- 评弹，一种美的享受 -
1962年在香港演出
严雪亭，原名鉴初，弹词演员，江苏苏州人。
严雪亭所创的“严调”朴实流畅，亲切自然，与其清脱勾勒的说表艺术紧密结合，浑然一体。
楊乃武與小白菜 · 三堂會審 · 叄
以下整理编辑上海评弹团1962年赴港实况演出录音：
表演者 嚴雪亭
演出内容 《楊乃武與小白菜.三堂會審》
录音总时长 58’00’’
本期时长 10’30’’
人物先后出场序：
杨昌浚 （浙江府台）
毕秀英 （葛毕氏、小白菜）
蒯士芗 （浙江臬台）
钱宝生 （本案帮凶）
刘锡同 （余杭知县、真凶子和之父）
毕白： 喔… 唷…
白： 回大人，葛毕氏叫醒。
蒯白： 招！
白： 招罢，招罢。
毕白： 噢… 噢…
表： 慢慢交拿对眼睛张开来，喔唷，杨乃武阿杨乃武我真真佩服。搿个三年来一堂一堂个刑罚捺亨浪行个呀，我一堂就吃弗消哉！痛阿，痛得个节头好像弗勒自家身浪一样。捺捺亨？我还是说替杨乃武通奸谋命大家杀脱，还是我说知县儿子刘子和搭我有花头，杨乃武全部冤枉！一想末，我要交代杨乃武通奸谋命，弗招。为啥㖏？杨乃武要死我也要死。我为仔要活命勒害杨乃武。总归是死末，害啥杨乃武。让杨乃武转罢。我就替知县儿子两家头杀脱仔罢。我总归死勒啘。我今朝放杨乃武转，杨乃武人弗像勒，浑身侪是刑伤。吾也已经弗舍得勒，三年来，害得俚好苦，倷总归呒不活命末，去害俚啥㖏？
毕白： 正是，正是。
表： 嘿嘿。阿要笑话，【嘎，拟音】一把麻绳死得去活转来，小白菜一歇歇个辰光，脑筋清爽，天良发现。本来小白菜良心嘎。倷捺亨晓得？有一点好证明：男人葛小大生重病个辰光，知县个儿子刘子和写封信拨俚，教俚谋杀亲夫，砒霜我有，倷死仔跟我，放心，弗要紧。小白菜想，哎？男人捺亨好死？谋杀亲夫，跟倷，谈阿覅谈！随便捺亨弗可以个。我个男人要保护好。情愿搭刘子和一刀两断。为仔倷弗肯谋杀亲夫咯，刘子和买通药店小开钱宝生药里向摆包砒霜，小白菜弗晓得个，煎拨男人吃，啊呀啊呀啊呀末七孔流红死脱勒啘。搿末捺亨会得害杨乃武，余杭知县一家门关照俚害杨乃武。害杨乃武噢，杨乃武举人老爷挡得住嘎，顶多三年官司噢，弗会死嘎，害别人是要死嘎。知县儿子怕孽世，独养儿子噢，弗能死嘎。乃末小白菜唸横竖杨乃武好活命个，害仔俚罢。良心搬个场勒海，为啥㖏，因为刘家几十万家当有拨俚。虚荣心重。今朝【嘎，拟音】一把麻绳，就死得去活转来，虚荣心【肥：记音】逃走，好良心得信自家屋里房子空，搬转去罢。良心回巢，脑筋清爽。先请大人松仔刑再说，痛弗过。不过死去回魂说闲话断断续续。
毕白： 请，大人松刑。小女子愿招！
白： 回大人，葛毕氏要求松刑愿招。
蒯白： 嗯！松开。
白： 喳！呼
表： 一声呼威，拶指撢脱，痛得搿双手呒不仔数脉个哉呀。
蒯白： 招！
表： 乃末总好招声杨乃武通奸谋命顶太平。
毕白： 大人！杨乃武冤枉的。
表： 蛮好。谋夫夺妇冤枉变通奸谋命顶痛。
蒯白： 大概是通奸谋命喽。
表： 通奸谋命杨乃武是要杀头个。
毕白： 不是。
表： 弗是啊？
蒯白： 啊？究竟是？
毕白：杨乃武冤枉。小女子另有奸夫。
蒯白： 啊！！！
