八月十八
长桥串月
整个石湖原来就是一座的园林
八百年前
这里是南宋初期一位诗人
范成大的园林
他的《四时田园杂兴》
就是在石湖写的
诗里充溢著江南的田园情趣
我们读它
像亲身到了江南
看到湖光山色
看到一幅淳朴的耕织图
《石湖》郑振铎
中秋节刚正过脱，今年说是十五葛月亮十五圆，实勒中秋夜里出门赏月葛人来得葛多。
但不过啊，苏州闲话弗大欢喜讲中秋，伲也弗大讲赏月，苏州人讲八月半，走月亮。特别是女小娘儿，八月半夜里侪要合好淘，戴好花，出门走月亮。蔡云有诗云：“木樨球压鬓边香，两两三三姐妹行。夜冷不嫌罗袖薄，路遥翻恨绣裙长。”
讲着走月亮，就一定有石湖，苏州人讲八月十八，石湖串月。
石湖是太湖葛一个内湾，勒苏州城西南郊，也是离古城最近葛亦有山，亦有水葛地方，历古以来侪是文人墨客吟咏之地。
春秋时期是吴王拜郊台葛地方，至今还有吴城、越城葛遗址。南宋杨万里有诗云：“万顷平湖石琢成。尚存越垒对吴城。”
杨万里应葛是范至能参政葛约，搭俚葛石湖精舍题词。而该位范参政作兴就是让苏州石湖拨后世文人追捧葛一个源头。
宋朝葛苏州出过两个出名葛“范夹里”，一是先忧后乐葛范仲淹，还有一个，就是该位石湖居士范成大哉。
范成大，字至能，考取功名以后一路官至参知政事，晚年归隐苏州西南郊，勒石湖边筑别墅，自号石湖居士，人称范石湖。
归隐之后植花种草，尽享郊野之乐，也就勒该一段辰光里，俚 写仔大量山水田园诗，最广为人知葛就是《四时田园杂兴》六十首则。
中秋全景属潜夫，棹入空明看太湖。身外水天银一色，城中有此月明无。
明代《苏州府志》浪说：“石湖之名，实自范文穆公始。”
最晏到明朝，游石湖已经是一项盛大葛民间活动哉，明《石湖志》里就有相当精细葛描写。虽然讲游湖葛日脚“无日无之”，但不过高潮肯定勒海八月十八。
明 陆冶 《石湖图卷》
每年葛农历八月十八，石湖旁边葛上方山浪侪有庙会，老百姓到山浪烧香祇神葛同时，合淘游湖，从而有仔“八月十八，石湖串月”葛说法。
石湖桥边浪有一座九环洞桥，叫“行春桥”，据说勒每年葛农历八月十八夜，满月偏西葛辰光，行春桥北葛水面浪，每只桥洞里侪会有一只月亮葛倒影，金波万叠，九月成串，蔚为奇观。
明 文伯仁 《石湖秋泛》
实勒“石湖串月”也就成为仔搭平湖秋月、卢沟晓月、三潭印月齐名葛赏月胜地。
《百城烟水》清徐崧、张大纯：至十八日，群往楞伽望湖亭看串月为奇观。
《晋人麈》清深纫芳：吴中八月十八日看串月，在楞伽山顶望月亭。向东望宝带桥，当月出处，每桥洞有一月影，其光闪烁，霎时即过。遇闰年，则行度有差，月不复串。
实梗盛景，难怪范成大要讲：“凡游吴不至石湖，不登行春，则与未始游者无异。”
明代文学家袁宏道也曾拿石湖上方山搭虎丘作比：“虎丘，如冶女艳妆，掩映帘箔；上方，如披褐道士，丰神特秀。”
清 徐扬 《姑苏繁华图》局部
但不过如今葛上方石湖，覅说搭虎丘比肩，作兴对大多数游客来说，真正闻所未闻，该个亦是捺亨桩事体呢？
问题原是出勒庙会浪。
上方山浪原来有一座五通神庙，香火鼎盛，每年农历八月十八前后老百姓侪会得从各地赶过来烧香祈福。慢慢叫，就形成功仔一个盛大葛庙会。每到十八前后，游人如织，摊贩竞拥，走月赏戏，通宵达旦。
《吴歈》清蔡云：“行春桥畔画桡仃，十里秋光红蓼汀。夜半潮生看串月。几人醉倚望湖亭。”
但不过弗晓得从啥辰光开始，十八祠神就慢慢叫变仔味道，焚香祈福变成功仔借阴斋。
所谓葛借阴债弗是讲真葛问五通神借着仔钞票，而是讲俚会得帮倷聚财，祝倷财运亨通。但不过从名字也听得出来，该种借法弗是啥个好借好还葛。假使倷真葛借阴债发仔家，搿末每年侪要去山浪烧香解钱粮，假使本人死脱，子子孙孙还要继续清偿。
清朝辰光，每年葛石湖十八夜侪有师娘跑马“请神”搭人借债，一脚到仔康熙年间，江苏巡抚汤斌见“祀淫神不福”，大破五通神，再算一清迷信之风。
但不过总归有人要想发极财，借阴债葛风气勒民间屡禁不止，据说民国辰光黄金荣还来上方山借过阴债。
也就因为该种荒诞葛祀神习俗，搭原本清风赏月葛石湖染仔一层阴霾，出仔一句：“上方山葛阴债——还弗清”葛俗语。
一脚到现在，稍为讲究点葛苏州老人讲起石湖，总归还是有点“泥土气”葛，嫌鄙风水弗好。
弗晓得啥辰光，石湖再能退脱搿层俚弗应该承受葛阴霾，还一片清朗赏月天。
文 | 予安
版 | 予安
图片来自网络
联系客服
