苏白学堂,做最优秀的苏州话教学与传承平台。
本栏目由灬醉里吴音灬授权转发
大家有没有想过在话筒背后的孙悟空日常的工作与生活是什么样子的?今天,由他亲自来告诉你......
题 bcdef昏说乱话 第七期 工作与生活
Hiro孫悟空
昏说乱话开始哉~
各位手机门前个听众朋友大家好,欢迎收听今朝个昏说乱话。今朝是两月十九号,礼拜日。今朝呢,其实是礼拜六,为啥呢?今朝我勒单位里向值班,所以提前录好。
昨日仔搭呢讲个是评弹,讲个是我学评弹,今朝呢来讲讲工作吧。那么工作是……应该讲我个工作跟评弹也有点小个关系,但是呢弗勒苏州,我呢勒嗨上海个青浦,比较……额,大家想想,哦,上海,国际大都市!弗!我该搭呢是边边浪。租房子也蛮便宜么,吃了住一切侪蛮便宜个一个小镇浪。那么小镇浪呢,应该讲也是人在他乡。老底子苏州人总归……我读书辰光,也覅讲老底子哉,我读书辰光,总归是印象当中苏州人弗大有跑到外地去葛,覅讲是很老老远个场化哉,近点个场化也一般,基本浪反正我身边是呒不啊,弗大会出去。侪是登勒屋里,登了附近上班,像我该种情况呢应该讲蛮少个。基本浪……两个多礼拜吧,转去一埭,歇个两日,睏两个夜里,那么再过来。近蛮近,开汽车么总归一个半钟头好到。从刚刚工作到现在,应该讲也是我毕业过后个头一份工作做到现在也已经要四年哉。那么应该讲一个人生活四年,有种人会得问我:“倷有啥个感想?”我觉着我呒啥感想,我会得总归一个人自家汏,总归买汏烧侪学会哉。汏衣裳,汏被套,套被头,铺床单,换枕头哀种很简单个事体,应该讲对于我来讲是家常便饭哉啦。
包括烧饭,人家有种人……很多朋友圈一径有人拍出来个,赛过炒仔只饭,烧仔只菜,拍一拍放一放,赛过自家会烧饭哉。哀种辰光对于我来讲已经是……举个例子吧,譬如讲今朝某一个人,发仔一只蛋炒饭,那么我一看,哼~蛋炒饭~我好弄十种不同个蛋炒饭天天发!就是该个意思啦~弗是讲我烧个菜几化几化好吃……当然啦吃也是蛮好吃个,因为到搿个朋友屋里向侪烧过,评价确实弗错。那么我蛮眼热该场个朋友葛,就是晒自家烧饭。为点啥呢?一看就是登勒屋里,爷娘总归是蛮欢喜,蛮宠个啦,工作也侪是勒爷娘身边个,天天屋里有现成物事吃,阿是啦?弗用操心过多个事体。像我就要操心哉,盐呒不哉,糖,哪个糖么有点贵,调料哪个么贵,哪个么便宜,哪个么好。总归也侪是不知不觉当中自家侪学会哉。侪学过仔过后现在要求也蛮高,电磁炉烧菜阿总归觉着弗灵。电磁炉搿个受热也就搿浪一片。倷炸炸物事么还可以了,倷真个炒菜、烧汤了啥个物事……我个人弗大欢喜。用火烧出来个味道还好吃点了,受热均匀嘛!微波炉么有一只,夜里向么总归自家电脑门前摸摸,摸好过后呢那么就睏哉。
淴浴之前么,前一呛跑步,运动运动,弗运动么看看电视剧,孛相孛相游戏,弹弹吉他录录歌,帮我点玩具拍拍照,事体还是蛮多个。那么因为经常登勒外头那,跟苏州孛相的关系比较好个几个同学,也总算弗算特别脱节吧,转去还好碰碰头。那么青浦是呒不啥个朋友个,只有同事,呒不啥葛……从刚刚工作也弗会跟哪个同事夜里出去孛相相,基本浪呒不葛。反正……哪讲呢,还是几年还是蛮孤独个啦,孤独还是一个主要葛。那么也培养出自家一点毛病,啥毛病呢?老早我自家也乱葛,物事乱挥,现在样样物事整整齐齐,一点点弗整齐我难过葛。虽然我弗是搿个啥个星座啊,唔笃晓得个,呒不强迫症。但是现在也有哉,也弗晓得哪会葛。
勒嗨今朝该期节目呢,也希望大家能多帮我投投稿,为啥呢?因为我多讲仔,一直讲我弗晓得讲点啥,讲点啥呢……现在讲讲我现在肚皮蛮饿,为点啥呢?因为我亦开始减肥哉……之前一呛,旧年总归是靠运动瘦下来葛。运动瘦呢有一个弗大好个场化,啥个呢?倷弗好停!一停,吼!反弹的来比原来之前还要重!那么从此过后很多个弗大好个症状也开始出来哉,走路么开始吃力。虽然呢吃是一般,我也弗算吃的很多,但是人会得重上去,弗动仔呢也蛮讨厌葛,我也蛮怕生啥毛病,所以现在也要开始运动。我发觉运动过后出一身汗,淴好浴个感觉,真个蛮灵葛。跟倷平常辰光呒啥事体㬟出汗就夜里淴个浴困觉是弗一样葛,感觉弗一样葛。
那么既然单位里值班,今朝呢就弗跟大家多讲啥物事哉。大家也可以帮我多提出建议,希望我勒节目里向或者唱点啥物事啊或者表演点啥物事侪可以葛。我会葛,我总归会得尽力表演拨大家。那么今朝个节目呢就先到该搭哉。节目个最后呢,伲照样是该只歌,下一期要换歌则啊~大家再会~~
【版权归作者所有,文字稿由苏白学堂整理】
词汇说明:
边边浪 pie pie laon:非常边上,非常偏僻
老底子 lau ti tsy:原先,很久以前
登 ten:呆(在某处)
一埭 iq da:量词,一次
买汏烧 ma da sau:买东西,洗衣服,烧饭,指做家务
譬如phi zyu:比如
眼热 nge gniq:羡慕
挥 hue5:甩,扔
朆 fen1:副词,未曾,没有
淴个浴 hoq keq yoq:洗个澡。
听写 | 小啦子
排版 | 小清新的昭昭
联系客服