表： 臬台跳起来。啊呀小白菜啊！倷尽管说替杨乃武通奸谋命。一面打墙三面光。捺亨三面光？西太后面浪有个交待。我伲三大宪顶子保全，审过百余问官前程无关。倷喊声杨乃武冤枉，另有奸夫，搿里向进出忒大。三大宪地位摇动。喏，审过实梗许多官员顶子全部要去脱个！杨乃武活弗得搿点辰光个。【刮冷冷，拟音】一声另有奸夫末，啊！一呆。府台大人杨昌浚一跳，对准蒯大人看看，局！一家人家交脱拨倷，完！倷老公事啘，倷审得好啘。搿藩台大人钱友兰是眼睛打折头个咯，拿仔鼻烟瓶浪闻鼻烟，拨勒小白菜另有奸夫，【砰冷，拟音】，鼻烟瓶也打碎。两旁边弗少官，听见小白菜【刮冷冷，拟音】一声另有奸夫，大家顶子要弗保勒。侪不约而同拿个手【哇，拟音】掮起来，顶子浪向摸法摸法浪摸。摸拨个三大宪看，顶子诶，啥价钿勒海。内当中顶顶着急是余杭知县刘锡同。喏，俚个儿子叫刘子和，替小白菜通奸，谋杀葛小大。奸夫凶手就俚个少爷。小白菜上刑罚俚要叫，覅拿我儿子名字咬出来噢。现在听见【刮冷冷，拟音】一声另有奸夫末，贼官心里向【别 别 别，拟音】连跳三跳。啊呀吾家人家要完。对两旁边弗少官望望，唔笃不过捏牢顶子，我还有个儿子勒海勒呀，倷捺亨弄法㖏。一家人家完勒。头勃转来，匣浪对准小白菜浪看，我儿子个名字说弗得嘎倷噢，搿个辰光外头到里向，哇，一个啰唣呀。老百姓囵千勒海。也浪听。堂浪【刮冷冷，拟音】一声另有奸夫，哇！对嘎。另有奸夫。哦？杨乃武另有奸夫，另有奸夫，哇。闲人看客堆里，一个朋友顶急。啥人？知县个儿子刘子和。廿七岁。凶手啊。也浪听审。听堂浪小白菜【嘎 嘎，拟音】上刑罚是心痛阿。弗舍得啊。痛倷身浪赛过痛我身浪，伲夫妻痛痒相关嘎。暗暗叫说一声小白菜啊，真正刑罚行弗住阿，倷尽管招声杨乃武通奸谋命，唔笃一淘杀，我姓刘个对得住倷，纱枋棺材楠木盖，买好个坟地，入土为安，抱排位则啘。七七敲，八八做，超度倷，锡箔搭草纸恁【梗打梗打，拟音】化拨倷。听见【刮冷冷，拟音】一声另有奸夫末小鬼头颈里瀴荡荡，【肥：记音】一来，啊呀我个头要叫天则啘。危险！逃！我登哀搭是捉牢要杀头嘎。逃，要想走，慢！再听一句。啥？我个名字朆出来。等到俚刘子和三字出口末，我逃啊。搿末逃到哪搭㖏，逃到余杭衙门里，逃到衙门里末，原捉牢个啘。横竖我身边有铜钿，逃得远。我娘是扬州人，逃到杭州去。搿末我逃走仔末，捉刘子和捉弗牢则咯，弗要紧个，横竖我个爷刘锡同也浪堂浪，捉牢伲爷，杀脱拉倒罢。小鬼要害爷哉。至于俚个人啊，身体像根铰链棒。脚望外头跨，头望里向勃，听见名字，马上就逃。旁边朋友吃弗消哉。老兄阿，倷还是想望外头去勒望搿里向去。篫弗开实梗：啥体㖏。对弗住噢，对弗住噢。也浪听。吓唷。搿堂浪捺亨㖏？堂浪臬台亦弗好退堂，只好问下去。
蒯白：阿！另有奸夫。好吧！把奸夫的名字说！
表：弗好揿没俚张嘴哉，只好说呀。
蒯白： 不能胡说！
白：说罢。
毕白： 是。
表：名字勒嘴半边，知县个儿子。拿头慢慢叫慢慢叫勃转来末，对准知县浪看。公阿爹，乃是角落去，大家死㖏，完哉㖏。对余杭县看。倷好对俚看嘎，余杭县加二急个则呀。小白菜阿，我儿子名字说弗得嘎，吾叫倷过房娘啊肯勒俚噢。弗能说嘎，说弗得嘎。也浪抖。臬台浪轧苗头。搿女犯人对眼睛眨法眨法看啥人，跟仔俚对眼睛。哦！也浪看个知县，搿是余杭知县末，刘锡同啊。弗对！弗对！为啥个道理搿个知县零碎动。 七月里向个天气热得台子发烫倷冷得发抖啊？啊哟！奇怪。覅该桩案子个奸夫就是搿知县噢！倷热昏哉。阿是个种大宪想入非非。弗。清朝个官场，有种花头呀。日里向神气活现，箭衣外套，衙门里办公。夜里向到外头偷香窃玉，闯仔祸哉，害到百姓头浪，蛮多嘎。再一想弗对。啥勒？知县年纪六十开外哉。弗至于。搿末为啥浪抖㖏。哦！革起官档来，余杭县顶子第一个拿脱。当然顶顶着急，千钧一发危险个辰光，又要口供勒。
蒯白： 说！
毕白： 是。 奸夫… 奸夫…
联系客服
