苏白学堂，做最优秀的苏州话教学与传承平台。
本栏目由灬醉里吴音灬授权转发
倷平常辰光阿一径看电影？倷看电影个辰光最讨厌个是啥个？伲来看看孙悟空个说法……
昏说乱话 第四期 文明人
Hiro孫悟空
昏说乱话开始哉~
各位手机门前个听众朋友大家好，欢迎收听今朝一期个昏说乱话。今朝是两月十五号，礼拜三。那么昨日仔搭那㬟更新，为啥体呢？因为我昨日转去啊夜里向网呒不哉，网呒不哉那么愁得来，那么也弗晓得啥个问题，检查过后呢，今朝去营业厅想看看啊是铜钿㬟交，结果交哉。那么喊人家过来一看反正是……莫名其妙啦。讲哀只啥个路由器，哦哀个网装仔两年哉，账号密码过期哉。帮我呢拿只手机弄仔一泡，就好哉。好仔过后那么所以今朝就……昨日仔搭因为我之前帮自家留仔一个后路嘛，讲几乎每日更新，该个几乎呢就值得伲来思考哉。就是我弗一定每日更新。
那么昨日仔搭呢夜里向出去看电影，叫啥个《极限特工》。那么电影呢我觉着还可以，甄子丹么武功蛮狠，还可以，蛮好葛，还是不能讲特别特别好看吧，应该讲总归，天天嘛呒不啥事体么难得看看电影么也蛮好~最近电影么也蛮多，之前过年也看仔弗弗少少。那么伲今朝要讲个呢，弗是电影，伲来讲讲看电影过程当中，搿种弗文明个行为。
最最让大家讨厌个是啥物事，就是讲闲话，特别是搿种小人。现在个电影呢，家长也真个是……额……中国个电影分级制度呒不外国实梗细，应该讲，啥个电影里向侪是大人小人侪有个。那么有种呢里向有点不大适合小人个镜头呢，那么叫仔小人就要问哉有辰光，包括敲人啊乱七八糟葛，暴力葛，出血葛，小人其实侪不大好多看。弗是前头新闻有个嘛，也覅讲是电影哉，动画片也要出事体。讲啥个小朋友看仔喜羊羊里向，啥个羊拿搿个狼放勒火浪烧啊，那么去拿自家个小朋友去烧一烧，弄的人家到医院里去哉。所以啊，一个，覅啥个电影侪带仔小人去看，看看清爽，包括搿个西游记，说过年搿本也不大适合小人看。覅看见西游记只晓得是猢狲勒啥个，猪八戒孙悟空，那么乱来乱来，弗是个。现在个电影唔倷为仔票房，为仔让大家吸引去看啊，加仔弗弗少少大人个元素。本生你讲西游记就是伲古典个一本名著嘛，也弗是讲是小人个啥个连环画啊，还是搿种小人书，也弗是个啊对啦？所以看那，总归最最保险个就是拨小人还是看看动画片吧。当然啦喜羊羊搿种是个别葛，个别葛。那么现在我看电视浪么……我也长长远远弗看电视哉，也弗晓得放点啥个动画片，反正也弗及我小个辰光。
弗讲哀个，还有一种弗文明个行为哪，就是走动。有种么晏进来，位子么浪当中葛，人么晏葛，啯咯啯咯轧进来。一歇歇么拆尿哉，一歇歇么啥个哉出去哉，一歇歇么吃香烟哉有种男个，进来么一股香烟臭。弗文明个行为，还有一种呢就是看电影个辰光孛相手机，啥体哀个我也要讲那？倷试试看，倷坐勒嗨看电影……电影院放电影唔笃晓得个侪是黑葛，前头有个人勒孛相手机，一点亮光就勒倷眼睛下头，我告诉倷，倷看勒嗨随便那哼也弗会适意个。边浪么好点，边浪么俚假使靠后点好点。当然啦勒浪倷后头更加弗影响倷。但是勒倷前头，就勒倷眼皮底下，哀个啊是很讨厌葛。
