三门湾乡音
从读音及变调习惯上来看，广义三门话的区域远远大于今之三门县域。宁海、象山的南部区域，临海东部诸镇及椒北地区，甚至天台东乡区域，这么一大片范围内的语言相似度极高，这也是本公众号名为“三门湾乡音”的原因。
欢迎收听三门话翻译并讲述的童话故事《神笔马良》！希望各位能帮忙点赞，并留言互动，谢谢！
神笔马良
古老时节，有个小人名字讴马良，渠娘伯呢早猛早便死爻，靠斫柴、割草过日脚。渠平时中意画画，钞票没有，搭搭褡袋便两层布，连株笔也买不起。
箇一日，渠望箇学堂门口横过，望着箇学堂里向一个画师，笔揢牢定扣在吤画画。渠人也望呆去，脚几时移记移记移得箇画师箇横边，对画师讲：“老师，我想画画，你笔借株畀我无较不？”箇画师眼逐渠箇一个举，馋唾卤朝渠吐口：“呸！畀我死去。你箇鬼介穷也想学画，你有钞票买笔啊？老做梦啜绿豆芽了呶？”讲完便畀马良赶赶出去。马良箇人呢，心气便死高高，你讲我无钞票买笔，笔买不起画都无之学啊？我便要学学相。
渠且决心落落去，日加日苦心练习。渠得山上斫柴，便柴梗扼株，在沙地的畀鸟飞个范子画落来。渠得河岸边割草，便畀草梗水蘸蘸，在河岸脚个岩头上头，畀鱼划个范子画落来。夜的转得屋里，亦炭捉块来，畀日的画过个物事，一样一样在窑洞个墙壁的画遍凑。笔没有何物搭界，画画照样画。
便箇著，一年一年过去，马良日加日学画，歇日都不歇。渠窑洞个墙壁，头圞四圈画便画实实爻，嚇渠便在箇画上头画，一层叠一层。画得落脚，渠箇水平也上猛上爻。渠画来个鸟便差嘴巴叫声，画来个鱼便差尾巴闪记。渠在村头口画只草鸡，箇老鹰便日加日飞过来，在上头旋。渠在后山画只狗头熊，牛啊羊啊㦜来便无胆得后山啜草。便可惜无个铜钿买笔，马良为箇事干便一直死记挂，得讲有笔且唣好呢！
箇日夜的，马良眠窑洞的困觉。渠整长日做生活、学画，老早也着力死爻，眠落去，眼懵记懵记便困去爻。
也不识得唣昶过爻，窑洞里向五颜六色个光射进来，一个胡须雪白个老官头畀一株笔送畀渠：“箇株寔神笔，你要好好个用！”马良接过来一记望，箇笔便金光闪闪。放手的掂掂，还蛮重个噢。嚇渠便死人高兴，脚都跳起来，嚇对个老官头讲：“谢谢公！谢谢公！”渠还想讲凑，箇白胡须老官便影也没有爻。
马良箇一记tsae2，人也醒爻，眼搓搓，且识得自家在吤乱梦。眼逐手的一记望，欸，老一株笔揢的相，对乱梦乱来株笔一色丝样。箇老古怪啦。
嚇渠便得知唣高兴。箇时节还只半夜三更，渠便（走复）得各个小弟兄个屋里敲门，畀渠帮人都讴醒，讲渠笔也有爻。渠用株笔画只鸟，鸟翼膀拍拍，飞得天的去爻，朝渠歌唱唱。渠用株笔画梗鱼，鱼尾巴闪闪，划水的进，摇记摇记，舞跳来畀渠望。渠嚇高兴死：“嚇鲜，箇神笔老蛮杀甲个欸，画何物变何物！”马良箇株神笔驮来，嚇长长帮村头里个穷苦人家画画：何人屋里得讲缺犁缺耙，渠便帮渠画犁画耙；何人屋里得讲牛没有，渠便畀渠牛画只；何人屋里得讲水车没有，渠便帮渠水车画只；何人屋里得讲磨没有，渠便帮渠磨画只……
箇事干落后让隔壁村个财主老爷识得。箇财主老爷便两个家丁派来，畀马良揢去，逼他画画。
马良难望渠岁数小，人硬扎的猛。渠识得财主老爷个意思，由渠哄也好、㦜也好，想讴渠画只金元宝忖也难忖。箇财主老爷便气气死，畀渠关牛栏的，饭也不畀渠啜。
黄昏时节，雪大猛大落来，便对鹅毛样，地的随即便厚猛厚一层暧的爻。财主老爷忖，你马良在箇牛栏里向便算饿不死也要畀你冻及死。嚇渠走得牛栏门口忖望望相，只见里向有红光透出来，还有香喷喷个味道嗅着。马良在吤装何物嘞？嚇渠死奇怪，眼扑门缝的张张。渠还忖马良要冻死，何里识得马良一只大火炉烧来，一头火暖燂燂，一头饼烙来啜啜。箇财主老爷且忖着箇络物事都寔马良用神笔画出来，渠赶快畀家丁讴来，要畀马良箇神笔夺去，还要畀马良杀爻。箇十把个恶戾戾个家丁冲得牛栏里向，一记望，欸，马良何里去爻鲜？只见一张格梯隑箇东头墙壁的，马良老早个也爬格梯的上爻，夹摸黑逃逃爻。财主老爷连忙之紧也敀格梯的上，还只两步爬要，便脱落来，格梯几时也没有爻，嚇渠识得箇格梯也寔马良画出来个。
