三门湾乡音
从读音及变调习惯上来看,广义三门话的区域远远大于今之三门县域。宁海、象山的南部区域,临海东部诸镇及椒北地区,甚至天台东乡区域,这么一大片范围内的语言相似度极高,这也是本公众号名为“三门湾乡音”的原因。
话别2018
大家势人好!眼一记䀹,2018年亦要过完爻。今日寔2018年个顶落脚日,天亮便是2019年个元旦。元旦我伲也讲阳历过年,寔一年里向过个第三次年。为怎个箇著讲咛?
周历寔冬至过年,我伲块边还一直保留箇种传统,冬至过爻便大一岁。
冬至还只过两日,亦寔西方个圣诞节。圣诞节寔耶稣教个节日,中国没有耶稣教背景,不听耶稣个后生人其实寔畀圣诞节当一次休闲、购物,对约会个机会,苹果个“苹”对平安个“平”同音,平安夜送苹果个做法便寔中国人发明个。圣诞节在西方,便对东方个春节样,为之讲,“Merry Christmas”后头都要跟句“Happy New Year”。
接落去咛,便寔元旦。古老个 元旦 寔春节,且个 元旦 寔孙中山定落来,得且还只百把年时间。
元旦过爻,便寔农历春节,寔我伲真正意义上个过年。
广告
“净态”产品代理:项女士135 1576 8382(微信同号)
前两日,我还用本地话一首打油诗写来,读畀大家势人听听相:
慢点,慢点
冬至来爻,你讲也寔过年。
还只两日过爻,你亦讲Happy New Year!
拍历无剩几页
转眼亦要换新个封面
隐隐约约,亦恰对望着
三十夜晚头个灯笼吊在眼头前
慢点,慢点
想人家讴我叔多讴几日
公啊,你慢点
好。照毛岁来讲,到得2019年,80后也开始爬得40岁爻。嚇你讲箇时间过来快不快,当年个小皇帝,眼一记䀹,相范子也好讴老皇帝爻。
昨日带我儿得医院望医师,转头时节,我儿对门口头个小护士讲阿姨再见,箇护士啦,连忙至紧guen1落来对我儿讲:“阿奈小弟弟难畀我讴折寿爻,讴我姐姐。”我在横边听爻人便只在解旋,心都差点听合霜冰爻。落脚一记忖,也无何物嘞,大我几岁个表姐都做孃爻。
都讲人得中年,活来便对西游记样:孙悟空个压力,猪八戒个身材,沙和尚个发型,唐僧个废话,得西天还越来越近爻凑。人家得西天寔成佛,我伲咛,寔变鬼。
讲着西游记,大家势人都识得,电视炒爻电影炒,中国炒爻外国炒,蛮多人九九八十一难都会破出。嚇我伲今日畀西游记倒转来讲讲相,也死有味道个。
如来佛派唐僧师徒四个人,经书对小白龙带去,得东土大唐传教。一出门,经书便让如来佛两个徒弟拐去爻,无之讲无之道。路得碰着箇络妖怪,除个把外,都寔有后台个,打来打去打不倒。猪八戒对沙和尚望望介黑暗,心也凉爻,一个留高老庄讨老孺过日子,一个钻流沙河做妖怪。便剩孙悟空独个坚持正义,一路斩妖除魔护送唐僧得东土去。结果箇天庭望孙悟空戳眼猛,便对如来佛讲好,讲会保证唐僧平平安安得长安,条件是讴如来佛畀孙悟空对白龙马都处理爻。落脚,如来佛先畀小白龙关得鹰愁涧,接落去亦畀孙悟空捺箇五指山下。唐僧便畀孙悟空断断詨,独个人走得长安传教,还对皇帝结拜兄弟,享受荣华富贵,落脚寿终正寝。等得五百年过爻,孙悟空且趁五指山下逃转出来,渠直接冲得天庭打,畀天庭打得天翻地覆止。天庭无办法,畀猪八戒对沙和尚请转来,让猪八戒变著人转,封天蓬元帅,沙和尚封卷帘大将,讴渠两个畀孙悟空杀爻。打得落脚,孙悟空心灰意冷,渠不想兄弟相残,便去寻菩提祖师点化。接落去,渠讴菩提祖师畀渠个本事全部封印爻,如意金箍棒也让渠断得东海变著定海神针。他转得花果山,陪猴子猴孙和队过完一生世,死爻变著花果山顶个一块岩头。
有人讲,箇物且寔真正个社会。生容易活容易,生活不容易。好,今日便讲介多,祝大家势人元旦快乐!
联系客服