还有一种那就是，搿只头啊，搿个人就欢喜坐的笔直。也弗是讲俚人长得有几化长，唔倷就笔直。笔直过后搿只头总归拿字幕总归𢴳脱两个字。也蛮讨厌，倷也弗好去敲俚头皮，啊是啦？也蛮讨厌个。所以讲，电影也引申出很多弗文明个行为。当然啦，搿种垃圾留勒座位浪呢，该种小事体么也总归弗讲哉，呒啥讲头。讲个只别过是看电影个过程当中引起个事体。
那么衍生出去还有一桩，昨日我也碰着葛，我也觉着很弗对。侪聚勒个厕所吃香烟，男厕所。嚯！走进去搿个味道啊……我看见一个爷抱仔一个小囡啊，抱勒手浪一点点大，想进去带俚拆尿个，进去仔马上逃出来。所以说一群人，侪勒里向上厕所，也弗顾小人，也弗是全世界个男个侪吃香烟个。啊是啦？所以讲，我也希望能……搭大家勒该面听节目个人讲一讲，就是公共场所那……还是稍微……当然啦顾及自家最重要，也要稍微考虑考虑人家个。我也弗是啥个特别有影响力个公众人物，我只能讲一句稍微考虑考虑身边个人该样一句很小个闲话哉，啊是啦？也是为很多个，搿中……弗吃香烟个男人，包括闻着香烟呛个人，有种呼吸道弗大好个人，啊是啦。现在外头倷看那，空气质量本身就弗好，商场里还要吸搿种两手烟。所以说，昨日仔搭我听见门口头个拖地个阿姨也勒讲，赛过勒讲里向吃香烟人哪哼哪哼。哀种侪是让人觉着蛮惋惜个，啥体伲要实梗做，啊是啦？其实是很小个事体。当然啦，商场个管理方面也存在个漏洞。有种商场就有吸烟室个，专门一只吸烟室，倷要吃香烟到吸烟室里去。厕所里吃香烟有人来捉个，罚倷铜钿，两百块三百块啊是啦。当然搿只商场呢我也弗讲哪只，反正该个方面，俚是存在问题个。
当然文明该样一个词语呢，倷要讲呢，是讲弗完个，人家也听弗完个。很多很多个事体勒浪社会当中伲侪要注意，啊是啦。新闻里一径讲，就看见视频，去采访个日本人。讲唔笃印象中中国人啥个腔调？日本人侪讲中国人讲闲话声音蛮响葛，蛮强势葛，喉咙三板响，该样个情况呢勒身边确实有。也只好讲日本人蛮触霉头葛，碰着个倒侪是喉咙三板响个人。当然啦日本人也有喉咙三板响个呀。所有侪有好勒弗好。所以呢也覅因为搿种视频呢就讲中国人好勒弗好，讲中国人素质低，讲搿个日本人素质高，啊是啦。实梗想个人倷日本去，去做日本人，反正覅做中国人啊是啦。所以说还是要从自家做起。当倷做的好个说话，搿种视频看也覅去看呒不必要葛。伲也可以勒中国街头去采访日本人个呀，一样个啊肯定也有中国人会得讲日本人个毛病个呀。
所以说文明从自家做起，从身边做起。看电影，商场里，各种场所伲侪要注意。今朝个节目呢就到该搭，谢谢大家~
【版权归作者所有，文字稿由苏白学堂整理推送】
词汇说明：
1. 朆fen1：副词，未曾，没有。也会写作“㬟”
2. 为啥体 we sat hi：为什么
3. 讲闲话 kaon ghe gho：说话
4. 小人 siau gnin：小孩
5. 清爽 tshin saon：清楚
6. 猢狲 weq sen：猴子
7. 晏 e5：晚，迟
8. 轧 gaeq8：挤
9. 拆尿 tshaq syu：小便，较俗的说法
10. 孛相 beq sian：玩
11. 长 zan：高
12. 𢴳 thaon：遮挡，挡住
13. 喉咙三板响 ghoq lon se pe shian：嗓门特别大
14. 今朝 cin tsau：今天
听写 | 小啦子
排版 | 予安
联系客服
