苏白学堂，做最优秀的苏州话教学与传承平台。
大家好，我是[哔——]。今朝呢搭大家分享一桩非常尴尬个事情，就发生勒我身上浪向葛。
我呢最近拨辣公司指派到外地去出差两个月。本身呢是桩好事体，一个呢去外头见识见识、锻炼锻炼；另外一个呢，搿个目的地呢也是一个非常漂亮个城市，实佬勒工作之余去观光一下也是非常好个一个选择。实佬本身心情还是蛮好葛。结果呢就发生仔实梗一桩事体。
勒赶飞机个辰光，本身蛮好，提前勒搭等好哉。就等仔唔倷搿个登机个时间准备上飞机哉。结果呢，就要到时间快哉，突然之间觉着肚皮有点殟湿殟湿。哎哟，不来三葛哇，想想还是上仔飞机再说哉哇。那么熬……只好先熬牢。想想总归可以熬过去个哇，实梗一点点辰光哉。结果不壳想搿个殟湿殟湿个感觉亦来亦严重，亦来亦严重。哎哟，无不办法哇，真个半路浪向“搿个”勒裤裆里向么真个更加尴尬哉。哎，不管哉，搿么抓紧去一埭哉哇。一到厕所啊，搿个感觉真个是……一泻千里。具体个过程呢就不搭各位听众描述哉。只好说，实在是无不办法中断。那么总归，大概差不多哉，抓紧斜出来。
那么搿歇辰光人家已经打电话过来哉，说：“伲飞机侪上哉，纳亨只有你一个人还朆到？”我说“不好意思，不好意思，我马上到！”唔倷说“好葛，我等你下。”结果呢，好弗容易斜到登机口哉，一看，一个人也无不。我开始慌哉呀。再打电话转去，弗接，再打一只，终于接哉。人家说：“弗好意思，伲登机口已经关闭哉，倷还是朆赶上伲个飞机。非常抱歉，倷要么还是去改签吧。”哦哟娘，好弗容易斜到哀搭，结果告诉我哀点闲话，真个哭出来个心也有哉。不过也无不办法，只好去改签。
那么一查呢，稍为近点个飞机全部无不哉，要么只有夜里向八点钟有一班哉，要十一点钟才到。那么总归弗好再拖到第二日天哉哇。无不办法，改么改哉哇，只好说自家辛苦点哉。结果再问问价格，更加吓仔一跳。人家告诉我，“本身哀趟飞机呢，比倷原来乘个搿趟，价格要高，再加上倷赛过有误机费一类个费用，那么一共加起来呢，要再付五百块洋钿。”当时真个是吓仔一跳。本身一千多块个飞机票，现在改签就要五百多块。哦哟娘，真个是……那么我说让我考虑一下。勒旁边笃笃转聚聚转，再考虑仔一下。哎，无不办法，还是改哉哇，改么改哉。
那么今朝我想讲个故事呢就到哀搭点。之后呢，我总结出来一个结论——就是，我哀趟唔坑，真个是历史浪向最贵个一趟唔坑哉，哎。那么也提醒大家，乘飞机、乘火车等等交通工具之前，一定要提前早点勒候机厅或者候车大厅等好。还有一个就是，夏天到哉，一定要注意饮食，千万覅也拆肚皮哉。
大家再会。
文章 | 匿名 排版 | 华美的小清新昭昭
联系客服
