本文采用吴方言菱湖闲话，首发于公众号“吴语今说”，作者清远山人，湖州菱湖乡土作家，详见文末。
立夏，是二十四节气之一，是标示万物进入旺季生长的一个重要节气。历书：“斗指东南维，为立夏，万物至此皆长大，故名立夏也。
立夏喫乌菱音视频
又快要到立夏了，老家过立夏的习俗，是要喫(吃)灰鸭蛋(咸鸭蛋)、喫(吃)寒豆饭(碗豆饭)、还要喫(吃)乌菱的，记得小辰光听老年人讲过：“立夏喫(吃)了乌菱，乌蚊就不会得来叮你了。”
老家勒拉(在)湖州城南的一个江南水乡古镇浪，镇名古称'秀溪’，也称做'凌波塘’，老早(很久以前)镇边个河浜漾荡水面浪，到处种满了菱，古人有诗云：'丛丛菱叶随波起，朵朵菱花背日开’。因盛产菱，所以后来连镇名也索性改叫了菱湖。
记得小辰光，每当釆菱季，大街上嫩菱堆得小山一样高，卖得便宜煞，讲是一分洋钿一斤，一般畀伊(给他)个五分洋钿，也弗用称了，直接畀尔(你)一大洋锨，可以装得拍拍满满一大竹篮子。
菱生长勒水面浪，釆摘季节辰光很短，只能等大部分菱成熟了，划着极小的、椭圆形个菱桶轻轻釆摘，釆摘个辰光虽然会得蛮小心，也难免有弗少早熟个菱，会得落脱到水底里去了。
到了来年春天，港里个水慢慢交变暖热起来了，古人讲 : 春江水暖鸭先知。勒拉菱湖，港底浪个菱，比鸭还要晓得得早。勒立夏前头，沉到水底浪向个菱，已经发出芽来，长岀了长长个嫩茎，努力地向水面浪伸展着。
菱湖地区个农家，有一种专用个器具，叫“菱拖“（'拖’，念作'它’音），专门用来拖乌菱，两条各长约一米个大竹条，呈八字形机翼状分开，上头用细绳子，扎紧一排排削尖个小竹片，绑上铁链，捆根长拖绳，沉到头年种过菱个水面下脚去。划只小船，来回拖动，长长个菱芽头，就夾到竹片缝里，一般每次拖，多少总有点收获，运气好个辰光，菱拖拉岀水面，会得看到夾牢了一大串乌菱，也算是种菱个村民发明个一种补偿性收获吧！
镇上个西栅玄坛庙湾角浪，有个木材行，木材行外头有条大江，是浙江省八大水系中个东苕溪，也是汇入太湖个主要水源河，菱湖人习惯叫伊龙溪港。江南个河流水势平缓，但水位蛮深，江中筑有一个长宽各有廿几米，用长木桩加竹篱笆围起来个菱屯。
每年秋天，供销社就勒菱屯边开称收菱，菱湖周边村坊浪摘了菱，会得一船一船摇过来卖，供销社过磅称后，就往菱屯里向倒下去，浮起来个是嫩菱，弗耐储存，旋吤(马上)捞岀来运到镇上卖脱，半卖半送，十分便宜。沉下去个是老菱，屯勒水底，到了冬天，菱外层嫩皮畀水蚀软了、烂了，剩下来个菱木质内皮呈咖啡色了，菱湖人称之为酱色，格就是有名的“菱湖酱菱“了。酱菱汰干浄后，装了麻叉袋，每年有成千上万包酱菱，堆勒龙溪港岸边，等勒用大船来装出去，听讲都是岀口的。
江中菱屯个河泥里，每年都会有不少呒没捞完的菱，到了来年初夏，就会长岀菱芽，变成乌菱，水乡孩子个盛宴也到了，我们那个辰光，正是物质匮乏年代，可以喫个东西蛮少，嘴也就特别號食(馋)。乌菱勒水底泡了好几个月，咬起来甜丝丝，生脆脆个，有一股水乡特有的味道，又富含蛋白质，对伢小把戏(小孩)，吸引力大得弗得了。伢也会效仿着做个小小个菱拖去拖菱，一淘小朋友们会一连好多日脚，日日到菱屯那边去拖乌菱。
立夏边了，镇里个街路浪、弄堂里，也能看到拎了一串串乌菱行走个人，有叫卖个，也有买回家过节用个。
听老家人讲，吤歇个人，种菱呒没以前多了，已呒没人去拖乌菱了，菱湖街浪向，也看弗到有乌菱卖了。是啊，吤歇小把戏有吤交关好东西喫，人工又值铜钿，啥人还会再去拖乌菱啊！菱湖个小把戏，只怕也已经弗认得乌菱了。
时代勒拉飞速发展，交贯(很多)民俗个东西，也慢慢交退岀了伢大家个视野，退岀了伢大家个记忆了。
再过若干年后，只怕是诗仙所描述的“渌水浄素月，月明白鹭飞，郎听釆菱女，一道夜歌归。”个美好意境，也将不复存在了……
菱桶和菱拖(音)
酱菱和四角菱
乌菱
乌菱普通话版，曾在2018年06月24日 湖州日报 发表刊登。这次正值立夏节气，为推广吴方言文化，作者特意用吴方言菱湖闲话改写，并增加了方言音频，望能引起老湖州的童年共鸣。
end
联系客服
