阿拉囡儿(ng) 【囡儿,音noe ng,女儿。“儿”上海话读ng(五)音。宁波话“儿子”讲”ng zy” 】读书读得老好,碰碰就是第一名,老师爷娘侪欢喜。不过勿晓得啥个路道,伊就是吓老师,老师讲啥就是啥,打个比方,老师讲要抄十遍个,明明抄了三遍就默出来了,阿拉囡儿照样会抄满十遍。阿拉叫伊勿要抄了,阿拉讲阿拉去帮老师讲,伊就是勿肯……
我有辰光辣想,阿拉小辰光怕老师,是因为老师要告诉爷娘,爷娘晓得仔要吃生活;现在有阿拉搿种爷娘撑伊,伊完全勿应该吓老师个嘛。有辰光帮小朋友讲讲闲话,也蛮开心个。讲发讲发,就讲出问题来了,阿拉囡儿讲伊拉下课勿好去操场浪白相个,后来问仔点其他学堂个爷娘,侪讲小人下课勿好到操场浪去个。搿算啥事体啦?一塌刮子下课十分钟,还勿让伊拉好好叫白相。学堂里向讲小人辣操场跑来跑去出仔事体家长要寻着伊拉个。葛末我也没办法唻,我终勿见得到伊拉学堂去写张生死状,讲阿拉小人出仔事体勿要紧个。我就想到阿拉小辰光,十分钟下课,老师一拖堂,五分钟就过脱了,上课提早两分钟打只预备铃,算算只有三分钟好白相。我总归觉着,老师上课,小朋友讲闲话,是对老师勿尊重,不过闲话反转来讲,做老师个要拖堂,也是勿尊重学生。非但勿尊重学生,而且自家业务水平推扳,连备课也备勿好,预计点辰光也预计勿来,师范里肯定教过哪能算上课辰光个嘛。所以,勿管哪能讲,老师、学生,要大家看得起大家,要大家平等。
(刊登于《新民晚报》2011年4月12日B14版)
联系客服