马良望财主老爷屋里逃出，忖忖便算逃得自家村头也无可ieh去。无办法，也便只朝自家村头方向手甩甩，算是告别。马良用神笔画只马，骑上去，望大路逃去。无唣昶逃爻，便听着后头有整大帮人追过来。擂转头望望，只见寔财主老爷一匹快马骑的，钢刀揢手的，还十头念个箇家丁带牢定，火把照来便锃亮，便追上来了。
马良不慌不忙，用神笔画张弓，画株箭，箭搭弓的，cieu5声响射出去，扣射箇财主老爷个喉咙头的，财主老爷望箇马的脱脱落去。嚇马良马拍拍，cia5~~~~，望头前飞样逃逃去。
马良无日无夜逃，连得逃箇几日，且逃得城市头，望望对屋里也差来远猛远爻，渠且住落来。渠整大揢箇画画来，驮得街的卖。渠呢亦㦜人家识得渠有神笔，都假假意不畀东西画活，勿是少箇样，便是缺吤样。
箇一日，渠一只仙鹤画来，特地眼乌珠不点，不让渠活。结果一不小心，一沰墨水灒箇眼的，仙鹤眼一撑，翼膀拍拍飞得天的去爻。
箇事干一出，整只城市头个老百姓都识得光爻。当地个官老爷连忙之紧畀箇事干报畀皇帝。皇帝圣旨落落来，讴马良上京。马良（勿会）去噢，帮人便畀渠拖拖去。
箇皇帝蛮歪啦，长欺侮老百姓。箇络事干马良也长听，听爻便戗心戗爻，得知唣气气，何里还会畀渠画欸！皇帝讴渠画梗龙，渠画梗大四脚蛇；皇帝讴渠画只凤，渠画只大赖乌。箇大四脚蛇对大赖乌啦，亦介难相，在箇金銮殿里向便乱爬乱叫，还装打来，畀金銮殿啊装来便乱七八糟。皇帝气气死，讴卫兵畀马良个神笔夺夺去，还畀渠打入天牢。
皇帝神笔驮得手，想自家画画相。渠画垛金山，忖忖只一垛金山还欠够，亦多猛多金山画来凑，都山叠山爻。画好一记望，何里寔金山，都寔只加只大石头呶，上头捺多猛，坍坍落来，差点畀渠个脚骨捺断。
皇帝忖忖（勿会）心过噢：我金山画不出，金砖总好画喽。渠一块金砖画来，望望细猛，画块凑，忖忖还欠大，落晏便整长条画来。画好一记望，何里寔金砖嘞，寔一梗长猛长个大蟒蛇唵，嘴开来对血盆样，啊呜一口朝皇帝扑过来。还好卫兵救来快，不然皇帝便让大蟒蛇啜爻。
皇帝嚇无办法，也便只畀马良放爻，对渠好话讲讲，讲送畀渠金银财宝，还讲要畀公主嫁畀渠，招渠当驸马唻。
马良一心想畀神笔驮转来，便假假意答应。皇帝且便死高兴，畀神笔还渠，讴渠画画。皇帝忖：“金山、金砖都画不出，khuaeh便摇钱树畀我画株来唵。摇钱树上头金银财宝生满爻，摇记便整大揢脱落来，且唣味道。”嚇渠便讴马良画摇钱树。
马良肚的老早便划算好爻，渠话也不多讲，你讲画便画唵，神笔挈来一记甩，眼头前便一片海画出来，一眼望不到头。海水kuan1清，一点浪也没有，亮闪闪望来便对一面蓝宝石做来个镜样。箇皇帝望爻便是（勿会）高兴，面hieu2落来，ghen1渠：“摇钱树，摇钱树，识得不唵？啊？你画海装物唵？”
马良在海个中央心画只岛，岛上头一株亦箇大亦箇高个树画来，讲：“呶，箇物勿是摇钱树啊？”皇帝逐箇株树望望，老实唵，金光闪闪，嚇便馋唾卤咽gueh啊gueh，嘴笑戾来，连忙之紧讴马良画船，渠要过去摇钞票。马良一只大猛大个船画来，皇帝畀娘娘啊、太子啊、公主啊，还有将军啊、王公大臣啊，都望船的带上去。
马良几笔风画的，便开始有浪爻，船也慢慢时驶去爻。
皇帝便着急死，巴不得早点到，讲船速度慢猛，徛船头便死叫：“风大点！风大点！”马良便几笔粗猛粗个风加上去凑。且浪濯来高猛高，帆布吹鼓来，船便对箭样朝海中央心驶去。
马良亦几笔大风加上去凑。嚇箇海啊，便哄哄声响，浪卷来便屋介高，船便对树叶样在吤摇。
且皇帝装㦜来唻，衣裳也打滥光，畀船的梗杆便死搿搿牢定，在吤拼命讴：“风忒大爻，船要翻了，嚇难画爻唵！……”马良恤也（勿会）恤渠，还在吤画风凑。风便越发大爻，厚猛厚个云吹来，雷佛也打来，暴雨也落来。浪便对排加排个墙样，一蓬接一蓬朝船捺去。无唣昶，船翻爻，便对沙样撒撒爻，皇帝帮人都沉海底去爻。
皇帝一死，箇《神笔马良》个大话便传遍爻。嚇箇马良落晏得何里去爻呢，大势家都不晓得，有人讲：渠转屋里爻，对朋友家和队。也有人讲：渠在外头流浪，专门畀穷苦人家画画。
联系客服
