苏白学堂，做最优秀的苏州话教学与传承平台。
本栏目由灬醉里吴音灬授权转发
你喜欢看电影吗？有没有一部电影曾让你的心绪久久不能平静？孙悟空最近就看了一部这样的电影，让我们一起来听听他的感想。
「昏说乱话开始哉」
各位手机门前个观众朋友大家好，欢迎收听今朝一期个昏说乱话，我是唔笃个老朋友孙悟空。今朝呢……是三月五号礼拜日。
今朝要讲个呢昨日仔搭听过节目个人侪晓得，昨日讲仔一桩，应该身边发生一桩事体，弗大好个事体。那么呢通过过后搿追踪呢，追踪手机资料过后呢，现在结果也出来哉。当然啦大家应也想着，碰着该种事体，非常简单，老死不相往来哉。
阿是啦！也覅登勒一淘哉，再会哉哇。个么钞票么肯定要还出来个阿是啦。欠仔实梗点铜钿，小娘儿也弗应该。铜钿还出来，那么下趟，就是大家看淡脱啦，倷也覅恨我。当然啦，我个朋友呢弗会得恨俚个。那么唔倷也更加覅恨俚哉阿是啦。互相弗恨互相，结束。
那么我问俚，我讲……有一个事体呢我也是蛮呒不闲话讲个。就是我问俚：“哀个小娘儿，倷下来阿是还想跟里登勒一淘勒？”唔倷讲：“照理唔倷一般做出实梗个事体，肯定弗可能登勒一淘，从此再会，阿是啦？”
结果唔倷来一句“下趟个事体啥人也说不准个。”搿句闲话我讲倷也是真个吃不怕苦头，还勒拨自家心理安慰咧。实梗一个人，倷还要给自家后路，还要想好下来还想搭俚登勒一淘。唔笃大家评评理阿对？
那么我讲葛，倷假使下趟真个还搭俚登勒一淘，真个登勒一淘。那怕唔笃结婚，哀阶段发生个事体也是唔笃两个人永远心里向个一个结，哀个结呢一世解弗脱个。
唔笃登勒一淘下趟万一……总归要拌拌嘴啊，发生点小个争吵啊争论啊，侪是很正常个。那么勒嗨争吵个辰光，该桩事体永远会得成为导火索，永远是唔笃两个人拿出来翻账一个问题。应该对于搿个男生来讲是可以一径拿出来讲个啦，当然啦俚可能也弗会讲，但不过搿个女个心里向会得永远记住哀桩事体勒海。
所以我讲弗可能，我讲倷真个搭俚结婚首先我弗会来哉，哀个算啥名堂经呀？实梗种事体……当然啦里向还有点原因，我朋友也帮我讲哉，应该讲呢还是蛮复杂个。我听下来呢觉着搿个女小人呢，前提俚讲是真个，个么俚也蛮作孽葛。那么大家既然侪蛮作孽么，两个人也只好弗登勒一淘哉。登勒一淘倷作孽我，我作孽倷，呒不意思个。
那么呢今朝要讲个节目，应该讲我想讲一讲就是我两日天门前啊……差不多，就是我休息日脚勒屋里呒不事体做，屋里门口电影院蛮近葛，去看电影。买仔一张票，看仔搿个《金刚狼3》，相信很多听众应该侪去看哉。我觉着哀个第三本呢有很多可圈可点个场化，伲来今朝就作为我观影过后搿感受啦跟大家分享一下。
首先第一个，《金刚狼3》朆用3D，是普通个，也弗用戴眼镜。哀种超级英雄哥电影弗戴眼镜，说明啥？说明俚更加注重个弗是里向个特效，打来打去个镜头，更加注重个是真实个物事经，情感啊等等肯定会的比3D电影元素更加多点啦。
那么我看确实也是，金刚狼么年纪大哉。唔笃虽然是变种人有超能力，但别过呢也会的生毛病，也会老葛。
搿个博士么真个作孽，老老头，脑子实梗狠，可以连接世界浪每一个人个脑子，居然会的脑子生毛病。而且俚生毛病大家侪看过弗得了，一发起病来，边浪个人侪会的出现一种空气个震动，人会的死脱个，拿人家好弄煞脱。自家么呒不办法控制弗牢，要吃药要打针，真个蛮作孽葛，过后看俚死脱真个作孽。拨俚笃造出来跟金刚狼一模一样弗晓得啥物事经杀脱，真个作孽。
金刚狼，博士对他来讲是恩人呀，恩重如山。俚死脱仔俚肯定痛苦。那么唔倷自家也年纪大，脚一直跷勒嗨。搿个爪子也弗大长得出来哉。
俚自家也作孽， 还有搿点小人也作孽。养出来从来呒不爷娘，也弗拨唔笃孛相，也弗拨唔笃啥个好个生活，就是拿唔笃改造成有超能力个人作为兵器。也总算逃出来啦，其中一个么有金刚狼基因葛，赛过就是俚个囡儿，手浪有爪子脚浪有爪子。
因为我虽然哀个漫画朆看几化，但不过也了解过，倒说像煞（好像）听说有一个女个金刚狼估计就是俚，后来阿会的拍电影呢哀个伲就弗晓得哉。反正最让我感动个是……阿末点，金刚狼去跟搿个人打。毕竟年纪大，真个弗来三，唔倷死脱哉。
死脱过后呢，俚笃拿里葬脱，上头插仔一个十字架。电影个最后小姑娘拿俚个十字架横转来，一个X。一个X啥个意思大家肯定侪晓得葛，弗用我讲，看过哀个电影肯定侪有数目葛。
阿末点，X出来赛过心里向被刀㪬着一记。哀场一个镜头，就一本电影我告诉倷好勒哪搭？就是电影最后有一个镜头能够敲动着倷个心。
俚前头全部差事铺垫，铺垫仔几几化化，当然啦博士死脱阿蛮心惊葛。拿俚葬脱金刚狼讲仔一句闲话，唔倷讲：“哀面也算风水蛮好哉，有山有水哉”。哀句闲话讲出来也蛮触心筋个。
最后个镜头最触心筋，让我想着机器猫个电影，哆啦A梦啦，里向我记得也有一个镜头非常经典，就是大雄搭一个树一样个人，一个树人。反正该本电影，绿巨人传还是啥个，阿末点搿个树回到自己星球浪去个辰光，唔倷掉下来一只鞋子，搿只鞋子大雄送拨俚个。
就搿双鞋子掉下来大雄接牢，搿个人走脱，该个是让人感动个一个点来，一只鞋子掉下来。本身就实梗走呢倷估计心里向呒不实梗深刻个感受。电影哀个物事，拍的好是真个好。
那么今朝节目辰光也差不多哉，再讲的长呢我要传弗上去哉。那么就哀丈，今朝节目最后就简单个一个背景音乐，再会。
【版权归作者所有，文字稿由苏白学堂整理推送】
词汇说明：
1. 昨日仔搭zoq gniq tsy taeq：昨天
2. 一淘iq dau：一起
3. 再会tse we：再见
4. 但不过de piq kou：但是
5. 女小人gniu siau gnin：女孩子
6. 作孽tsoq gniq：值得同情，可怜
7. 两日天门前lian gniq thie men zie：两天前
8. 跷chiau：瘸
9. 阿末点aeq meq tie：最后
10. 弗来三 feq le se：不行
11. 有数目yeu sou maq：有数，知晓，了解
12. 哪搭no taeq：哪里
13. 触心筋tshoq sin cin：触及痛处
听写 | 小啦子 排版 | 予安
联系客服
