|
夜饭吃饱看(新民)夜报,看好夜报好睏觉。搿是交关上海人家屋里向每日天个真实写照,也就是经常讲个所谓个过“海派日脚”。现在订报搞得活,可以到书报亭零买,还可以到邮局订一年。今年晚报派出文化大篷车轰隆隆分别开到鲁迅公园、中山公园、世纪公园、和平公园等10个地方,进行现场订报,并有交关互动节目,像发奖、抽奖跟爱心编织活动老啥,闹猛得勿得了,搞得跟嘉年华似个。
明年订一年晚报是360块。就是讲一个月是30块。10年前是每个月21块;记得20年前是15块。葛末57年前订一个月个晚报费用是多少?一圈问下来估计呒没啥人晓得。
上个号头〔月〕我去兜文庙,勒垃〔在〕地摊浪发现一堆旧发票。心想反正呒啥个事体,就蹲下来一张张翻。翻了一歇,我突然瞄到一张《新民晚报》1957年3月份个报费收据,开始还勿大相信自家个眼睛,再仔细一看,激动得一颗心像啥是要从喉咙口里跳出来啦。我总算勒垃地摊上头觅到《新民晚报》个老物事了,且伊比我个年龄竟然还要大好几个月。有劲伐?所以我豪燥再随便拿几张旧发票,“掩护”晚报收据安全“撤退”。结果摊主跟我一算账。我以10倍于当年订壹份1个月个《新民晚报》个代价买进搿张老收据(其他几张基本呒没啥个用场)。然后拍拍屁股如获至宝快点跑路。
葛末1957年订一个月个晚报到底要花多少钞票?文章里向我先卖个关子。有兴趣个请睁大眼睛仔细看看搿张照片,就侪明白了。啥人叫我是新民晚报个忠实读者,从上世纪80年代复刊开始看起,一直看到今朝啊。
联系客服