白眼后头,想讴声,亦不识得怎讴讴好:假洋人肯定无之讴,洋人也孬用,革命党也不合适,要末便讴洋先生算数。
洋先生无相渠,眼瞎吤定讲来扣味道。
“我人火冒性wae3,为之讲,我每次对渠碰着,都讲:洪哥,我伲动手唵!渠呢,长头摇摇,讲:No!——箇物寔洋话,你帮人识不得。不然我老早也成功爻唵。当然,箇也寔渠做事干小心。渠再三再四请我上湖北,我还无应落来。何人中意在箇小县城做事干欸?”
“嗯,箇……”阿Q趁渠讲歇爻,且十二分勇气鼓出来讲,也不识的为怎个,也无讴渠洋先生。
扣听来味道个四个人头都擂转来望渠,洋先生也望着爻。
“装何物唵?”
“我……”
“出去!”
“我要投……”
“滚出去!”洋先生畀梗哭丧棒挈来。
赵白眼对箇三个闲人都跟牢讲渠:“先生讴你滚出去,你还不听啊?”
阿Q手挡头的,忖也无忖便逃出去爻,洋先生也无来追。渠快步六十多步逃爻,且慢慢时走走,肚里向便在的愁:洋先生不准渠革命,渠嚇无办法爻。转套也无办法指望白盔白甲个人走来讴渠,渠所有个抱负、志向、希望、前程,全部一笔勾销爻。传出去让小同、王胡帮人笑话,倒还寔其次。
渠从来无介无聊过。对于自家盘头发辫,忖忖也无意思,有点望不起自家样。为报假洋人个仇,是想畀头发辫放转落来,落后还是无放。渠荡得天黑,两碗酒赊来啜爻,慢慢时高兴来,亦去忖白盔白甲爻。
箇日夜的,渠照样混来迟猛迟,酒店关门了,且慢慢时荡(thaon3)得老爷殿转去。
啪。
蓦丁头箇一记响来,亦不像炮仗响。阿Q本来便中意赶闹热,闲事保长样。渠朝个声响摸过去,恰对有人在吤逃样,渠扣头侧转来听听,有个人望对头箇一记逃过来。阿Q㦜tsae2来,也跟牢定逃。渠转弯,阿Q也转弯。渠徛的,阿Q也徛的。渠望望后头无何物爻,且望出来箇个寔小同。
“装何物嘞?”阿Q有点胀来爻。
“赵……赵家让人抢爻!”小同气敨呼呼声。
阿Q听爻心便卜卜跳。小同讲完便走,阿Q逃逃停停,捱两三次。渠早也做过箇行当,胆也格外大。渠轻手轻脚望路角沿出去,仔细听听,恰对有两个人在的讲样。亦仔细望望,恰对蛮多白盔白甲个人样,来来去去畀箱称出去,家生伙头也称出来,连秀才老孺个宁式眠床也称出去。渠想上前望望清爽点凑,结果脚拔不动。
箇一夜月亮也没有,未庄在箇暗夜里向得知唣静静,静来便对羲皇箇时节介太平。阿Q徛的望烦来,望来望去都寔老样子,人在吤搬来搬去,箱称出来,家生伙头称出来,秀才老孺个宁式眠床也称出来……阿Q都有点不相信自家个眼睛爻。渠忖忖(勿会)望算数,转的自家个老爷殿去爻。
老爷殿里向越发铁墨烂洞黑爻。渠畀大门关好,摸得自家间里,一昶眠爻,心且平转落来,开始有渠自家个忖法爻:白盔白甲个人明明来爻,也不对渠打招呼,介多物事搬去,亦无渠个份。都寔假洋人歪,不准我造反,不然何里无我个份呢?阿Q越忖越气,也越忖越恶毒,头一点,讲:“不准我造反,便只你好造反啊?你姨个假洋人。好唵,你造反!造反寔要杀头,我早迟要畀你告爻,望你不揢去杀头呶,满门抄斩,策!策!”
联系客服