苏白学堂,做最优秀的苏州话教学与传承平台。
本栏目由灬醉里吴音灬授权转发
今年出台了一个最严交通规则~孙悟空对此颇有些想法,我们一起来看看他怎么说吧!
「昏说乱话开始哉」
各位听众朋友大家好,欢迎大家收听今朝一期个昏说乱话,我是唔笃个老朋友孙悟空。今朝是3月26号礼拜日,明天又是礼拜一哉。
今朝要讲个呢是最近新推出仔一个条例,相信大家侪看见哉,弗管是微信里还是微博浪侪有转发,就是最严格交规要出来哉。严到啥个程度呢,严到今朝头一日执法,据说上海就已经有超过两万部汽车被罚,两万部啊。
伲来看看大概有啥个。第一个讲三分钟就出现一个弗系安全带被罚,本身是开汽车系安全带,哀个非常正常,那么副驾驶也要系安全带,现在后排也必要系安全带。
葛么在讲,葛么后排应该讲有种小人车,一般侪是可以坐五个人,后头总归两个,当中还好坐一个。当中搿个人,我也朆看清爽,我搿部当中坐个人像煞无不安全带葛,只有左右两个人有安全带,好拉下来。
我就勒想后排系安全带,阿是有点弗大对啊?上海市区个路况大家侪清爽,包括有种一线城市,很轧。倷驾驶员勒副驾驶系安全架也算哉,倷后头也要求系安全带,哀个到底是为仔人个安全呢,还是为仔罚点铜钿呢?
现在哀个情况应该讲蛮难弄,汽车越来越来,每天停汽车越来越难,大家停汽车难所以侪不愿意开汽车,但是还是有实梗点人勒开汽车。弗愿意开个人多,开个人更多。我是有辰光市区里出去我也弗开个,无不办法,太轧哉,喊喊车子啊乘乘公交车反而比较快。
应该讲,后排系安全带我个人是无法理解个,相信很多老百姓侪无不办法理解。搿种交警驾驶员点良心,自家也肯定无法理解。
还有我刚刚看见儿童座椅,哀个呢我觉着是对个,但不过有种人家两个小人,现在国家讲要养两个,两只儿童座椅一放么,汽车浪还好坐几个人呢?又弗是家家人家买七座车个,小汽车倷里向两只儿童座椅,两个小人坐勒后头,边浪无不大人看好,也弗安全个。再讲儿童座椅搿种物事经,也弗便宜,也让人无不办法理解个。
还有呢多了,买分个,弗系安全带,半个钟头罚仔廿个人;周末好走公交车专用道;拿别人个驾照扣分;连牢变两条道,连牢变两条道我觉着是弗对个。
但是我觉着现在发铜钿也是挖空心思,包括像我哀搭比较偏个场化,警察也蛮结棍个,就一滴滴个一个镇,人么弗多个,汽车么更加无啥个。但不过假使倷停勒弗该停个场化,哪怕倷停五分钟,警察就会得帮你贴一张条子,也弗晓得个警察哪面出来个倷弗晓得葛,倷弗晓得葛。
有辰光也已经看见个警车勒搿面兜啊兜。唔笃个人力,包括警车个警力,汽车倷开要油吧,就实梗兜来兜去,就为仔罚老百姓个铜钿。为人民服务该个宗旨啊,相信现在很多人侪忘记脱哉。特别是哀种为老百姓服务个行业,头一个警察,现在几化拐卖小人包括有种案子侪无不办法破脱,当然有很多估计伲也侪弗会晓得葛。
警察侪勒做啥,现在个警察,阿是天天侪勒严格个训练,锻炼,体能训练,打枪啊,等等物事。覅讲无不铜钿,一年就是刚刚讲个,马路浪罚个铜钿也弗晓得到哪搭去哉。倷罚脱倷阿用勒老百姓身浪呢,多造点停车场呢,让老百姓有汽车停呢。
倷收仔实梗点铜钿,照样汽车越来越多,停车场化越来越少,唔笃铜钿么越罚越多,有啥用场呢?恶性循环,哀个真个是一个很好的现象下去么?哀场下去个后果是啥物事呢?
现在交警跟老百姓赛过敌对哉已经,看见交警就火冒,有种还要骂,打是应该无不啦,无不人敢打警察个。真个无不办法,真个是欺瞒老百姓,为啥体呢真个弗懂,太苛刻哉,恶掐,刁钻促掐,龌龊邋遢,阴险毒辣,老奸巨猾。
好今朝就讲该点,伲下期节目再会。
【版权归作者所有,文字稿由苏白学堂整理推送】
词汇说明:
1. 像煞 zian saeq:好像
2. 铜钿 don die:钱
3. 结棍 ciq kuen:厉害
4. 几化 ci ho:多少
5. 恶掐 oq khaeq:刁钻可恶
6. 促掐 tshoq khaeq:刁钻可恶
1 出自《邢晏春苏州话语音词典》
2, 3, 4 出自《苏州方言志》
5, 6 出自《苏州方言研究》
听写 | 小啦子 排版 | 予安
联系客服